الطمي يا أم أحمس !! غطيني و صوتي !!
ابو الهول بقاله كام سنة قاعد بيحرس الاهرامات
..؟ كتير اوي .. فوق الاربعة الالاف سنة .. و الراجل ان جينا للحق شغال ليل نهار ولا عمره زوغ عشان يروح يقابل الجيرل فريند بتاعته .. ولا عشان يروح يقعد مع الفراعنة صحابه في الكرنك كوفي شوب .. و تيتا حتشبسوت راضية عنه و بتدعيله ليل نهار .. ندر عليا لو جبت مجموع كبير في الثانوية العامة يا واد يا ابو الهول و شرفتنا و دخلت معهد خدمة اجتماعية كدة لا ابنيلك هرمين كمان جنب اهرامات العيال خوفو و خفرع و منقرع .. و ماله يا ام سقنن رع .. و ماله يختي .. خللي العيال تنبسط .. و كمان الراجل كان مثال للتفاني و الاخلاص في العمل .. فأي موظف دلوقت اما بييجي يضحي في الشغل .. بيضحي بماهية يوم .. يومين بالكتير .. يضحي بساعتين زيادة يقعدهم في الشغل .. ابو الهول بقي ضحي بمناخيره .. ما اعظمها تضحية .. هيا دي التضحيات ولا بلاش .. تقدر انت تضحي بمناخيرك ؟ تخيل نفسك كدة من غير مناخيرك .. و لكن معقول كل السنين دي ابو الهول قاعد كدة مزهقش .. هوا صحيح جسمه جسم اسد .. انما راسه راس بني ادم .. و راس البني ادم دي طبعا بلوة سودة .. و لذلك ابو الهول به من الادمية ما يكفي ليزهق من القعاد كدة ليل نهار .. و لكن الواضح لنا ان ابو الهول مكسوف .. اكيد مكسوف يطلب اجازة .. مش معقول انا لسة جديد في الشغلانة مبقاليش عشر الالاف سنة .. و اطلب اجازة كدة .. الناس تقول عليا شاب "سيس" ولا ايه .. و مش بعيد خوفو يخصملي تلات الالاف سنة ولا حاجة .. انا عارفه مفتري .. و انا ورايا مصاريف و بلاوي متلتلة .. اشتراك نادي الصيد و مصاريف اخواتي اللي في جامعة 6 اكتوبر .. و البت هاميس عروسة النيل اللي خطبتها من خمسة الالاف سنة و اهي قاعدة علي بال ما الاقي حاجة ايجار جديد نتجوز فيها .. و طبعا طول منا شقيان علي لقمة العيش هيا قاعدة فاضية موراهاش حاجة و ماشية علي حل شعرها .. و رشدي اباظة كان هيعلقها مني في الفيلم .. بس انا مسكتش .. ستر ربنا كان لسة ابيه رع محولي خمسة جنيه .. رحت مديها ميسد .. كنسلت عليا .. عارفة نمرتي بنت اللئيمة .. رحت مكلمها من الشارع عشان متعرفش النمرة .. ايوة يا بت يا صايعة انتي .. ايه مش هنعرف نلمك ولا ايه .. كل شوية نجيبك من مقبرة في قبلي .. من معبد في بحري .. حصلت رشدي اباظة كمان ! الشغل ده مياكلش معايا .. و رحت قافل في وشها و طالب 122 علي طول .. و بوليس الاداب الفرعوني عمل كبسة عليها في بيت رشدي اباظة و العقيد اتون علي اتون دخل عليها و كلمها بالهداوة .. بالذوق كدة مش عايزين شوشرة احنا عندنا ولاية برده .. عودي يا هاميس .. و يوميها علي طول .. خدت اول بيجو و رجعت علي طيبة .. امال .. متقدرش تكسرلي كلمة .. انا راجل حمش .. اقول يمين يبقي يمين اقول شمال يبقي شمال .. انا زمان كان ليا شنب يقف عليه الصقر .. لولا نابليون الله يجازيه .. طير مناخيري فا مبقالوش لازمة الشنب .. و امون الصغير ( ده قريب محمد الصغير من بعيد ) جه حلقهولي .. و بعدين القعدة هنا بصراحة مش جايبة همها .. المرة اللي فاتت جت سليمة .. ان كان علي مناخيري تهون .. انما مين عالم ممكن يحصلي ايه بعد كدة .. خصوصا ان طول النهار بلاقي ناس اجانب جايينلي مخصوص عشان يصوروني و يتصوروا معايا .. اما خلاص بقيت حاسس اني خالد النبوي .. و بعدين الجو هنا حر و هما بيبقوا لابسين من غير هدوم و انا بتكسف يا جماعة .. و الاقي الواد و البت بتاعته راحوا بايسين بعض كدة فجأة و اكن انا كيس جوافة قاعد .. و العسكري ولا بيكلمهم و بيروح بس يتشطر عالواد و البت المصريين اللي بيفكروا لسة انهم يمسكوا ايدين بعض .. و بيعملهالهم قضية "فكر" فاضح في الطريق العام .. و كان فيه بت فرنساوية كدة عمالة تغمزلي و تبصلي من ساعة ما جت .. و انا اهلي فراعنة و ممكن يقطعوني .. المصيبة ان لاقتها عارفة كل حاجة عني و عن عيلتي كلها بنت الايه .. جاية من اخر الدنيا عشان تشوفني بس .. و ولاد بلدي .. تلات تربعهم مكلفش خاطره و جه في زيارة كدة و دخل عليا ببطيخة ولا حاجة في الحر ده .. عليا النعمة لو سألتهم انهي ملك من ملوك الاهرامات التلاتة اللي عينني في طقم السيكيورتي بادي جارد للاهرامات .. اقطع ديلي لو ما نصهم تنحلك .. انا لازم اطلب اجازة و استريح شوية بقي .. يا جماعة انا و عيلتي عملنا اللي علينا و زيادة و عشنا زماننا خلاص .. مش كل بقي ما يسألوكوا علي مصر تقولوا الاهرامات و ابو الهول .. عايزنكوا انتوا تعملوا حاجة تشرفنا زي ما احنا مشرفينكوا في كل حتة .. ماهو مش معقول لو البت الفرنساوية اللي بتعاكسني ليل نهار دي جت و سألتني عن مصر كدة بعد ما عدينا سنة 2000هقولها ايه ؟ انا و الاهرامات ؟! .. انتوا عايزين المزة تفتكرني عبيط ولا ايه .. لالالا .. حالكوا مش عاجبني اليومين دول خالص .. ايه ده .. شباب هايف .. مخدرات .. فساد .. يا خرابي .. الطمي يا ام احمس .. غطيني و صوتي ..نفسي كدة اما نجيب سيرة مصر بدل ما ييجي في الدماغ صورة بروفيل ليا و انا في الشغل ( بحرس الاهرامات التلاتة .. معلش ماهو ده اكل عيشي ) .. ييجي صورة لبلد كبيرة كدة متحضرة فيها صناعة و زراعة و صناعة و اعلام علي مستوي عالي و شباب عنده هدف و طموح و بيبص لمستقبل جميل .. و ناس بتشتغل بجد دكاترة و مهندسين و محاسبين و عمال و فلاحين و حتي فواعلية و بياخدوا علي قد ما بيدوا .. انا زهقت من كتر ما بتجيبوا في سيرتي بصراحة .. كل ما حد يسألكوا عن مصر تقولوله ابو الهول ! هوا مفيش غيري يا ظلمة ! طب وروني بقي هتعملوا ايه .. انا هاخد اجازة و اروح اريح اعصابي في مارينا .. مش كتير .. قيمة الف .. الفين سنة كدة بالكتير .. اما نشوف هتعملوا ايه
ملحوظة : ده كان مقال نشرته في جريدة الدستور من فترة من منطلق اللعب علي نغمة التاريخ المشرف و نسيان الواقع المهبب
