استشارة بخصوص الصيانة و استهلاك البنزين

**lena jo** · 15-01-2012 09:42 PM

السلام عليكم. استشارة فنية بعد اذنكم
أنا اشتريت لوجي من سنتين وعملت صيانة ال 10000 بعد أول سنة (في ديسمبر2010 ) رغم اني لم اكمل 5000 كيلومتر لأني لا اخرج بالسيارة كثيرا. لكن عندما سالت في التوكيل عن الصيانة فكان الرد أن الصيانة إما سنوية أو بعدد الكيلومترات. و الآن لوجي عندها سنتين و من غير تريقه لازلت لم أكمل ال 5000 !!! لأني بعد الثورة لم اخرج الا للعمل و بباص الشركة. خرجت فقط بلوجي مرات قليلة. لكن كنت أسخنها كل أسبوع إذا لما اخرج بها.والآن يجب عمل صيانة ال 20000.
هل فعلا السيارة تحتاج صيانة ال20000 كلها أم يمكن الانتظار كام شهر؟.
وهل تأخير الصيانة يؤثر علي الضمان؟.
ملحوظة: استهلاك البنزين كان 7.6 او 7.8 لكن من فترة قصيرة اصبح 8.7 مع العلم اني من حوالي شهر او اكثر اسخنها فقط كل اسبوع و خرجت مرة مشوار قريب جدا علي سرعة قليلة فهل هذا هو سبب زيادة استهلاك البنزين ام يوجد سبب اخر.

**amr.elsayed** · 15-01-2012 11:21 PM

اقولك انا تعملى ايه
انتى تروحى التوكيل وتعملى صيانة ال 20000 الف
تكشفى على العربية وقولى على اى ملحوظة زى موضوع البنزين مع العلم ان الاستهلاك عندك ممتاز جدا
اهم حاجة بقى انك تقولي لهم يحطوا زيت 5000 كيلو مش 10000 لانك حتيجى بعد 5000 كيلو حتبقى عايزة تغيرى زيت يبقى ال 10000 كيلو مالهوش لازمة
تانى حاجة اطلبى بعدم تغيير البوجيهات من الاخر حيغيروا زيت بس ونكرمهم ونخليهم يغروا فلتر زيت
..............................................
بينى وبينك انا لو مكانك حعمل حاجة واحد اروح اى بنزينة اغير الزيت وشكرا على كدة بس انتى خليكى
مع التوكيل علشان مايتلككوش فى الضمان وربنا يباركلك فيها ومبروك تعريب الكيبورد

**Egyzizo** · 16-01-2012 01:08 AM

كلام رنجو عين العقل ..
تعملى صيانة العشرين فى التوكيل مع ملاحظة :
1- تغيير زيت 5000 فقط
2- عدم تغيير ولا فلتر الهوا ولا البوجيهات ولا فلتر البنزين ان وجد.

**georgedada82** · 16-01-2012 03:44 AM

انا عندي نفس الموضوع العربية مكملتش 15000 وشاريها في سبتمبر 2009 يعني داخلة علي السنة التالتة ومفروض ان الزيت ال 10000 عدي عليه اكتر من سنة فبفكر اروح اغير زيت 5000 وخلاص او اعمل صيانة العشرين كلها ودي هتبقي اخر حاجة اعملها في التوكيل

**akerima** · 16-01-2012 09:30 AM

كلام الاخوة اللي سبقوني عين العقل - والزياده في استهلاك البنزين دا طبيعي لان العربية بتستهلك بنزين علي السلانسية اكتر من استهلاكها وهي ماشية

**lena jo** · 16-01-2012 09:58 PM

شكرا للاخوة الافاضل الذين تفضلوا بالرد. جزاكم الله خيرا.
الاخ رينجو الله يبارك فيك لكن الكتابة علي الكيبورد العربي صعبه و بطيئة.
انا في الصيانة الاولي اخترت زيت ال5000 فعلا لانهم خيروني بين ال1000 و ال5000
انا حسيت فعلا ان زيادة استهلاك البنزين ممكن يكون من التسخين دون التحرك بالسيارة.الحمد لله.
ان شاء الله سافعل مثلما قلتم لكن لا اعرف هل تغيير الفلاتر و البوجيهات .....يحتاج كشف عليهم ام بالمدة ام بعدد الكيلوات؟. شكرا لكم مرة اخري.

**amr.elsayed** · 17-01-2012 01:01 AM

المشاركة الأصلية كتبت بواسطة lenajo

شكرا للاخوة الافاضل الذين تفضلوا بالرد. جزاكم الله خيرا.
الاخ رينجو الله يبارك فيك لكن الكتابة علي الكيبورد العربي صعبه و بطيئة.

اكيد انتى مش متعودة على العربى مع الوقت حتكتبى وانتى مغمضة

انا في الصيانة الاولي اخترت زيت ال5000 فعلا لانهم خيروني بين ال10000 و ال5000

بالظبط كدة زيت 5000 كيلو هو الزيت المناسب لكى

انا حسيت فعلا ان زيادة استهلاك البنزين ممكن يكون من التسخين دون التحرك بالسيارة.الحمد لله.

علشان تحسبيها صح صفرى كمبيوتر الرحلات قبل اى طريق سريع وشوفى القراية بعد 10 كيلو حتلاقى الرقم اللى فى دماغك
بالاضافة ان متوسط الاستهلاك عندك ممتاز جدا مافيش منه قلق

ان شاء الله سافعل مثلما قلتم لكن لا اعرف هل تغيير الفلاتر و البوجيهات .....يحتاج كشف عليهم ام بالمدة ام بعدد الكيلوات؟. شكرا لكم مرة اخري.

حقولك على حاجة ..
فلتر الزيت كدة كدة بنغيره مع كل تغييرة زيت
فلتر البنزين بقى دة قصة تانية .. فيه عربيات لوجان فيها فلتر بنزين وعربيات بيبقى الفلتر built in فى طرمبة البنزين
معلوماتى ان العربيات اللى نزلت مصر فى شهر 5 / 2010 وما بعدها مفيهاش فلتر بنزين لكن لازم تسالى التوكيل اذا كان عربيتك فيها فلتر ولا لأ اى كان موديلها
يعنى لو مهندس الاستقبال قالك حنغير فى الصيانة فلتر بنزين قوليلوا ان فيه عربيات فيها وعربيات لا
ويا ريت لو يتاكد اذا كانت عربيتك من اى موديل فيهم حتى علشان تكونى عارفة عربيتك وعلشان الاشتغالات
.........................................
بالنسبة للبوجيهات ححكيلك على حاجة حلوة اوى ...
لما عملت صيانة ال 20000 طبعا غيرولى البوجيهات وشالوها فى شنطة العربية
وفضلوا فى الشنطة يجى 6 شهور وفى مرة كنت مع واحد صحبى معاه عربية ريتمو اخد البوجيهات القديمة بتاعتى وحطها فى عربيته وعايز اقولك شغالين معاه زى الفل لحد النهاردة

من الاخر كدة البوجيهات نوعها كويس جدا مش محتاجة تغيير

عايز اصلح كمان حاجة من المشاركة السابقة انتى مش حتعملى صيانة ال 20000 انت حتعملى صيانة ال 5000 مع تغيير زيت
هما بقى يسموها صيانة ال 20 ولا صيانة ال 40 هم احرار انتى تغيرى زيت وتربيط عفشة وشكرا

البوجيهات ------ كل 20000 كيلو وممكن مدة اطول ومسافة اكبر
فلتر زيت ------- مع كل تغيرة زيت كل 5000 كيلو او سنة
فلتر بنزين ان وجد ----- كل 10000 كيلو

**lena jo** · 19-01-2012 09:33 PM

جزاك الله خيرا.

**nomercy23** · 20-01-2012 01:46 PM

على فكره ياجماعه زيت ال5000 بيتغير كل 6 شهور او 5000 وكمان العربيات اللوجان الرومانى هى فقط اللى فيها فلتر بنزين والمغربى كله لا وكمان فلتر الزيت كل 10000 كيلو