تحذير للاخوه الاعضاء من بتوع الكاوتش
النهارده الصبح كنت رايح الشغل مستعجل فالسايس بتاع الجراج كتر خيره قالي العجله اللي ورا يمين مريحه شويه فابقى شوفها بصيت عليها لقيتها مريحه فعلا
مشيت مستعجل حسيت العربيه مش مظبوطه معايا قمت واقف عند بتاع كاوتش معرفوش قلتله زودلي العجله اللي ورا دي واكشفلي عالباقي
قالي واللي قدام يمين دي مريحه برضه قلتله فين ده قالي اهي طب اكسر العجل يمين عليه كده قمت رحت لفيت الدركسيون وانا واقف من غير ما ادخل حتي ورجعتله في ثانيه قالي دي انا سامع صوت تنفيس قلتله مش مهم زودها وخلاص انا مستعجل اوي قالي يا بيه حتهوي معاك اعملها قلتله لا انا مستعجل خلص زود وبس
انا الصراحه شكيت هو ليه متأكد قوي كده انها حتهوي
بعد الشغل لقيتها مريحه شويه بس بسيط الحمد لله رحت بيها لبريدج ستون اللي في كالتكس عباس العقاد وقالولي اللي حصل واللي عرفته قالولي انت رحت لحد وقالك اكسر العجل يمين قلتله اه قالي وادي ست اخرما جنب بعص لايمكن يتعملو غير بالحركه القذره دي وحسبي الله ونعم الوكيل
حمدت ربنا انها مهوتش خالص مني وانها استحملت كل ده
المهم الناس عملولي الاخرام باللحام الالماني ( تيب توب ) وفعلا فكرته جامده اوي وكويس ورصصو الكاوتش ومليت الاربع كاوتشات نيتروجين وماشاء الله اول مره اشوف صنايعيه وبتوع كاوتش على درجه من الفهم دي المهم جيت قلتله الحساب كام قالي 135 جنيه (ست اخرام وترصيص و نيتروجين ) قلتله طب انا عضو في نايل موتورز قالي معاك الاستيكر قلتله طبعا وريتهوله فعاد الحسبه وقالي يبقى كده مله 93 جنيه بفاتوره ضريبيه كمان والحمد لله دفعت وانا مبسوط لانهم فعلا نضاف قوي وبيفهمو قوي وشكرت الراجل ومشيت