الموضوع: تقرير صيانة 10000 للشارك فى المصرية لاصدقائى الشاركوية

الحمدلله النهارده عملت صيانة ال10000 لعربيتى شارك 2009 فى المصرية اللى فى قليوب انا نزلت الساعة 7 ونص الصبح كده ووصلت الحمدلله الساعة 9 ونص دخلت استقبلنى رجل الاستقبال شخصية ظريفه اوى ومحترم قلتله صيانة ال10000 قلى طيب ادخل بالرخصه وطلع امر الصيانة وكده قلت اوك دخلت وخرجت بالورقه خدها منى حطها على التابلوه وفحص العربية كلها من الداخل والخارج وقلى 5 دقايق المهندس يجى ياخدها جه واحد شاب كده خد العربية ودخلها قسم الصيانة ....... العربية دخلت عند الكهربائى الاول وانا بصراحة بحب ادخل اشوف ايه اللى بيحصل فى العربية ومبقدرش اعد فى الاستراحة رغم ان ده ممنوع ووقفت اشوف الكهربائى وهو بيكشف على كل حاجة وبعدين لقيته بيقولى حضرتك عندك فردة كلكس بايزة قلتله نعم ازاى !!!!!!!!!! قلى شوف حضرتك وفعلا فرده شغاله وفرده يايزة وصوتها وحش اوى قلتله طيب غير الفرده بكام قلى 220 جنيه قلتله لا سيبها متغرهاش قلى هى خليجى صح قلتله لا مصرى ضمان مصرية قلى طيب كده ممكن تتغير فى الضمان وخد منى كتيب الضمان وغيرها .......... حصل بس موقف قلت اقولكم عليه دخلت عربية شارك ورايا بشوية ولقيت الكهربائى بيغير فردة الكلكس برده فروحتله قلتله هو فيه حاجة فى كلكس الشارك قلى حضرتك العربية دى بتنزل بجوز كلكسات وحشين جدا ومبعدوش وبيبوزوا علطول ونصيحة ابقى غيرهم بره قلتله شكرا على النصيحة ...........المهم نضف فلتر التكييف و كل حاجة وطلعت دخلت للعفشه والميكانيكا طبعا انا كان معايا زيت ليكوى موكلى 5w40 خدته اديته للمهندس وقلتله ايه رايك فى الزيت ده قلى احسن من موبيل بكتيير جدا واعد يسالنى جايبه منين وكده وكل اللى يدخل من العملاء يسالنى المهم قلت للفنى اللى بيربط العفشة على الطقه اللى بسمعها من العجلتين اللى قدام ساعات وقلى هشوفها لحضرتك وبعدين قلى حضرتك العجلتين تمام بس الصوت طبيعى انه تسمعه ساعات ميقلقش وعشان يختفى بنركبله حاجة اسمعها ( جيوب مساعد ) قلتله اوك ركب وربط العفشة تمام ورجلش الفرامل وكشف على التيل و كله تمام الحمد لله نزل العربية وحط الزيت وغير الفلتر طبعا ده فنى الميكانيكا و بعد ماخلص تمام دور العربية ماشاء الله فرق شاسع فى صوت الموتور عن موبيل طبعا الفرق ده عن صوتها وقت محطيت موبيل فى صيانة ال 1000 مش وقت منزل عشان اى زيت جديد هيفرق فى الصوت بس فرق كبير بين الاتنين وقت متحطوا و خرجوا العربية قلولى هتغسلها قلتلهم لا و دخلت طبعا اطلع الفاتورة وادفع فى الخزنه اعدت ساعة الا ربع مستنى الرجل اللى بيطلع الفاتورة مع انه رايح جاى قدامى بس كل مسال يقلولى جاى اهو :S طبعا التنظيم هناك مش اد كده خالص وطلعت الفاتورة ببص فيها لقيت 150 جنيه مصنعية وفلتر 65 و قطع غيار ( الجيوب ) 5 وضريبة 22 كله 242 جنيه قلتله انا معايا استكر المنتدى والمهندس طارق زويل كان قايل انه فيه خصومات على المصنعية ضحك كده ضحكه غريبه وقلى ده كان زمان :S قلتله لا ده لسه قايل كده قريب الايام دى قلى والله اطلعله قله :S بصراحة اتقفلت من الاسلوب وانا كمان كنت مستعجل مع انى كان نفسى اشوف الرجل المحترم اللى بجد مبيتاخرش عن حد المهندس طارق وانا عارف انى لو كنت طلعتله اكيد كنت خدت الخصم بس للاسف كنت مستعجل اوى ..... المهم وانا خارج قلت اسال كده على كلبسات الاكصدام الامامى والكارتيرة اخد فكرة دخلت مخزن قطع الغيار سالت الراجل اللى جوا قلى لا الكلبسات بتطلع مع الاكصدام قلتله عامل كام قلى 2600 جنيه !!!!! والخلفى 2500 !!!!!!!!! والكارتيرة 260 !!!!! اسعار خيالية بجد ...

المهم خدت الرخصه وكتيب الضمان وورقى و شيكت على العربية عشان بحب اطمن على كل حاجة بنفسى وركبت ومشيت الحمدلله طبعا فرق السحب ماشاء الله بعد الزيت(ليكوى مولى ) صوت الموتور ماشاء الله فرق شاسع عن موبيل والاستهلاك اقل سنه عن الاول بس ان شاء الله بعد فترة هقولكم عامل ايه معايا برضه زده كان يوم الصينة الشاق انا راضى عنه بنسبة 80 % الشغل كويس بس المكان هناك مش فيه تنظيم لو مخدتش بالك من عربيتك ممكن حاجات متتعملش حاجة تتقلب كده يعنى وشكراااااااا يارجاله اتمنى اكون فيدتكم بحاجة

الله يبارك فيكم يارجاله مبدئيا من الايام القليلة اللى بعد الصيانة الزيت احسن من موبيل فى الصوت والسحب والاستهلاك انا مستنى امشى عليه شوية واعملكم تقرير ان شاء الله