الموضوع: حصريا بالصور والمعلومات .. الان .. نيسان قاشقاى الاتوماتيك فى مصر رسميا وبـ175 الف بس

و الله يا جماعة انا حبيت اشارك جميع اعضاء المنتدى الرائع فى تجربتى و هى كالآتى:
نويت و عزمت و توكلت على الله اغير عربيتى و اجيب القاشقاى (بعد مقارنة عنيفة و بدقة مع الكيا سبورتاج)
اول مشكلة كانت ان اللى موجود كله مانيوال و انا زهقت من المانيوال عشان زحمت كل الطرق و بالأخص القاهرة-الاسكندرية الزراعى ... حاجة من بعد الكوابيس ربنا يعافيكو
و بقالى اكتر من سنة مستنى الاوتوماتيك ينزل و الحمد لله نزل و بدأت ادور و اشوف

تانى مشكلة الاستغلال الرهيب من كل المعارض و الوكلاء .. روحت عند المحمل قاللى تحجز بعشرة الاف و (ماجابش سيرة استكمال المقدم لحد 50000) و الاستلام فى 6/2012 و روحت عند السبع اوتوموتيف اللى المفروض انه من اكبر الوكلاء - و بعد
ما اتفرجت و مشيت كلمتهم فى التليفون و قالولى تعالى و الحجز برضو عشرة الاف (و طخيت المشوار من بنها الى النزهة) و بعد ما قعدت معاهم قالولى لأ احنا عندنا اقبال رهيب يا اما تدفع 50000 يا اما بلاش مع ان الكلام كان غير كده خالص فى التليفون
و الاستلام فى اخر 7/2012 بدل 6/2012 و مشيت وانا حزين على انعدام الضمير و كلمة الراجل اللى بتتغير 100 مرة فى اليوم
و اتصلت بالاحمدى موتورز - قالولى بلا حجز بلا بتاع خد من الجاهز بس زيادة 12000 اه و الله عندهم استلام فورى ب 187000 طبعا اخوكو جالو بله و عته و جنان و قولت متشكر مش عايز
اصل واحد ابن حلال كان ليه تجربه مع السبع و بعد ما حجز و استنى و عند الاستلام فاوضوه على 10000 جنيه زيادة بحجة ان سعر العملة اتغير و الاسعار زادت يعنى من الاخر تحجز و فلوسك معاهم يشغلوها
و برضو حتدفع زيادة و لو مش عاجبك خد فلوسك و دورك راح و ممكن حد يستلم بالسعر الفورى و الزيادة الاساسية
المهم لقيت اعلان بتاع اوتوايجيبت فى المنتدى و كلمتهم - بصراحة اول انطباع اخدته ان دى ناس اكتر من محترمة - ادب و اخلاق عاليه جدا و فاهمين العميل عايز ايه بالظبط
و احب اقول الناس كلها على الشخصية المحترمة أ/احمد المقدم مدير صالة العرض
و الراجل المحترم ده من غير حتى ما يعرف انا جاد فى الشراء و لا لا بيرد عليك بمنتهى الامانة و الصراحة و عندهم نفس القصة بتاعة الاسعار الزيادة بس المختلف عندهم ان العربية ب 190000 مش ب 175000 (استلام خلال 10 ايام)
بس الاهم انهم مش بيستغلوك و تحس انك مش واخد حاجة مقابل الزيادة
هما بيعرضو القاشقاى بلس و دى بتزيد عن الاوتوماتيك العادية اشارات فى المرايات و دفندرات امامية و خلفية تحفة و فرش جلد طبيعى اكتر من رائع
فلما تكون حتدفع 187000 مقابل ولا اضافة و حتدفع 190000 مقابل اضافات قيمة و تستاهل زى دى يبقى تاخد حاجة مقابل فلوسك

خلاصة الكلام اللى عايز يشتريها ما يعملش حسابه انها ب 175000 فورى ده نظام حجز ب 50000 و الاستلام بعد 3 او 4 شهور و ممكن جدا يدفع زيادة 10000 عند الاستلام (و غالبية الناس حتوافق مضطرة)
او استلام فورى ب 187000 (استغلال و استهبال)
او 190000 استلام فورى لموديل بلس مع الاضافات

و بالتوفيق لكل اعضاء المنتدى اللى عايزين يشتروها و ربنا يبارك لكل واحد فى فلوسه و عربيته اللهم امين