بسم الله الرحمن الرحيم
قلت اعرض تجربتي الصغنتوته يمكن ( يمكن ) حد يستفيد
كنت مركب كاوتش GT اندونيسى بصراحه كتر ألف خيره فضل شغال معايا في العربيه حوالي 80000 كيلو ومحدش يكومنت بس نظرا للظروف الماديه مكنتش عارف اغير الكاوتش لغاية م الكاوتش طق طق من الجوانب وبدأ السلك يبان والكاوتش اتقطع
الحمد لله ربنا كرمني أخيرا بفلوس ونويت أغير بقي علشان الواحد ميضمنش ايه اللي ممكن يحصل وسألت كتييير ودخلت ع النايل موتورز الجـــــــــــــامد جدا بأعضائه المشكورين لمجهودهم الرائع ورسيت علي البريدجستون My-01 بس للآسف تايلندي كان نفسي أجيب الياباني بس الحمدلله علي كل شئ
طبعا كان عندي حدفه شمال و صوت الزلط بيسّمع في ... قلبي وكان فيه دبدبه جامده جدا ولو كنت ماشي علي 120 ومعدي من جنب عربيه بحس بالهوا بينقل العربيه من مكانها
طبعا بعد تغيييير الكاوتش حسيت بفرق شاســــــــــــــع ومشيت 150 ولا الهوا والحمد لله
طبعا غيرت الكاوتش في توتال المعادي اللي علي الكورنيش تقريبا في 10 دقايق بدون مبالغه والناس هناك محترمين جدا والراجل اللي هناك قالي تيجي كل شهر ... شهر ونص تعمل تشيك ع النيتروجين وكل 10000 تعمل روتيشن فور فري وطبعا ضمان 4 سنين ضد عيوب الصناعه
كنت هنسي سعر الفرده 490 جنيه بس بصراحه تستاهل
آسف لو كنت طولت عليكم