الموضوع: ### أخييييييرا ... التقرير ###

السلام عليكم ورحمة الله وبركاته

كيف حالكم يا معشر الصقور

أخيرا وبعد 23 يوم من موقعة أوتوإيجيب اللي كانت يوم 31-12-2011 حان الآن موعد كتابة تقرير صيانة الستين

معلش هو اتأخر شوية بسبب انتخابات مجلس الشعب وبعد كده بسبب الإعادة

ولما الإعادة خلصت أتأخرت بردو لسبب تاني هاتعرفوه أثناء الكلام بإذن الله

أولا: أحب أحيي كل الشباب اللي حضروا واللي خلوا اليوم يعدي هوا مع إني كنت هناك من الساعة 9 صباحا لحد قرب المغرب .. حسيت الصراحة إنه كان يوم فسحة مش يوم صيانة .. وحسيت إن الناس اللي كانت قاعدة بتعمل صيانة إنهم كانوا بيبصوا علينا ويحسدونا ونفسهم يسألونا إنتوا تبع إيه بالظبط

كأننا كنا سياح طالعين في رحلة وخصوصا لما المرشد السياحي بتاعنا أحمد مصطفى خدنا جولنا ودخلنا الورشة وقعد يشرحلنا ويفرجنا على كل حاجة

طبعا حضراتكم عارفين موضوع التيدا بتاعتي وموضع العين والحسد اللي ماسكها .. بس اللي ماكنتش متوقعة إن سرها باتع قوي كده

يعني أول ما وصلت قالولي إن الكهربا قاطعة ويا عالم هاتيجي إمتى دا إن كانت هاتيجي أصلا

الأغرب من كده إني لما كنت في آخر صيانة قبلها صيانة الـ55 ألف زي ما حاكيتلكم قبل كده وأكيد نسيتوا طبعا كانت في السبع بتاع المنصورة .. وبردو الجو قلب فجأة والدنيا مطرت و .... الكهربا قطعت !!!

طبعا الواحد بيتعلم من أخطاؤه .. يعني لازم أعمل حسابي في الصيانة اللي جاية وأهيأ نفسي ومظلمش حد من الصقور واتفق معاه إننا نعمل صيانة في نفس اليوم ونفس المكان .. عشان مش هيبقى ليه ذنب إنه يقعد أربع ساعات في انتظار الكهربا :)

والغريب بردو إني ماكنتش أول واحد يوصل هناك وكان في قبلي كتير منهم حبيبي الجنتل يوسف عوض .. إلا إن العربية البركة بتاعتي هي الوحيدة اللي دخلت الورشة جوه في انتظار الكهربا .. والباقيين كلهم مرصوصين بره

المهم العربية كانت بتعمل صيانة الستين وكان في ملحوظة قلتلهم عليها .. وهي إن الزجاج بتاع الباب الشمال قدام كان تقيل في النزول والطلوع من يوم ما اشتريت العربية .. مع العلم إن الباب ده كان فيه شغل سمكرة والزجاج كان متغير

لما الكهربا جت اشتغلوا في العربية وغيروا زيت ليكوي مولي توب تك اللي كنت جايبه

قلتلهم عملتوا إيه في المكنة بتاعة الزجاج .. قالي المهندس باسم اللي كان مستلم العربية إن المكنة باظت وهتحتاج تتغير .. قلتله ماهي كانت شغالة .. قالي هي كده جابت آخرها واحنا بنفك

وعلى فكرة أنا كنت سائل عليها في السبع وقالولي تمنها 700 جنيه غير الضريبة والمصنعية :(

طبعا فوضت أمري الى الله وقلت اللي تعملوه .. ما انا زي ما انتوا عارفين .. غلبااااااان

قالولي بس المكنة مش موجودة دلوقتي .. قلتلهم وبعدين طيب الشباك مفتوح ولا مقفول .. قالولي لا اطمن مقفول

بعد شوية العربية طلعت قلت للفني اللي ماسك الورشة المكنة البايظة فين .. قالي لا المكنة طلعت مش بايظة

معلش حصل لخبطة كده .. قلت في نفسي الحمد لله .. وقلتله طيب تقيلة ليه .. قالي هنراجع عليها واقولك

بعد شويه قالي المشكلة مش في المكنة المشكلة إن السمكرة اللي في الباب كانت مش مظبوطة فالجريدة بتاعة المجرى بتاعة الزجاج بتضغط عليه وهو نازل وطالع فبتخليه تقيل

قلت طيب ممكن نصلحه هنا .. قالولي هانخلي مهندس السمكرة يشوفها

بعد كده دخلوها عند بتاع السمكرة وقعدت شوية وبعدين سألت ايه الأخبار؟

قالولي إن العيب طلع مش من السمكرة .. قلت يادي الدوووووووووخة يا ولاد .. أمال العيب من إييييييييييييييييه ؟!!!

قالولي العيب من الزجاج نفسه .. استغربت وقلتلهم ازاي؟؟؟

قالولي الزجاج الأصلي بيكون فيه انبعاج بسيط .. لكن اللي راكب فيها الانبعاج بتاعة أكبر من اللازم عشان كده بيحك في الجريدة بتاعة المجرى وهو نازل أو طالع

بصيت على الزجاج وقارنته بالزجاج الأصلي بتاع التلات أبواب ولقيت فعلا في فرق واضح واتأكدت إن فعلا هو ده التشخيص السليم للمشكلة وإن الزجاج لازم يتغير خوفا على المكنة

طيب الزجاج الأصلي موجود عندكم .. قالولي أي نعم .. قلتلهم بكام .. قالولي بـ540 جنيه غير الضريبة و المصنعية

راح حبيبي خالد زيزينيا أو إن شئت فقل خالد موبيل1 أنقذني من الحيرة وقالي غيره عند د.جريش في العاشر في المصنع نفسه .. وعندهم أنضف حاجة وأرخص بكتيييير

قلتله خلاص الموضوع ده عليك .. انت اللي هتسأللي عليه .. قالي خلاص ويوم ماتروح قولي عشان آجي معاك

وبصراحة الراجل متأخرش وبعتلي رقم التليفون

بس أنا ماتصلتش وفوّت اسبوعين وقلت أسأل الأول عندنا في أم الدنيا طنطا عندنا في محل حلو كده روحت سألت هناك الزجاج ده موجود ؟ قالولي أيوه .. قلتلهم طب الوضع كذا كذا فالزجاج اللي عندكم وضعه إيه؟ قالولي هيعجبك بإذن الله وهنجرب الأول قبل مانركب .. قلت ماشي طيب بكام؟ .. قالب بـ190 جند ..قلت قشطة بالمهلابية .. طيب ركبوه .. قالي انت جاي متأخر والساعة دلوقتي 9 بالليل وقربنا نقفل والصنايعية تعبانين طول النهار تعالى بكره الصبح الساعة تسعة وههانشتغل فيها على طول

فوّت أسبوع وروحتلهم الساعة 10 إلا ربع الصبح .. قالي انت جاي بدري والصنايعية كانوا تعبانين طول الليل

قتله يا عم الحاج انت قولتلي تعالى 9 الصبح وانا جيت 10 .. "أما الطنطاوية دول عليهم حركات" ..قالي طيب 5 دقايق أروح أجيبه من المخزن

جاب الزجاج وجربناه وطلع زي الفل وركبه وقالي متشغلهوش لمدة يوم ونص لحد السيليكون ماينشف

قلتله الحساب كام؟ قالي الزجاج بـ125 ومشبكين بـ15 يبقى 140 و10 جنيه من عندي للصنايعي

هاتقولي مش كان بيقولك 190 .. أقولك بطل أر بقى ياعم الحاج هتبصلي في الـ65 جنيه اللي ربنا بعتهوملي :)

قعدت يومين وكان آخرهم أول امبارح عشان كده اتأخرت في كتابة التقرير لحد دلوقتي لما أشوف النتيجة الأول

جربت الزجاج لقيته تمام والمشكلة انتهت بأقل الخساير والحمد لله

أما انطباعي بالنسبة للصيانة وللزيت فبإذن الله هاقولكم عليها لما أفضى بعد انتخابات مجلس الشورى والإعادة

خلاص خلاص ياعم أنا باهزر

بصراحة أنا حاسس إنه عادي يعني لأن العربية ماكنش فيها مشاكل فماحسيتش بفرق كبير

والزيت بردو ماحسيتش بفرق يذكر .. بس يمكن يكون السبب لأني أنا اللي مابحسش :)

فعلا الفروق اللي انتوا بتتكلموا عليها دي عمري مابحسها مش عارف ليه .. أنا بركب وادوس وخلاص

والجدير بالذكر إنهم حطولي 3.5 لتر زيت .. فقلتلهم كده كتير بعد القياس بالمقاس يا أيها الناس

وأنا زي ماحكيتلوكم قبل كده وبردو زمانكم نسيتوا –مش عارف إيه الزهايمر اللي شغال معاكم ده- ملسوع من موضوع زيادة الزيت ده مع توكيل طنطا اللي كانو حطولي 4 لتر وروحت وجيت كذا مره وبعد مناقشات ومداولات وحوارات واشتغالات وصلناه لتلاتة لتر

فطبعا اللي يتلسع من توكيل طنطا ينفخ في أوتوإيجيبت

ومن الجدير بالذكر أيضا إن العمدة بتاعنا كان مغير زيت هناك وكانوا حطوله 3.5 بردو قلتله طب قيس كده وقاس وفعلا لقاه زايد ومعدي

وبعد مناقشات ومراجعات وعطيات وجملات جابوا المرجع الرئيسي اللي عندهم عاللاب توب ولقوا إن الكمية المظبوطة من 3 الى 3.3 لتر

صممت وأصريت .. ووقفت وألحّيت إنهم ينزلوا الـ200 مل الزيادة .. وهما الصراحة متأخروش وقالولي تحت أمرك

وفعلا بعدها مستوى الزيت بقى مظبوط .. وروحت البيت وأنا مبسوط

ويارب عقبال الصيانة الجاية .. وياترى مين اللي يحب يجي معايا !!!!!