الموضوع: حصريات قسم نيسان .. معلومات واخبار عن نيـسان جــوك اللى حتنزل رسمى من الوكـيل

معلش يا أستاذ أحمد أنا عندي معلومات مختلفة شوية عن العربية دي ، حسب ما شفتها في الخليج .. و قد تختلف المواصفات في مصر ،، بس أنا أعتقد إنها هاتنزل بمواصفات متقاربة في كل البلاد و الله أعلم

أولاً العربية مش متجمعة في إنجلترا .. العربية ياباني 100% صناعة و تجميع
ثانياً الجنوط 17" مش 16" بس غالباً ده في الفئة التانية والأعلى بس
الستارت إنجن في الفئة الأعلى فقط ،، و نفس الكلام في فتحة السقف

أضيف لكلامك إن العربية نازلة ب 6 إيرباج "ستاندرد" ، فيها خاصية "تيربو" اللي بترفع قدرة المحرك من 117 إلى 190 (ده في الفئة المتوسطة و الأعلى فقط) يعني المحرك الـ 1600 ممكن يشتغل كأنه 2400 cc

كل الفئات فيها إيموبليزر و abs
الفئة الأعلى المفروض تنزل بخاصية تدفئة الكراسي ...

دي المعلومات اللي عندي من الكوتيشن اللي أخدته من توكيل نيسان في قطر من حوالي شهرين

للأسف الشديد .. الموقع بتاع نيسان بيقول إن الفئة الأعلى بتنزل بكاميرا خلفية و gps ... لكن توكيل النيسان في قطر بيقول إن الحاجات دي "أوبشنال" يعني لو عايز تضيفها شخلل جيبك.

يعيب العربية سعرها المرتفع جداً جداً جداً مقارنة بحجمها لأنها أصغر قليلاً من القاشقاي (حجمها تقريباً مقارب للسوزوكي sx4 لكن أعلى عن الأرض بكتير) سعر الفئة الأعلى هنا في قطر 99 ألف ريال = 158 ألف جنية مصري يعني لما تنزل مصر بالجمارك مش هتكون في رنج من 200-220 ألف و الله أعلم

اولا انا مبسوط جدا ان فى واحد نيساناوى زميل فى قطر الاخ التو و انا امبارح كنت فى توكيل نيسان الللى هنا فى قطر فى طريق سلوى اعلى فئه قالولى 100 الف و اقل فئه ب 75 الف
اعلى فئه فيها ستارت انجين و جنوط 17 و تربو دى اللى ب 100 الف و دى طبعا مش هتنزل مصر دى الخليجى اللى حد فى المنتدى شافها من كام شهر و اللى بيكتبوها على كونتاكت كار ب 220 الف
اما اول فئه هنا ف مش زى احمد باشا ما بيقول و كمان ب 75 الف هنا يعنى حوالى 170 الف فى مصر يبقى الواحد احسن انه يشتريها من مصر و خصوصا ان الاوبشن اللى هينزل فيها فى مصر اعلى
انا امبارح رايح اركب القشقاى و اشوفها مع انى مش هشتريها من هنا عشان بتنزل 2000 سى سى بس شوفت الجوك قلت اركبها
انا كان معايا هنا ماكسيما 2005 و معايا دلوقتى اكس تريل 2007 هنا و اصحابى فى مصر اما نزلت اجازه كان معاهم فورد فوكس و هيونداى الانترا عايز اقولكم بعد ماركبت الجوك حسيت انى طول عمرى كنت بسوق و بركب توك توك
العربيه من جوه وهم و بجد فخمه جدا و كمان تحس انك راكب عربية سباق و مش ضيقه زى ماكنت متوقع و خصوصا من ورا فى الكرسى الخلفى انا رجعت كرسى السواق للاخر و ركبت ورا و كنت قاعد مستريح
هيا عربيه شبابى جباره و شكلها تحفه من بره عن القشقاى
ف من الاخر من وجهة نظرى
انت لو بتدور على عربية عيله و كبيره و تسافر بيها يبقى قشقاى اوتوماتيك اكيد
و لو بتدور على عربيه شبابى و شكلها من جوا فخم و تحس انك فى سباق يبقى الجوك
كده او كده انت مش هتطلع من نيسان
اخر ملاحظه الجوك احلى لونين فيها من وجهة نظرى الاحمر و الاسود و كالعاده شكر خاص لكبيرنا الاستاذ احمد باشا و الللى صراحه مغرقنا بجمايله

انا نسيت اقولكم يا جماعه ان اول فئه هنا فى قطر اللى ب 75 الف لا فيها كروز كنترول ولا اى دريف ولا فيها ستارت انجين ولا البلوتوث كل ده فى الفئات العاليه هنا فى قطر يعنى من الاخر اللى هيشتريها من مصر هيكون زى اللى اشترى اعلى فئه ام 100 الف فى قطر بس من غير التربو والجنوط ال 17 بس دول الاختلافين الوحيدين
كان نفسى اعمل تست درايف ليها هنا بس قطر مافيش الكلام ده عشان هنا نيسان تانى اكبر وكاله بعد التويوتا و بيبيعوا حوالى 100 عربيه فى اليوم عشان فى هنا عربيات فضائيه مش بتيجى فى مصر اسمها باترول و ماكسيما و التيما و باثفياندر المهم ان شاء الله لو حصلت معجزه و ركبتها مع اى حد هاقولكم على الانطباع بتاعى و يا ريت يا احمد باشا انا عارفك واصل تعمل تست درايف بسرعه و تقولنا الاخبار ايه و ماتنسناش فى تست درايف قشقاى اوتوماتيك