اريد معرفة افضل سيارة مستعملة فى رنج من 30000ل35000
وهل اختار فيات سينا ام هيونداى اكسل
عرض للطباعة
اريد معرفة افضل سيارة مستعملة فى رنج من 30000ل35000
وهل اختار فيات سينا ام هيونداى اكسل
لا وجهه مقارنه بين السيينا والاكسيل
اللى نجح الاكسيل ان قطع غيارها رخيصه جدا لكن ليست معمره بتاتا وطبعا الشعب عاوز ارخص حاجه فأغلب الناس اشتريتها وبقى كل الصنايعيه فاهمين فيها فعشان كده تيجى تكلم اى حد يقولك طبعا الاكسيل
لكن لما تسأل حد فاهم يعنى ايه عربيات حيقولك الفيات تكسب سواء سيينا او تيمبرا او بونتو
الف شكر يا باشا انا متحير جدا لانى اول مرة اشترى عربية وزى ما قولت عاوز حاجة محترمة فى رنج من 30ل35 بحيث لما اجى ابدل بردو ما اخسرش فيها
طب طلباتك ايه فى العربيه اللى انت عاوزها واستخدامك ايه وعاوز قطع الغيار نظامها ايه ؟؟؟؟
وخلى بالك عشان تجيب اكسيل كامله باور وتكيف وازاز كهربا 1500 حتعمل اكتر من 35 لو نضيفه لان اللى معاه العربيه دى ونضيفه بيحط رجل على رجل وهو بيبيعها وبيتنطط لكثره الطلب عليها لان الحاله الكويسه منها نادره شويه عشان صاجها ضععيف جدا
بس الميزه عند اعاده البيع حتتباع بسرعه معاك برضه لكثره الطلب بس الله اعلم الايام مخبيه ايه العربيات كل يوم فى حال
انا عاوز اجيب عربية يعنى ما اعدش اصرف عليها وقطع الغيار تكون متوفرة والاستخدام استخدام شاب يعنى خروجات وسفر وكده بس مش ههلكها اوى يعنى
كيا برايد
!!!!!!!!!!! الراجل بيقول اكسيل ولا سيينا تقول كيا برايد :36_1_2[1]:
ده الاكسيل برقبتها بالرغم من ان ال 2 كورى
هى الكيا برايد فيها تكيف وباور و1400 او 1500 او 1600
ولا البرايد ثباتها اقوى من الاكسيل او السيينا عشان يسيبهم ويختارها هههههههههههه
لو هو بيتكلم على عربيه فى فئه اوائل العشرينات كنا قولنا كيا برايد ممكن تنفع لكن فئه الثلاثينات حرام حرااام يسيب كل اللى فيها ويركب برايد
انا عاوز حد يدينى الزاتونة الفيات سينا اشلها من تفكيرى خالص يعنى
وحد يعرف حاجة عن سيارات المعاقين
والله انا حر اقول اللى اقوله وبقى الاكسل برقبة البرايد دا ايه الحلاوة ديه وهيا بقى لما تجيب برايد سيدان نظيفة بتبقى فى العشرينات دى فين ديه والبرايد فيها تكيف وباور وفتيس اوتومتيك كمان انت كلامك ده جيبه منين
لا تعليق بصراحه على كلامك
وباور البرايد اللى حضرتك بتتكلم عليه ده مش موجود فى مصر لو باظ فى التوكيل ب 5000 جنيه الاسكاترا فقط وحيجبهولك مخصوص لانه مش موجود برضه
والكلام ده مش كلامى ده كلام ملاك كيا برايد معانا هنا فى المنتدى
ياريت لما حضرتك تنصح حد تبقى تعرف ان النصيحه دى امانه مش كلام وخلاص وتقوللى اقول اللى انا عاوزه
ده على كده بقى ممكن لما اشوف حد بينصح عضو هنا فى المنتدى انه يحط عود كبريت فى تانك العربيه المفروض اسكت عشان ميقولش انا حر اقول اللى انا عاوزه بقى
الراجل بيتكلم على سيينا وفى قسم الفيات داخل تقول كيا برايد !!!!
يعنى انت يا باشا شايف الهيونداى الاكسل او الاكسنت افضل خيار وافضل من الفيات سينا
انا مقولتش كده خالص على فكره بس اقل عربيه ممكن تركبها فى الفئه السعريه دى وحتريحك هى الاكسيل
بص لو انت حاصر نفسك بين الاكسيل والسيينا فأنا حقارن بينهم بسرعه وانت تختار
الاكسيل عربيه مبنيه اصلا على اللانسر العيون صفيه والاكسيل قطع غيارها رخيصه تقريبا زى ال 128 او اغلى قليل مثلا وده مخلى اغلب الطبقه المتوسطه اللى هى اغلب الشعب بيحبها وبالتالى فيه منها كتير والصنايعيه بيشتغلو فيها كتير وبيفهمو فيها وخصوصا انها كاربراتير مش انجكشن فصيانتها مش معقده لانها مفيهاش حساسات ولا كمبيوتر ولا ضفيره معقده
وعيوبها ثبات مش حلو خالص خالص بعد ال 100 وصاجها وحش جدا جدا ونادرا لما تلاقى واحده صاجها مفهوش تعريجات والكابوت مفرود كويس لازم حتلاقى الكبوت مموج لان صاجها خفيف
وزنها برضه خفيف جدا يعنى لو ماشى على طريق سفر لازم تاخود بالك كويس
نزل منها موديلين 1300 و 1500 ال 1500 افضل طبعا وخصوصا انها كامله تكيف وباو وازاز كهربا بس حتلاقى اللى معاه واحده نضيفه طالب فيها فوق ال 35 الف وطبعا ده سعر مبالغ فيه بس هو ده حال السوق المصرى
من مميزات الاكسيل ان صالونها واسع لكن الشنطه ضيقه شويه والتابلوه والصالون مش حديث يعنى تحس انها عربيه من التمانينات مش منتصف التسعينات
ومتنساش ان الاكسيل تعتبر بدايات الهيونداى لان انت عارف ان الهيونداى والعربيات الكورى عامه لسه بقالها 10 او 12 سنه بتصنع عربيات يعنى كانت العربيات دى بدايه لها فى الاسواق وبتجرب لسه مش زى شركه فيات اللى بقالها اكتر من 50 او 60 عام بتصنع عربيات
نيجى للسيينا
من تصميم شركه فيات الاوروبيه الغنيه عن التعريف طبعا بس هما حبو يصممو عربيه تغزو الاسواق الدول الناميه وفى نفس الوقت سعرها يبقى معقول فحبو يصنعوها فى الدول الناميه واتجمعت فى تركيا والبرازيل ومصر وتقريبا الهند
على فكره هى اسمها اصلا 178 نسبه الى السياره 128 اللى عملت طفره كبيره فى عالم السيارات
السيينا نجحت فى اغلب الدول وخصوصا البرازيل ولكن فى مصر حققت نجاح ولكن مش زى بره وده راجع لسوء توزيع وتسويق للسياره
العربيه نزل منها اكتر من فئه ال 1400 العاده والبلاس وال 1600 البلاس
العربيتين تقريبا واحد ما عدا الاختلاف فى فرش الابواب وسعه الموتور والمفتاح المشفر والجنوط ال 14 فى ال 1600 لزياده الثبات والاسبويلر الشنطه
العربيتين كاملين تكيف باور ازاز كهربا امامى ولكن البلاس و ال 1600 فيها سنتر والعاديه لا والبلاس وال 1600 عزل الصوت والكبوت فيها اكتر من العاديه يعنى تقعد جوه وتقفل الشبابيك وتبقى منعزل تماما عن العالم بره
السيينا مميزاتها انها قويه وعاليه عن الارض انسى انها تحك معاك فى مطب من مطبات مصر شنطتها واسعه جدا يعنى ممكن تحط فيها خروفين او عجل صغير ههههههه وكمان الكنبه مممكن تتنيها وتفتحها على الشنطه ويبقى معاك نص نقل
العربيه سواء ال 1400 او ال 1600 سريعه وممكن تجيب بيها 160 او 170 وممكن اكتر فى ال 1600 ده طبعا فى حاله ان العربيه تمام
العربيه زى اى عربيه اوروبيه موصفات الامان فيها عاليه جدا جداااا اهم شيء حمايه الركاب فى حاله حدوث حوادث لاقدر الله وفيها مفتاح لفصل البنزين اتوماتيك فى حاله حدوث حادثه تلاشيا لحدوث حرائق
كذلك فيه منها عربيات مواصفات اضافيه فيها abs وايرباج (على فكره هى بتنزل بره اساسى فيها الكلام ده لكن الوكيل هنا فى مصر شاله وخلاه بالطلب عشان يوفر تمنهم )
قطع غيارها زى اى قطع غيار فيات يعنى تعتبر زى الشاهين وتشترك معاها فى بعض قطع الغيار ولكن الفوانيس مثلا تعتبر اغلى شويه والباقى عادى زيه زى اسعار قطع غيار الكورى
طبعا السيينا ال 1400 مونو انجكشن يعنى رشاش واحد بموتور قوه 67 حصان تقريبا وال 1600 انجكشن كامل 4 رشاشات بقوه 105 حصان يعنى تعتبر سياره رياضيه عائليه
عيوب السيينا انها حساسه ومش اى حد يلعب فيها زيها زى الالمانى والاوروبى وطبعا عربيه انجكشن يعنى كمبيوتر وحساسات وضفيره وطرمبه كهربا وكده فلذلك يفضل ان اللى يشتغل فيها يكون فاهم هو بيعمل ايه ويكون شغال فى الفيات الحديث
الصالون فخم جدا فى السينا بلس او فى ال 1600 ولكن يعيبه ان الكنبه الخلفيه ضيقه بعض الشيئ
العربيه ثباتها معقول جدا جدا وصاجها تقيل ووزنها اكتر من طن و 40 كيلو وده ميزه وعيب فى نفس الوقت ميزه لانه عامل ثبات للسيياره وعيب لانه بيقلل من التسارع
العربيه زى مقولت عاليه جدا عن الارض وده برضه ميزه وعيب ميزه زى مقولت انها فى المطبات وشوارع مصر حتريحك ولكن عيب انها فى السرعات العاليه بعد ال 120 او 130 الثبات حيقل شويه ولكن يمكن التغلب على العيب ده لو حضرتك غاوى سرعات عاليه
اظن بعد كل الكلام ده مفيش كلام وادامك مميزات وعيوب الاتنين تقدر تختار منهم اللى يريحك
على فكره لو عاوز تقارن السيينا صح يبقى تقارنها باللانوس او النوبيرا
مع العلم ان تمنها زيرو كان زى النوبيرا واغلى من اللانوس زيروووو
لكن للاسف سعر اعاده بيع الكورى اغلى لانه عليه طلب اكتر فماسك سعره شويه عن الاوروبى
هى دى ثقافه السوق المصرى وطبعا العيب راجع للتوكيلات
يعنى فيات دى لو توكيلها راح لغبور او منصور شوف حتبقى عامله ازاى فى مصر
اولا انا متشكر ليك جدااا
بس انت ليه بتقول الاكسل هى تفرق ايه عن الاكسنت
ولو عربية دايو لانوس ممكن تعمل كام
عشان اشرحلك الفرق بين الاكسيل والاكسنت واللانوس الكلام حيطول وحنخرج بره الموضوع خالص
احنا هنا فى قسم الفيات واغلب اللى حيردو ومنهم انا حيبقى حافظ الفيات وحيرد عليك اكتر فى الفيات
لو عاوز مقارنه يبقى فيه قسم للمقارنات فى المنتدى ممكن تعمل موضوع فى قسم المقارنات
ومن غير متعمل موضوع ولا حاجه اعمل بحث وحتلاقى الاجابه على سؤالك فى مواضيع كتييييييير لان السؤال ده اتكرر اكتر من مره
وربنا يوفقك فى اختيار الصحيح
يوجد سينا 1400 لون ازرق 4زجاج كهرباء تكيف بور كاسيت سنتر عداد 110الف ك للتواصل م/اسلام 01091067167
السلام عليكم جميعا أولا .. ياريت أشارك معاكوا في موضوع السيينا ولا الاكسل ده علشان بصراحة انا واحد من الناس اللي لف كتير اوووي:penguin4: وسأل أكتر والدنيا خربانة معايا يعني من الاخر:crashcomputer4: هههه .... هاقول حاجة واحدة بس بالنسبة لموضوع اعادة البيع للسيينا اني لما نزلت سوق السيارات 27-1-2012 لاقيت أكتر عربية اتباعت في السوق كله هيا السيينا (اكتر من 3 عربيات في اليوم ده لوحدة حتي الPETRA اتباعت) وكنت مستغرب جدا:confused: اشمعني يعني دي اكتر عربية عليها الطلب ده كله ؟؟؟؟ ، أقولك بمنتهي البساطة علشان هي أرخص عربية فيها معظم المميزات اللي أي مصري يحبها من أول سعرها ، مرورا بقوة شاسيها ، وماتورها القوي رخيص قطع الغيار ( ملحوظه مهمه جداااا ال1400cc بس) ، ووسائل رفاهيتها وشكلها الجميل اللي يناسب الشباب والأسر في نفس الوقت.... بمعني...... كنت مقتنع بيها جداااا من فترة كبيرة بس من كتر ماسألت لاقيتهم قالولي ان اللانسر أو الصني (الياباني عموما) تعتبر أحسن عربيات في مصر فلما بدأت أدور عليهم لاقيتهم أغلي بكتير من السيينا وقطع غيارهم بردوة تعتبر ، ولما سألت على الأرخص قالولي الأكسل أو الدوجان بس كشكل عام مش ممتعين اوي وتحس بردوة انهم عربيات قديمة شوية
.................. خلاصة الكلام علشان انا صدعتكم :36_2_49[1]: السيينا فيها مميزات كتير جداااااا لعربيات مختلفة الجنسيات والاسعار والاذواق ...... شخصيا وبعد لف أكتر من 4 شهور بدور على سيينا (على قد فلوسي ) ومش بشغل بالي بأي كلام تاني عن اي عربية تانية:coming-soon[1]:
وليه ما بتدورش على السينا ال1600 سى سى
والدوجان محدش فكر فيها لية انا معايا دوجان وحمااااااااارة شغل بغباء وحلوة جداااااااا
سعر الدوجان عامل كام تقريبا ومواصفتها ايه
اولا ارحب بيك وكويس اني موجود عشان كنت عاوز انصحك بلدوجان لانها معايا ومجربها من شهر 7 لحد النهردة وتقريبا فهمتها بنسبة كبيرة وسعر الدوجان دلوقتي حدود من 30 ل 33 تلاقي النضيف منها بس اهم حاجة الحاله ركز في دي
قولي انت اية نظامك في العربية وعاوز الدنيا تبقي عامله ازاي ومشاويرك فيها اية وانا اقولك كل حاجة اقدر افيدك فيها
انا عاوز حاجة تكون شكلها شبابى يعنى بحب الخروجات واكيد ممكن اسافر بيها
علشان ال1600 حوضها أضيق (هو مش أضيق ولا حاجة ولكن الموتور كبير في الحوض) فبتقرف الميكانيكية في اعطالها وتصليحها ، يعني مثلا كنت بكلم واحد بالصدفة كان عنده 1600 وباعاها قالي انه علشان يفك الريداتير بس فك الاكصدام وفك الفوانيس وحاجات تانية كتير كده ، ده غير سير الكاتينة لما حب يغيرة ليه تظبيط كده معين قعد يشرحهولي وقالي ان مش اي حد يعرف يظبطة ، ده غير قطع غيار الموتور الغالية ، انما ال1400 تقريبا هو نفسة موتور الشاهين ... لو انا مش غلطان
لا أنكر ان الدوجان عربية ممتازة -ان جاز التعبير- بحسب ماسمعت وقالولي ، والدوجان بالتحديد اكتر من الشاهين والفرق بينهم التقفيل وبردوة الكماليات لو انا مش غلطان ..... بس اللي يفرق الدوجان عن السيينا الشكل العام ( ده رأيي الشخصي) ... يعني انا شايف ان السيينا تنفع جميع الاذواق شبابية جداااا وايضا وقورة ومحترمة ، انما الدوجان في شكلها حتى لو اتروشت تلاقي دمها تقيل ..... بس مش مهم الشكل خالص جمب اساسيات العربية ، يعني لو حد قالنا على فرق جوهري بين الدوجان والسيينا في العفشة أو الشاسية أو حتي الموتور طبعا ممكن أغير رأيي للدوجان ... بس لحد دلوقتي على ماسمعت السيينا تكسب