فحص سيارة وتجديد رخصة فى 25 دقيقة بدون واسطة .. إشى خيال يا ناس

وصلتنى رسالة من كام يوم عالموبايل من المرور إن تاريخ رخصة سيارتى هينتهى بعد 3 أسابيع ، إمبارح خلصت شغلى بدرى شوية فعديت عليهم ...

أى نعم تهت شوية فى البداية لإنى مش عارف النظام لكن بسرعة فهمت العبارة
خدت العربية فى تراك يعدى على كشك تدفع فلوس الفحص تاخد أوراق الفحص وانت فى السيارة
تعدى منه لتراك تانى (تختار واحد من 6 تقريبا) للفحص ، واقف فيه على التوالى فحص الكهرباء والهيكل يليه فحص السيارة على اسطوانات حديد ومطاط بتقيس قوة الفرامل وفرامل اليد واتزان السيارة على السرعات ثم فحص العادم ثم بتعدى على ممر فيه خندق قاعد فيه عامل بيفحص السيارة من تحت وكل اختبار ماعدا الأول والأخير يدار بالكمبيوتر

فى الآخر بعد دقيقة خدت النتيجة وختمتها من المهندس ورحت للمكتب اللى جنبه دفعت رسوم التجديد (بدون ضرائب ولا بتاع) ومشيت خمسين متر لمكتب الضباط وطلع لى الرخصة فى حوالى 10 دقائق ودا وقت طويل لأن الموظف اللى قبله افتكر إن عربيتى زيرو فكتب انى آخد نمر جديدة فاتعطلت زيادة 3-4 دقايق فأخدت وقت تقريبا أقل من نصف ساعة


نسيت أقول لكم إن دا فى مرور مكة المكرمة مش فى مصر

ودا طبعا لو قارنته باللى حصل معايا فى مرور بنها من رفع بصمة وانتظار فى العفرة وقرف العامل والمهندس والضابط وتفتيح المخ ورفع الملصقات والشنطة والمثلث والطفاية والخ الخ الخ و يومين تلاتة عطلة كاملة .... تحس إن فعلا الدول العربية متخلفة قوى قوى زى ما البعض ما بيقول!!!!!

يللا ... نصيب

هههههههه والله كنت هاصدق إنه في مصر

متقلبش علينا المواجع الله يخليك

الف مبروك يا د. أحمد على الرخصة الجديدة


طبعا انا عارف من اول الموضوع انها في السعودية



بس فعلا في نص الموضوع اتمنيت انك تكون رجعت مصر والكلام ده بقى في مصر

انا لسه كنت هسالك مرور ايه ؟

طلع برة مصر

بالنسبة لمصر بقى الخطوات في تجديد الرخصة هي كالتالي

1- لازم تصحى من 6 الصبح تبقى في المرور والا هتضطر انك تقف طابور الفحص وده طابور حاجة كدة خزعبلية

2- بعد ماتحجز مكان في الفحص لازم تستنى لحد مالخزنة ماتفتح عشان تجيب منها ورق نموذج الفحص ياما تشتريه من برة المرور بضعف التمن

3 - اهم حاجة الطفاية والشنطة والمثلث ولو معاك طفاية هيقولك مش شغالة ومنتهية الصلاحية

لازم تشتريهم والا مش هترخص ولو اشتريتهم ارميهم بقى بعد كدة مش مشكلة

4 - لازم ترشي مهندس الفحص والا هيطلعلك القطط الفطسانة في العربية

5 - بعد ماخلصت الفحص على خير هتبدا تروح تركن عربيتك برة ولازم تشربلك حاجة عشان تنسى اللى هتشوفه جوة المرور فيما بعد

6- نبدأ رحلة العذاب جوة المرور هتبدا تدخل جوة المرور وتسال تعمل ايه هتلاقي انك المفروض تجيب دوسيه وتحط الورق فيه ومش هتكتشف الدوسيه ده الا لما تقف طابور محترم وتمشي منه عشان تجيب الدوسيه

7- بعد ماتجيب الدوسيه وترجع تقف في الطابور تاني هتقدم الملفات بتاعتك وهتكتشف ان فيه دمغة المفروض تجيبها وهتروح تدفع الرسوم

8 - هتروح تدفع الدمغة بس بعد ماتقف طابور محترم في الخزنة

9 - ترجع تقف طابور تاني وتسلم الملف بتاعك وتستنالك بتاع ساعة ساعة ونص لحد ماينادو على الرخص

10 - تستلم رخصك وترجع البيت مش شايف قدامك

طبعا دي عشر خطوات غير شاملين دفع المخالفات والطوابير بتاعتها وانك تلاقي مخالفات في طرق انت عمرك مامشيت عليها اساسا

وكان الله في العون

ايه الاحباط دا !

انا مجرب تجديد الترخيص في السعوديه و عمل رخصه قياده خاصه
تقريبا عاملين فترتين عمل كمان

افتكر من فتره قريبه روحت مع والدي نجدد الرخصه بتاعت العربيه
وقفنا في طابور فيه عربيات كتير بس ف الاخر ماخدناش ساعه مع ان العربيه دخلت الفحص مرتين عشان الازاز مشروخ شرخ صغير و متصلح
المهم كمان من ضمن الاختبارات بيكشف علي اضائه الكشافات و ارتفاعها و قوتها و اضائه الانوار كلها

احنا يادوب بنسلم العربيه للعامل و بعدين فيه مكان مخصص للمشاه
علي ما تطلع النحيه التانيه تلاقي العربيه خلصت فحص و تستلمها مع ورق الفحص


انما في مصر رخصتي منتهيه و كل ما افكر اجددها افتكر الطوابير و الرشاوي و وجع الدماغ

الف مبروك يا دكتور انا في مرور المنطقة الشرقيه من ساعت ما دخلت لحد ما طلعت بالظبط 15 د (بس مشوار ساعة من البيت للمرور وساعة تانيه من المرور للبيت)

يارب اعيش لما اشوف مصر الرخصه فيها بتتجدد في ساعه كامله حتى مش 25 دقيقه انا ساعة التجديد في العربيه القديمه جددتها على يومين بسبب المخالفات اللي كانت في الدراسه وعلى الرغم من انهم كانو 20 جنيه فقط الا اني كان لازم اقف في طابور المخالفات .....الحمد لله . ربنا يصلح احوال مصر ...اميين

الف مبروك التجديد...

وفعلا الدول العربية متخلفة ومتجيش حاجة جمب مصر...دي حقيقة اي عيل صغير عارفها سواء في الدول المتخلفة دي او في بلدنا. ولو سألت اي واحد من اللي جددولك الرخصة هيقولك ان اللي علمه عربي وحساب ودين كلهم كانوا مصريين.....

السعودية بلد جميل ومنظم لكن بعقول خارجية ومفيش واحد ماسك منصب حيوي فيها كان سعودي...يعني ممكن ببساطة نجيب اجانب يمسكولنا البلد وهيمشوها ساعتها...هننبسط ساعتها ولا هنقول ايه؟

كمان مينفعش نقارن بين دول الفلوس فيها جاية من الهوا بدول تانية بتبني اقتصادها بنفسها وبأيد شعبها.....

نفسي الناس تبطل مقارنات جوفاء وتبطل احلام "اليقظة" وتعيش الواقع حبتين....وساعتها بس ممكن نبقى احسن من الدول دي.

والنبى يا جدعان محدش يفكرنى
فى مرور شبرا الخيمه مهندس الفحص طلع لى القطط الفطسانه فى العربيه وقاللى لازم تعمل طقم شمبر وتحل المكنه ومرضيش ياخد فلوس وما خلصتش غير لما رحتله بواسطه 0عميد من امن الدوله)
يعنى انا 3 ايام ماشى معاه قانونى وما خلصتش الرخصه
وبعدين نص ساعه كل الاجراءات خلصت وعلقت نمر وانا قاعد مطرحى وبشرب شاى كمان (لما جبت الواسطه)
بس ده كله ما يمنعش ان اللى جاى احسن انشاء الله

أول لما قولت ماسج جاتلك و6 حارات للفحص
قولت ده مش في مصر!!!!!!!!!!!!!!!
دي ناس منظمة وعندها
DataBase
صح
إحنا لحد النهاردة في ناس صاحية ليها شهادة وفاة
ولوقت قريب ناس ميتة كانت بتروح الانتخابات!!!!!!!!!!!!!!!!!!!!!!!!!

هههههههههههههههههههه ياراجل حرام عليك صحيتنى من عز نومى وكنت هقع من على السرير ياخساره يافرحه ماتمت اخدها الغراب وطار كان حلم جميييييييييييييل بتصحينى ليه

هههههههههههههههههههههه خضتنى

لما روحت انقل ملكية
وافحص و بخلص الورق الموظفة بتقولى هتعمل الرخصة بكام سنة
بقوله اكترحاجة عندكم اية قالتالى 3 سنين قوالتاله ماشى 3 سنين
علشان مجيش المرور تانى قلى بعد 3 سنين قالتالى من عنيا كانت قعده بتاكل جوافة خد منهاجوافية و قعد كالت الجوافة
غتتاته فالمهم روحت استلمةالرخصة وكانت الصدمة الرخصةبتصريح 3 شهور فارجعتالها بقولها بقولك 3 سنين مش 3 شهور
قالتالى هو احنا هنسيبك كدة بسهولة هو بمزجك مش لسةهنجيب الدوسية من المرور التانى فا 3 شهورحلوعليك هتجيلنا تانى

قعد اضحك انا و الحج قعد يقولى هى دى مصر وانا اقوله ياحبيبتى يامصر

سيبك انت ... ما فيش احلى من المتعة والراحة النفسية اللى الواحد بيحسها وهو واخد رخصتة من المرور بتاعه وعارف انه مش هيشوف الاشكال اللى هناك دى لمدة من الزمن .
دى طبعاً ميزة لانك مبتلاقيهاش فى مرور الدول الاخرى ..... لنــــــــــــــا الله .

و الله كنت هصدق
حرام عليك حسستنى ان البلد اتغيرت

25 دقيقة بدون مبالغة ده يعتبر وقت طويل مقارنة بالتجديد في أبوظبي

اول سنتين العربية ماليهاش فحص و التجديد بياخد 3 دقايق فقط و هي الوقت اللازم علشان تتطلع رسوم التجديد من جيبك و تديه للموظفة و هي علطول تطبعلك الرخصة

ثالث سنة بتروح تفحص السيارة و ده عشر دقايق بالكتير و بعدين تطلع علي الموظفة تطبعلك الرخصة

كل مرة اروح مرور أبوظبي لازم أقول عمار يا امارات

تعالى مصر ياباشا على شان تحب تسافر وتجيش تانى

يارب يبقى الى جاى احسن يارب

اقتباس:

---

المشاركة الأصلية كتبت بواسطة r0xer

الف مبروك التجديد...

وفعلا الدول العربية متخلفة ومتجيش حاجة جمب مصر...دي حقيقة اي عيل صغير عارفها سواء في الدول المتخلفة دي او في بلدنا. ولو سألت اي واحد من اللي جددولك الرخصة هيقولك ان اللي علمه عربي وحساب ودين كلهم كانوا مصريين.....

السعودية بلد جميل ومنظم لكن بعقول خارجية ومفيش واحد ماسك منصب حيوي فيها كان سعودي...يعني ممكن ببساطة نجيب اجانب يمسكولنا البلد وهيمشوها ساعتها...هننبسط ساعتها ولا هنقول ايه؟

كمان مينفعش نقارن بين دول الفلوس فيها جاية من الهوا بدول تانية بتبني اقتصادها بنفسها وبأيد شعبها.....

نفسي الناس تبطل مقارنات جوفاء وتبطل احلام "اليقظة" وتعيش الواقع حبتين....وساعتها بس ممكن نبقى احسن من الدول دي.

---

الله يبارك فيك
بس أنا مختلف معاك فى الاعتماد على موضوع إن اللى علمومهم مصريين
دا بالضبط زى الاعتماد على تاريخ الفراعنة وبناة الاهرامات فى استنتاج اننا الأفضل

أمريكا خدت الناس من كل مكان وبنت امبراطورية ، بلاد كتير عملت كده حتى لو مأعطتش الجنسية للناس اللى جابتهم
ولوتفتكر مترو الأنفاق كان شكله إيه تحت الادارة الاجنبية وبقى عامل إزاى دلوقت تعرف اننا لسه مش كويسين كفاية

الخلاصة إن كل واحد يتقدم بالطريقة اللى يقدر عليها ومنلومش اللى معاه فلوس انه استغلها صح انما نلوم اللى عنده عقول ودفنها أو طردها..

اسواء يوم في حياتى يوم تجديد الرخصة
حسبي الله ونعم الوكيل في الموظفين اللي معندهاش ضمير والرشوة عندهم كالماء والهواء

يااااااااااااااااه نص ساعه بحالها
عندنا هنا فى مصر الموضوع مايخدش اكتر من 5 دقايق وممكن ماتروحش بالعربيه كمان
وممكن انته اصلا ماتروحش والرخصه تجيلك لغايه البيت (دليفرى)
ولكن بشروط
لو ليك معرفه تقيله او تشخلل بقه عشان تعدى

ههههههههههههههههههههههههه ههههههههههههههههههههههههه هه
يارجل خضتنى انا قولت اروح ارخص العربيه اللى من شهر 10/2011 ورخصتها خلصنا عشان قرفان اروح واشوف المرور
واخرتها تطلع فى مكه الله يسامحك اهئ اهئ اهئ

مرور القوات المسلحة اعتقد افضل مرور فى مصر
بخلص تراخيص العربية فى ساعتين بالكتير قوى

يا جماعة انا يوم 24 يناير خلصت الفحص فى 10 دقايق فى مرور فيصل عمرها ماحصلت بدون ماادفع حاجة الا للى رفع البصمة ومكنش عايز ياخد كمان بس للحق كانت الشبابيك زحمة شوية والموضوع كله خد ساعتين من 9 صباحا حتى 11 ومعاملة الضباط كانت كويسة والله قلت دى بركات الثورة لكن برضه صعب نقارن مصر بالسعودية لاختلاف عدد السكان طبعا بس انا شفت ظاهرة غريبة شوية هنا فى المرور ان كل واحد رايح يرخص واخد معاه 2 ويمكن ثلاثة والاغرب واقفين معاه فى الطابور او جنبه كده عاملين زحمة على الفاضى

بشري
تقوم الان شبكة الاستخبارات و تكنولوجية المعلومات الخاصة بالمرور المصري بتحضير المناقصة الخاصة بميكنة المرور و التي تم عمل نسخة مصغرة منها بمرور السويس
و عليه ان شاء الله
سوف نستطيع جميعا الترخيص في اقل من ساعة باذن الله
ادعو بس ان الموضوع يكمل

أقول إيه طيب

لو مكنتش بحبك؟؟؟
بتشوف الواد أبوصلوحه هناك؟

الواد الكومبو الي بيغسل سنانه من ساعة ماتجوز ده؟

خضتنا يارجال قولت مصر اتغيرت ولا حاجة
طلع الحمد الله الى احنا فيه بنام فيه وبنصحى عليه

اقتباس:

---

المشاركة الأصلية كتبت بواسطة Kareem Fawzy

مرور القوات المسلحة اعتقد افضل مرور فى مصر
بخلص تراخيص العربية فى ساعتين بالكتير قوى

---

علشان العدد محدود

يانهارك ابيض خضيتنا ياجدع مش تقول انها في السعودية.... قال مسج وربع ساعه
في التاني السلامه يوم يومين و 3 كمان :)

اول ما قريت العنوان قولت في السعودية او الكويت او الامارات هههههههه
بس انا حاسس ان فيه أمل نبقي كده قولوا يا رب

http://www.nilemotors.net/Nile/268847-a.html

مش للدرجه ده يا جماعه مصر حتبقى كويسه ان شاء الله ربنا يصلح حالنا.....انا رخصت عربيتى وكانت زيرو في نص ساعه بالضبط وكنت مركب النمر وماشى في مرور النزهه ومحدش كان طلب مني بقشيش ولا حاجه عشان الورق يمشي وربنا يسهل ومصر تبقى احسن

اقتباس:

---

المشاركة الأصلية كتبت بواسطة osama1

مش للدرجه ده يا جماعه مصر حتبقى كويسه ان شاء الله ربنا يصلح حالنا.....انا رخصت عربيتى وكانت زيرو في نص ساعه بالضبط وكنت مركب النمر وماشى في مرور النزهه ومحدش كان طلب مني بقشيش ولا حاجه عشان الورق يمشي وربنا يسهل ومصر تبقى احسن

---

يارب يكون كده دايما بس زى ما حضرتك شايف دا استثناء يقع فى نطاق المعجزات حاليا فى مصر ونتمنى يكون النظام كله كده مش الاستثناء.

اقتباس:

---

المشاركة الأصلية كتبت بواسطة dr ahmed

يارب يكون كده دايما بس زى ما حضرتك شايف دا استثناء يقع فى نطاق المعجزات حاليا فى مصر ونتمنى يكون النظام كله كده مش الاستثناء.

---

ليه أنا كمان في النزهة رخصت العربيه زيرو في نص ساعة أيام المخلوع (بس كان معايا مخلصاتي) بس حتى من غيره مكنتش هتكمل الساعة

اقتباس:

---

المشاركة الأصلية كتبت بواسطة dr ahmed

طلع لى الرخصة فى حوالى 10 دقائق ودا وقت طويل لأن الموظف اللى قبله افتكر إن عربيتى زيرو فكتب انى آخد نمر جديدة فاتعطلت زيادة 3-4 دقايق فأخدت وقت تقريبا أقل من نصف ساعة

---

تؤ تؤ تؤ تؤ

ايه الاهمال الجسيم ده


ايه الوقت الطويل ده


اخص بجد ......


ههههههههههههههههههههههههه هههههههههههههههههههههههه باتتريق طبعا

اقتباس:

---

المشاركة الأصلية كتبت بواسطة r0xer

السعودية بلد جميل ومنظم لكن بعقول خارجية ومفيش واحد ماسك منصب حيوي فيها كان سعودي...يعني ممكن ببساطة نجيب اجانب يمسكولنا البلد وهيمشوها ساعتها...هننبسط ساعتها ولا هنقول ايه؟

كمان مينفعش نقارن بين دول الفلوس فيها جاية من الهوا بدول تانية بتبني اقتصادها بنفسها وبأيد شعبها.....

نفسي الناس تبطل مقارنات جوفاء وتبطل احلام "اليقظة" وتعيش الواقع حبتين....وساعتها بس ممكن نبقى احسن من الدول دي.

---

و هو التخطيط الاداري السليم او ال Business Process Reengineering بيكلف فلوس اصلا؟


يعني الاجراءات الادارية العقيمة في تجديد الرخصة تغييرها او اختصارها هيكلف فلوس؟


احنا اخترنا التخلف الاداري بمزاجنا ........ صباح الفل .......

ز زعلان أوي على 3 -4 دقائق بتوع طعطل النمر ...يا راجل ... بس انا عرفت انه أكيد مش في مصر من أول ما قال أصل جالي رسائل على الموبيل من المرور بتقولي الرخصة أنتهت ... ههههههههههههههههههههههههه ههههههههههههههههههههههههه هههههههههههههه

و الله هم يضحك و هم يبكي ... بس إن شا ءالله إن شاء الله مصر هتتغير و تخيل كده المرور بيبعت رسائل فعلا ... موضوع جامد جدا و ده اكتر حركة عجبتني .. و مش تريقة .. عجبتني علشان حسيت إن فيه إنضباط إللى وحشني في مصر أوي .
لكي الله يا مصر

هو ايه الي بتبني نفسها بايدها فين ده هي الرشاوي وعدم النظام وتزهيق الناس في عيشتهم هوده الدوله المكافحه ياراجل اتق الله

ومكة تعتبر زحام انا عملتها في اقل من 10 دقايق وبدون اي كلام العامل الفلبيني الفني مجرد بيجرب الكلاكس ويمسك فرامل ويشوف لمبات الفوانيس وخلاص
وبيوقفك بعيد عشان ما يكونش في شك في رشوة او اتفاق بيوقفك ورا سور حديد

برضو مرور المدينة كان بياخد نفس الوقت تقريبا خلاص الواحد نزل نهائي.

رخصة العربية لسة مجددها في شهر 8 اللي فات هنا في مصر قعدت 3 أيام.