مشكلة مع تعلية الصوت

**mstool** · 02-02-2012 07:41 AM

انا جبت دلوقتى كاسيت سونى 500 جديد نضيف يعنى و موصل علية جى ام سونى 600 بيدى 60*4 ار ام اس (فعلى)
و انا موصل علية اتنين بس يعنى مستعمل اتنين اتشانل فقط
و السماعات اللى متركب عليها الجى ام اللى هيا بايونير 6973e
اللى هيا بايونير القديمة ام رق ازرق دية و معايا بقالها بتاع سنة كانت شغالة من غير جى ام و هيا الار ام اس بتاعها 80 و الجى ام مديها ستين يعنى زى الفل على ما اسمع لية بقى المشكلة بعد ما بعلى الصوت عشان انا بحب الازعاج اصلا الامبليفاير ينور النور الاحمر و يفصل لازم اقفل الكاسيت و افتحة تانى عشان السماعات تطلع صوت تانى
الجاين انا عاملة ما بين 0.3 و 0.5 يعنى اعلى من الصفر بربع او اقل كمان
و الصوت مش بيبقى عالى اوى يعنى اللى هوا يطرش اللى اعد ورا لا بيبقى طبيعى يعنى 30 او 35 من 50 اغانى بيفصل عند 34 و اغانى ساعات يفصل عند 37 و ساعات لحد 39 ميفصلش غير بعد مدة
كلام البياع اللى ركب الجى ام و الكاسيت ان السماعات ضعيفة عشان كدة بتفصل
الصوت مش اللى فى دماغى انا عايز النقاء مع العلو النقاء موجود شويتين بس مش مع العلو يعنى اللى بسمعة من بعض العربيات
فهل السماعات اللى عندى دية عشان شغالة بقالها سنة او اكتر ممكن يبقى كفائتها قلة و مش مطلعة المطلوب يعنى زى ما قال !!!!!!
و العلو دة هسمعة لما اشترى مثلا سماعتين كمان يبقوا اربعة سماعات ولا مش بتفرق فى العدد بتاع السماعات
انا اسمع ان ممكن يكون السلك
(هو يفرق اوى كدة !!!!!)
ولا عيب من اية بزبط
و اية موضوع انى اعلى الجاين بتاع الجى ام و اوطى من الكاسيت ولا اوطى الجاين و اعلى الكاسيت بتفرق فى حاجة دية او فى تاثير او وضع معين اعملة
انا رغيت كتير بس للاسف عشان انا ابيض فى الليلة دية

**mody_mt2007** · 02-02-2012 11:04 AM

كدة سلك الباور بتاع الجى ام مش تمام يعنى هات واحد 3 ملم شعر السويدي و وصلة للجى ام من البطارية مباشر و خلى الأرضى بردة نفس السمك من جسم العربية و ان شاء الله الدنيا هتتظبط معاك ووطى جين الجي ام شوية

**ahmedeihab** · 02-02-2012 11:09 AM

اللى قالك ان اللبايونير ضعيفه ده واحد مبيفهمش اولا
بعد كده حاول توطى البيز بتاع الجى ان لو انت مشغل بيز فى السماعات
علشان هى نسبه و تناسب يا تعلى التربل و توطى البيز او العكس
و كمان حاول ان الجى ام يتظبط ضبطه واحده تمام
و باقى التحكم كله من الكاسيت
قبل كل ده انك تبقى واخد فرده للجى ام عمومى من البطاريه محمله مع العلم ان لو البطاريه ضعيفه و العربيه دايره
هتلاقى نور التابلوه مع البيز بيضعف و انت مشغل الكاسيت لان الجى ام بيسحب كهرباء جمده لازم تبقى بطاريه عشره على عشره
و حاول ان البيز يبقى اقل من نقاء الصوت بمعنى ان لازم نقاء الصوت يبقى هو العالى علشان تستمتع
انا عندى فى العريبه ماشاء الله
2 صب وولف فى بازوكه و بازوكه جى بى ال و 2 جى ام و 4 سماعات بايونير و وصلات بايونير اصلى و سماعات باب بايونير و كاسيت بايونير 4050 و سراوند فى جميع انحاء العربيه
و الكلام ده انا اللى بوصله بنفسى مش شغلى يعنى يدوب اقف عند واحد صحبى كده فاتح محل اكسسوارات و اركب كل مسمار بأيدى
حاول اولا تجتهد على نفسك علشان ميتعملش عليك شغل
تانى حاجه راجع وصلت الكهرباء و الارضى و الاشاره بتاع الجى ام كويس اوى
وطى البيز من السماعات و على التربل
اتأكد ان البطاريه بتاعتك كويسه
وصل سلوك السماعات صح فى الجى ام
و ساعتها هتلاقى الصوت اتعدل معاك تمام و بقا احسن من اللى الراجل كان عاملهولك
و انا تحت امرك فى اى حاجه

**mstool** · 02-02-2012 03:53 PM

المشاركة الأصلية كتبت بواسطة ahmedeihab

اللى قالك ان اللبايونير ضعيفه ده واحد مبيفهمش اولا
بعد كده حاول توطى البيز بتاع الجى ان لو انت مشغل بيز فى السماعات
علشان هى نسبه و تناسب يا تعلى التربل و توطى البيز او العكس
و كمان حاول ان الجى ام يتظبط ضبطه واحده تمام
و باقى التحكم كله من الكاسيت
قبل كل ده انك تبقى واخد فرده للجى ام عمومى من البطاريه محمله مع العلم ان لو البطاريه ضعيفه و العربيه دايره
هتلاقى نور التابلوه مع البيز بيضعف و انت مشغل الكاسيت لان الجى ام بيسحب كهرباء جمده لازم تبقى بطاريه عشره على عشره
و حاول ان البيز يبقى اقل من نقاء الصوت بمعنى ان لازم نقاء الصوت يبقى هو العالى علشان تستمتع
انا عندى فى العريبه ماشاء الله
2 صب وولف فى بازوكه و بازوكه جى بى ال و 2 جى ام و 4 سماعات بايونير و وصلات بايونير اصلى و سماعات باب بايونير و كاسيت بايونير 4050 و سراوند فى جميع انحاء العربيه
و الكلام ده انا اللى بوصله بنفسى مش شغلى يعنى يدوب اقف عند واحد صحبى كده فاتح محل اكسسوارات و اركب كل مسمار بأيدى
حاول اولا تجتهد على نفسك علشان ميتعملش عليك شغل
تانى حاجه راجع وصلت الكهرباء و الارضى و الاشاره بتاع الجى ام كويس اوى
وطى البيز من السماعات و على التربل
اتأكد ان البطاريه بتاعتك كويسه
وصل سلوك السماعات صح فى الجى ام
و ساعتها هتلاقى الصوت اتعدل معاك تمام و بقا احسن من اللى الراجل كان عاملهولك
و انا تحت امرك فى اى حاجه

والله ما عارف اشكرك ازاى انتا راجل محترم
بس انتا فهمتنى غلط حتة
الصوت مش وحش اوى كدة بس مش اللى فى دماغى مش جايب الدور الرابع يعنى :d
لما بعلى بيفصل و انا معرفش المفروض يفصل عند كام لما كان معلى هو الجاين على الاخر فى الاول كان عاملة كان بيفصل الامبلفاير عند صوت كاسيت 20 مثلا انا وصلتة يفصل فى حدود ال 35 انا عايز علو بس هو بسم الله ما شاء الله نقى جدا عن قبل الجى ام يعنى و متقسم و كل تفصيلة صوت فى الاغنية بقت بتظهر بس مش بعرف اعلى
لان اللى اعرفة الجى ام مدى السماعة اقل من اللى بتشتغل بية ب 20 ار ام اس فالمفروض انا اعلى براحتى و السماعة هيا اللى تخروش لا السماعة بتبقى سليمة و الجى ام بينور الاحمر و يفصل لازم اطفى الكاسيت و اولعة
هو انا ممكن اكون بتكلم فى حاجة طبيعية بتحصل بس معرفش اية الصح و الغلط
و انا موصلتش لدرجة انى اعمل التوصيلات يعنى بس انا امبارح اتعلمت منة 75% من التركيب بتاع الجى ام بس اخاف اعملها لوحدى اوصل توصيلة غلط اضرب كهرباء العربية او الجى ام
و انا حسيت انة بيعمل شغل بس انا عندى سؤال لو جبت سماعات عايز سماعات اقوى من البايونير القديمة دى كمان اجيب حاجة كينود 5 واى مثلا انا لسة عندى 2 تشانل فاضين فى الجى ام و عايز اشغلهم و اقوى الصوت فى العربية !!!!
و بطارية العربية سليمة 100% لسة متركبة من تلات شهور و مفيش اى مشاكل فى الكهرباء و نور العربية مش بيتاثر خالص مهما عليت الصوت لحد لما بيفصل و حتى بيرعش مع ضرب البيز اعتقد كدة الكهرباء سليمة ؟؟؟

**rotanamasoud** · 02-02-2012 06:35 PM

اللمبه الحمرا لما بتقيد دى بروتكشن حمايه من حاجه غلط بتحصل يعنى ممكن احتمال الاسلاك ضعيفه ومش شايله الاحمال صح او السمعات ملفتها حمصت فلما بتسخن بتعمل لود بيفصل الجى ام اه نوع العربيه ايه لو الاونو مش حتاخد بيز غير على بازوكا لان شنطه الهاتشباك مبتظبطش بيز عن تجربه فى 3عربيات 127 وستروين وعند صحبى اونو ركبنا جى ام على الاتنين البيضاوى اللى ورا الصوت عادى خالص ولا كانك مركب جى ام ومش فارق عن الكاسيت بسبب عدم احكام بوكس السمعات فى الهاتش باك لاكن بنفس الجى ام بنفس الواط على بازوكا اصبح الصوت خرافى والبيز لا يطاق

**ahmedeihab** · 02-02-2012 07:04 PM

المشاركة الأصلية كتبت بواسطة mstool

والله ما عارف اشكرك ازاى انتا راجل محترم
بس انتا فهمتنى غلط حتة
الصوت مش وحش اوى كدة بس مش اللى فى دماغى مش جايب الدور الرابع يعنى :d
لما بعلى بيفصل و انا معرفش المفروض يفصل عند كام لما كان معلى هو الجاين على الاخر فى الاول كان عاملة كان بيفصل الامبلفاير عند صوت كاسيت 20 مثلا انا وصلتة يفصل فى حدود ال 35 انا عايز علو بس هو بسم الله ما شاء الله نقى جدا عن قبل الجى ام يعنى و متقسم و كل تفصيلة صوت فى الاغنية بقت بتظهر بس مش بعرف اعلى
لان اللى اعرفة الجى ام مدى السماعة اقل من اللى بتشتغل بية ب 20 ار ام اس فالمفروض انا اعلى براحتى و السماعة هيا اللى تخروش لا السماعة بتبقى سليمة و الجى ام بينور الاحمر و يفصل لازم اطفى الكاسيت و اولعة
هو انا ممكن اكون بتكلم فى حاجة طبيعية بتحصل بس معرفش اية الصح و الغلط
و انا موصلتش لدرجة انى اعمل التوصيلات يعنى بس انا امبارح اتعلمت منة 75% من التركيب بتاع الجى ام بس اخاف اعملها لوحدى اوصل توصيلة غلط اضرب كهرباء العربية او الجى ام
و انا حسيت انة بيعمل شغل بس انا عندى سؤال لو جبت سماعات عايز سماعات اقوى من البايونير القديمة دى كمان اجيب حاجة كينود 5 واى مثلا انا لسة عندى 2 تشانل فاضين فى الجى ام و عايز اشغلهم و اقوى الصوت فى العربية !!!!
و بطارية العربية سليمة 100% لسة متركبة من تلات شهور و مفيش اى مشاكل فى الكهرباء و نور العربية مش بيتاثر خالص مهما عليت الصوت لحد لما بيفصل و حتى بيرعش مع ضرب البيز اعتقد كدة الكهرباء سليمة ؟؟؟

كده يبقى كهربه العربيه سليمه
يبقى اكيد اللى انت رحتله ده واحد بتاع شاى معرفش يوصل الجى ام صح
اقولك انا تعمل ايه
هتفك سلك السماعات من الجى ام
و تحط سماعه سماعه و لما تلاقى الصوت بقا حلو يبقى كده السماعه راكبه صح و هكذا فى السمعتين
و بلنسبه للسماعات يبقى هتجيب بايونير تايلاندى من توكيل بايونير الجوز ب 450 جنيه و 400 وات
جرب كده اللى انا بقولك عليه ده و بعدين ارجع قولى ايه اللى حصل

**mstool** · 03-02-2012 03:14 AM

هو انهاردة اتزبط شوية يظهر اخد على الصوت العالى اكتر من امبارح و انا وطيب البيز شوية و حلو هيا مشكلة واحدة انا عايز ازبط الايكولايزر ال 7 باند دة على السونى لانى مش عارف فية حاجة مش بحس فرق لعبت فية كتير اوى و صعب جدا انى ازبط كل باند مع التانية عايز وضع حلو لية البيز حسب الاغنية لو بيزها نضيف و انا مراعى اكيد ان البيز مش بيطلع من سماعات زى الصب او البازوكا طبعا دة مفهوم بس هو اظاهر عشان تزبيط الصوت عندى محتاج موضوع سماعتين زيادة الصوت مش وحش بالعكس الصوت حلو جدا و افجر بكتير من قبل كدة بس مش اللى فى دماغى
دلوقتى المشكلة برضة اللى لسة مش عارف يا احمد باشا هيا ان المفروض اعلى براحتى ميحصلشى حاجة للامبليفاير و يفصل صح ولا طبيعى لما اعلى جامد لازم يفصل !!!!!!!
عشان لو مش طبيعى اصلا هبدا اغير فى الوصلات بقى
و انا شاكر ليكوا جدا و حاسس انى بزهقكوا بس دية اخر حاجة عايز اعرفها طبيعى ان الجى ام يفصل ولا كدة يبقى الوصلات !!!

**m7mda7md** · 03-02-2012 11:22 AM

لو عاوز تزود سماعات اوعي تجيب البايونيير ال 500......ال 400 التايلاندي جميله و الكينوود ال 500 هتقضي علي ودانك سماعه ممتازه............نيجي للمشكله و هي الكاسيت.......ركز كده و صحصح.........لو صوت التريبل ال سامعه عاجبك يبقي تمام أما لو حاسس انه مزعج هتعمل الآتي........هتشغل الكاسيت و تدوس دوسه طويله علي بكره الصوت هتطلعلك قايمه دور فيها علي HPF freq‏ ‏ و اعمله ‏off..........خد لفه كمان ف نفس القايمه و دور علي loud‏ و اعملها on‏ كمان لفه و هات lpf freq ‎‏ و خليه 80.......اخرج من القايمه دي و دوس دوسه عاديه علي نفس البكره dm+ تشغله لما يكون عندك اغنيه التريبل بتاعها تعبان هتلاقيه جابلها تريبل من عنده اما غير كده تقفله عشان ميبقاش الصوت مزعج.......Rb enh ‎ده بيشغل السماعات الخلفيه كأنها صب و بما انك عاوز صوت يجيب الدور الرابع خليها أوف.......فاضل ال eq7 خليها ‏custom و بعدها ‏settings و اول باند مثلا خليها 2 او 3 و ال بعدها ‏2 و سيب 3 و 4 اصفار و باند 5 خليها واحد و باند 6و 7 خليهم 3.........جرب الدنيا دي و قولي النتيجه......ف حاله انك مش هتعلي و عاوز تعمل دماغ بصوت مش عالي اوي بس مظبوط هتغير الباندات كده......باند 1 5 و باند 2 4 و باند 3 -2 و باند 4 -3 و باند ‏5 1 و باند 6 3 و باند 7 ‏4‏ و لو حسيت الصوت مخنوق زود ‏6‏ و ‏7‏ او ‏6‏ بس واحده كمان

**ahmedeihab** · 04-02-2012 01:09 AM

المشاركة الأصلية كتبت بواسطة mstool

هو انهاردة اتزبط شوية يظهر اخد على الصوت العالى اكتر من امبارح و انا وطيب البيز شوية و حلو هيا مشكلة واحدة انا عايز ازبط الايكولايزر ال 7 باند دة على السونى لانى مش عارف فية حاجة مش بحس فرق لعبت فية كتير اوى و صعب جدا انى ازبط كل باند مع التانية عايز وضع حلو لية البيز حسب الاغنية لو بيزها نضيف و انا مراعى اكيد ان البيز مش بيطلع من سماعات زى الصب او البازوكا طبعا دة مفهوم بس هو اظاهر عشان تزبيط الصوت عندى محتاج موضوع سماعتين زيادة الصوت مش وحش بالعكس الصوت حلو جدا و افجر بكتير من قبل كدة بس مش اللى فى دماغى
دلوقتى المشكلة برضة اللى لسة مش عارف يا احمد باشا هيا ان المفروض اعلى براحتى ميحصلشى حاجة للامبليفاير و يفصل صح ولا طبيعى لما اعلى جامد لازم يفصل !!!!!!!
عشان لو مش طبيعى اصلا هبدا اغير فى الوصلات بقى
و انا شاكر ليكوا جدا و حاسس انى بزهقكوا بس دية اخر حاجة عايز اعرفها طبيعى ان الجى ام يفصل ولا كدة يبقى الوصلات !!!

باشا متقولش كده هما عاملين المنتدى ده علشان الناس تتعلم من بعضها
و انا بتعلم من ناس و بعلم ناس يعنى هى ساقيه و ماشيه
الامبلفير مهما عليت مش بيفصل
راجع بس على السلوك يا اما الامبلفير محمل حاجه زياده
او سلك الكهرباء ضعيف او الارضى بتاعه
راجع على الدنيا دى هتلاقى كل حاجه زى الفل

**Midooooooo** · 04-02-2012 09:52 PM

معلش انا عندى مشكلة ارخم موصل جى ام 350 سونى وسماعتين بايونير 500 على كاسيت كينوود اول لما اعلى الصوت فوق 20 كاسيت يطفى ويشتغل تانى لوحدو ولازم اوطى الصوت وواخد ارضى 4 ملى من بطارية مباشر و2 ملى من كاسيت للجى ام يبا عيب ايه انا روحت ل 2 معرفوش يعملوا