خير اللهم اجعله خير .. أخدت شهر حبس مع الشغل
صباح الخير علي جميع اعضاء المنتدي الكرام .. القصة ببساطة وبدون تعقيد ان والدي الله يرحمه كان مهندس ميكانيكا .. وكان عنده مصنع تغليف سلك .. يعنى يجيب النحاس الخام و يجدله خيوط وبعد كده يغلفه بلاستك فايطلع سلك الكهربا اللي احنا عارفينه .. وكان شغال كويس ف القصة دي لحد ما المستورد غرق البلد و الحكاية مابقيتش جايبه همها ( يحيا الانفتاح) راح والدي قفل المصنع و انضم للشغل الحكومى .. المهم ان المصنع مقفول من سنة 92 .. و يشاء السميع العليم ان مجلس المدينة يطلع علي المصنع رسوم نضافة 1360 جنيه .. وده (عشان مانظلمهمش ) ف اخر 5 سنين بس .. أما اللي فات ف هما مسامحين فيه (شوفوا كرم الاخلاق) .. المهم انا طلعت ع المجلس اقولهم ان المصنع مقفول ماصدقوش .. قالولي إثبت ان انا مش انا .. قصدي إثبت بالاوراق .. رحت جايبلهم شهادة مختومه من شركة الكهربا ان العداد مرفوع من سنة 92 سنة .. برضه ماصدقوش .. راحوا شكلوا لجنة تعاين علي ارض الواقع واللجنة قالت ان المصنع مقفول .. ماصدقوش اللجنة .. اشتكيت ف النيابة عشان أخد حقى راحت النيابة واخدة المحصل يومين جزا و عملتلي جنحة عشان ماسددتش و حجزوا ع المصنع و الجنحة خدت جلسة والجلسة إدت حكم غيابى شهر حبس وكفالة 10 جنيه .. كل ده ف الفتره من 29 / 12 إلي 1 / 1 / 2012 (شوفوا العدل بياخد مجراه إزاي) .. المهم انا لقيت غفير داخلي الصيدلية : فين وسيم ناصر ؟ .. قولتله انا اهو .. قالي عليك حكم غيابي بشهر حبس .. وخلي بالك فيه حمله نازله من الداخلية اليومين دول يعنى ممكن نيجي ناخدك .. و هكذا ياساده يا كرام أصبحت أول صيدلي في تاريخ منتدانا العظيم ياخد حكم حبس (خلفتي سوابق يامامى) .. وسبحان الله اتأخرت ف دفع رسوم النظافة اتعملي جنحة وخدت حكم ف 3 تيام بينما اللي نهب وقتل شعب بحاله بقاله سنة بيتحاكم و هو ممدد ع الشيزلونج .. إنها حقا العدالة الناجزة
