الموضوع: بتعملوا ايه كصدقة طريق؟

يمكن تكون حاجات تافهه وليست ذات قيمه اللي باعمله ده لكن أشعر براحه نفسيه لما باعملها.

أولاً بحب جداً على قد ما أقدر اسيب فرصه للناس تعدي من قدام عربيتي وقدر الامكان بحاول اقف كتير لئني ساكن في مدينة نصر وباعدي شارع الاتوستراد او النصر ده يومياً كذا مره وفي كل مره باحتسب نفسي شهيد ان شاء الله من كتر ما الشارع ده مرعب في التعديه وراح فيه ضحايا كتير وما زال والله المهم يعني باحاول قدر الامكان افتح فرص كمان للناس تعدي من قدامي وباشعر بمدى الثواب اكتر والله العظيم لما اللي ورايا يكلكس كتير او ممكن يشتم كمان !

ثانياً باحاول قدر الامكان تكون النعمه اللي ربنا انعم عليا بيها سبب في ثواب لي مش نقمه عن طريق اني طول مانا ماشي في الطريق وشايف جنبي ناس مزنوقه في ميكروباص ولا اوتوبيس او واقفين في الشارع والحر تاعبهم افضل ادعيلهم ربنا يعوضهم خير وينعم عليهم من نعيمه سبحانه وتعالى ويقدرهم يشتروا عربيات ويعينهم على ظروفهم الصعبه .

حاجه كمان بحاول اواظب عليها مع انها كتير من حضراتكم هيشوفها تفاهه الله أعلم مره كنت واقف في اشاره وعلى يميني اتوبيس وناس كان الله في عونهم فوق بعضهم فانا مش عارف حسيت بحرج شديد من نفسي اني قاعد لوحدي في عربيه وتكيف الحمد لله ومرتاح كتير مقارنه بيهم فا بجانب الدعاء اللي ذكرت اني باعمله الحمد لله قلت اقفل المكيف وكفايا عليا نعمة اني قاعد مرتاح لوحدي في عربيه مش لازم كمان يكون في تكيف يعني ..........والله يا جماعه مع تكرار الموضوع ده زمان كنت بيجيلي احساس ان الناس اللي بره العربيه تتمنى لي كل سوء وكنت باقول اكيد منهم اللي هايحسد او على الاقل هيكون مش مبسوط لم هو واقف في موقف زي ده وانا في موقف رفاهيه وراحه .......بعد الموضوع ده بقيت احس براحه نفسيه وكلي فخر اني اتصبب عرقا واستنشق من الدخان والعوادم ما لذ وطاب زيي زيهم......ومع ذلك طبعاً مش كل مره باعمل كده لكن اوقات كده باحب اعمل كده حتى لو كان خطأ او مالهوش لازمه.

الحاجه التالته في كائن بشري دائم التواجد في الشارع المصري ولا حول له ولا قوه وهو عسكري المرور اللي بجد لا يملك اي شيء مش هاقول اني باساعده لكن كل اللي بعمله اني احترمه على قد ما اقدر ولو صادف انو مد ايده عشان الاشاره ووقفت جنبه لا مانع ابدا اني ادعيله دعوتين يهونوا عليه وقفته دي شويه او اقوله حتى ربنا يكرمك .........ابتسم حتى في وجهه واشكره لما يفتح الاشاره واحترم وقوفه وتعبه لئني بجد باشوف حاجات غريبه بتحصل للعساكر دول والمشكله ان بجد هم لا حول لهم ولا قوه .

الحاجه الرابعه هي اني على قد ما اقدر بحاول ماردش الاساءه بإساءه ودي حاجه والله بتشعر الواحد بكبرياء كده واحترام للذات كبير لئن اذا استطعت انت ان تملك نفسك وتحجم غضبط فا قوتك اضعاف قوة المسيء لك والله وياسلام لو هو مش محترم وشاور او عمل اي حاجه وانا امتص ده وابتسم او اقوله حاسب يا راجل يا طيب وخلاص !

انا مش عارف فضلت اكتب وتقريباً شكلي كده طلعت بره موضوع حضرتك يا استاذه علا يمكن كمان كل اللي قلته ده يندرج تحت اي حاجه غير صدقة الطريق اللي موضوع حضرتك عنه لكن مش عارف والله .

عاوز أقول في النهايه بس ان هي سبل الواحد بيتخذها ارضاءاً لوجه الله سبحانه وتعالى أولاً ثم للنفس ونحسبها سبب للجزاء والثواب من عند الله ان شاء الله.

الله يفتح عليك يا استاذ رامي و يكتر من امثالك.
...........................
و بعدين يا علا حتستسلمي بدري كده مره الناس بيزمرولك و مره بلاعات و انهارده جايه تركني العربيه هو انت لسه شفتي حاجه ههههههههههههههههه.
لا اصمدي شويه لو علي كلامك بقي و الغيبه و الحاجات دي محدش حيركب عربيه في مصر خالص.

أفكار حلوة جدا يا جماعة :)

ان شاء الله لما ابقى باسوق كويس ابقى أنفذ اللي أقدر عليه فيهم.