السلام عليكم يا رجالة رينو

عندى موضوع مخلينى محتار علشان مش عارف سببه

دلوقتى الوالد عنده عربيتين لوجان ... واحدة 2011 فول اوبشن ... والتانية 2012 بلاك لاين (الاتنين عربيتين شغل وبيتعرضوا لنفس الظروف)

العربية القديمة عاملة لحد دلوقتى حوالى 52 الف كيلو ... والجديد 20 الف

المشكلة فى ان موتور العربية الجديدة تقيل اوى وسحبه اقل من العربية القديمة مع انى بحس عزمة اعلى ( يعنى بطلع بيه من بعد المطب على الغيار التانى عادى )

انا من خبرتى للوجان ... عارف ان موتورها تقيل ورخم ومحتاج ان تضغط عليه جامد علشان يبدا ينطق معاك .... وانا فعلا من ساعة لما اللوجان الجديدة عدت ال10 الاف كيلو بقيت بحرق على الغيارات كل ما تجينى فرصة علشان الموتور يتفتح .... وسافرنا بيها شرم رايح جاى ومتوسط السرعة حوالى 140 ووصلت بيها لسرعة 190 وبرضه ولا كأنى عملت حاجة

العربيتين تقريبا اتعرضوا لنفس ظروف التشغيل ... الفرق الوحيد ان العربية القديمة جاتلى فترة وكنت بدرفت بيها وفصلت بيها اكتر من مرة بس مش كتير

دلوقتى بقى ايه العمل ؟؟ ... انا لما بنزل من القديمة وبركب الجديدة وامشى بلاقى صوت الموتور اعلى من القديمة والسحب اقل ... صوت على الفاضى

اروح التوكيل بالاتنين ولا اعمل ايه ؟

ياريت لو حد عنده حل يقوللى اعمله

وشكرا