الموضوع: اسبيرانزا A516 Ls موديل 2011 للبيع

السلام عليكم و رحمه الله و بركاته

استاذ رامبو
انا الحمد لله كيميائى و رئيس قسم ف شركة بترول ومستقر فى الاسكندرية بحمد لله والاعلان بتاع كونتاكت مش انا اللى كنت عامله وانا اسف ان اللى كتبه للاسف كتب فيه انه لظروف السفر للخارج ولكننى حقيقة مش مسافر اللا اذا ربنا اراد...وبالنسبة لحكاية انى رفضت 50.000 فاعتقد ان عندى حق ...يا جماعة لا تبخسوا الناس اشيائهم عربية عاملة 8000 كيلو و فيها سنتين رخصة و انا باعمل لها صيانة كل 3 شهور وفيها ضمان سنتين وفابريقة بالكامل وانا اطلب 65.500 والاقى حد بيفاصل ف 6500 جنيه ؟؟؟ بالله عليكم ده حلال ؟ حتى لو بيع و شراء ..ماهو اما انا نصاب و عايز اخد فى العربية اكتر من حقها او اللى عايزنى انزل فيها 6500 جنيه عايز يضحك عليا و ياخدها بثمن اقل من ثمنها ويعمل عليا ناصح ( انا اسف انا ماقصدش حضرتك تحديدا ) بس الفصال بالاصول وانا قولت ان معنديش مانع للتفاوض و لكن فى حدود و بعدين احسبوا انا دافع صيانة كام وانا مرخصها سنتين بالف حنيه ولو كنت ناوى ابيع من الاول ماكنتش رخصت سنتين ( واللا ايه ؟؟؟ ) مش كل دى فلوس واللا انا غلطان ؟؟

استاذ semsem hamada
انا متشكر جدا لردك غيبتى و ردك على الناس و انا مقدر جدا لرايك وصراحتك واشكرك على ذوقك وياريت كل الناس تفكر بهذه الطريقة...وياريت مش كل واحد عايز يبيع يفترى وكل واحد عايز يشترى يعمل فيها ناصح على قفا اخوه
ياريت نتغير بقى ف مصر و تكون عندنا ثقافة الاحترام المتبادل وان كل واحد يعطى كل حاجة حقها ...وعلى فكرة للاسف انى اتعاملت بتعامل السوق انى حاطط سعر وممكن انزل عنه شوية ولكننا ف مصر اتعودنا على كده