[بالفيديو] تجربة الشد مع الانوس " lanos2004 " من 100 - 175 KM

**Ahmod** · 10-02-2012 10:41 AM

السلام عليكم ورحمة الله وبركاته

في الغالب متعود لما اشد مع عربية بكتب تقرير عن الموضوع في قسم تويوتا مش تباهي او تفاخر ولكن انا عن نفسي بحب شدة المواتير عشان الواحد على الاقل يكون على علم بقوة عربيته ولو عملت تعديل فيما بعد تعرف التعديل ده كان في محله وحسن الاداء ولا لاء

لكن الموضوع ده اصريت اني اكتبه هنا في قسم الدايو بعد ماشفت الموضوع التالي

http://www.nilemotors.net/Nile/270367-a.html

طبعا 8 صفحات تريقة ! واستهزاء ! وردود مش من المفترض انه تكون في موقع كبير زي نايل موتورز

المفروض لو فرضا واحد كتب موضوع وقال انه جاب وصل بعربيته لسرعة 300 كيلو متر في الساعة ! بدل مانكدبه نحاول نعرف منه التفاصيل

ممكن نطلب فيديو تسارع العربية بعدها نساله عن التعديلات اللى عملها وخلت عربيته تقدر توصل للسرعة دي

وبالتالي هنقدر نستفيد مافيش داعي لاننا نكدب بلعكس احنا هنا في نايل موتورز هدفنا اننا نستفيد من بعض ومن التجارب اللى كل واحد عملها

--------

عموما هحكي تفاصيل الشدة من اولها لاخرها

في اثناء مانا بتناقش مع الزملاء هنا في المنتدى بخصوص الفلتر الجديد اللى ركبته عندي

http://www.nilemotors.net/Nile/270000-k-n.html

اصطادني العضو

lanos2004

وانا بقول اني طلعت من الانوس قبل كدة على الدايري وقالي ايه رايك لما تيجي نشد مع بعض وتجرب مع لانوس تاني ؟

قلت في دماغي ايه المشكلة يعني انا من قبل حتى ماركب الفلتر وانا عارف ان الانوس ماتطلعش مني على اي سرعة

واكيد بعد الفلتر هيكون الوضع اتحسن

رديت قلتله مافيش مشكلة اختار الطريق وننزل نشد انا موافق

لقيته بيقول انه بيجمع من 0-100 في 9 ثواني

قلتله لالالالالالالالالاء استنى بقى عليا شوية

ماتفقناش على كدة لانوس ايه بالظبط اللى بتجمع في 9 ثواني دي ؟ ؟

انت متاكد ان عربيتك استوك ؟

قالي اه وراح باعتلي فيديو تسارع عربيته

شفت الفيديو ماصدقتش بصراحة قلتله لاء انت عامل حاجة في عربيتك ولازم تعرفنا انت عامل ايه عشان نستفيد

في الاخير فهمت انه الماتور اللى عنده 2 كامة بيطلع 105 حصان ! وده غير الماتور اللى بتنزل بيه الانوس هنا في مصر

قلتله لاء انا منسحب هشد ايه انا كدة هيتعلم عليا

قالي مش هنخسر حاجة لما نجرب

وبالفعل

اتفقنا واتقابلنا عند ميدان سفنكس

وبصراحة كان يوم جميل جدا جدا

وكانت شدة رائعة بصراحة وانا اتبسطت منها جدا بغض النظر عن النتيجة بس كان يوم جميل

اتفقنا اننا نشد على المحور والشدة تكون مواتير فقط اول مالطريق يبقى فيه عربيات احنا الاتنين نهدي وممنوع غرز نهائيا مهما كانت سواء واسعة او ضيقة وده حفاظا على سلامتنا وعشان اليوم مايقلبش بنكد ولان الموضوع في الاول وفي الاخر مش مستاهل

وبالفعل طلعنا على المحور على الساعة 1 بليل تقريبا

اخدنا المحور من عند سفنكس لحد اكتوبر رايح جاي

كررنا الشدة كتير حوالي 6 او 7 مرات

مرة نبدأ من سرعة 80 ومرة من 100 ومرة من 120 واول مالطريق مايزحم نهدي ونرجع نشد تاني

طبعا انا مش هتكلم عن تفاصيل الشدة لان الفيديو موضح كل حاجة ولو ان كنت مصور فيديو تاني بس للاسف مش عارف راح فين يظهر اتمسح بالغلط

كل اللى هقدر اقوله انا كنت بعدي تحت ال 130

فوق ال 130 فرق واضح لصالحه وعربيته بسم الله ماشاء الله اكنها بتتحول

فوق ال 140 بيبعد عني

فوق ال 160 انسى بقى

وعلى الرغم اني اتعلم عليا الا اني مبسوط من اداء العربية عندي الحمد لله الاداء جميل والتسارع حلو اوي لحد 140 ومعقول من 140-160 بعد كدة بتبدأ العربية تتقل

انا اقصى سرعة وصلتلها 170 (طبعا العربية تجيب اكتر بس مافيش مجال اني ازود عن كدة لاننا اول مابنشوف عربيات والطريق بدا يزحم بنهدي علطول )

هو اقصى سرعة وصلها 200

وبصراحة الراجل فعلا ماكدبش لما قال انه بيزحف السيراتو والالنترا والفيرنا وحتى الجيتز طلع منها

بسم الله ماشاء الله ربنا يباركله في عربيته

كان يوم جميل وكانت شدة اجمل وختمنا اليوم بصورة تذكارية للعربيتين
اخدناها في شارع السودان اول مانزلنا من المحور

ودي صورة العربيتين

وفي النهاية احب اقول اتمنى اننا مانلاقيش حد كاتب حاجة عن عربيته ونكدبه الاحسن نسال ونستفسر لعل نستفيد منه

والف شكر ليكم جميعا ونشوفكم في شدة تانية ان شاء الله <<<<<<<<< رايح فين ! ! فين الفيديو

ادي الفيديو اهو يا جماعة ومستنين تعليقاتكم

Toyota Yaris 1.3L Vs Daewoo Lanos 1.5 Dual cam 12V Drag Race - YouTube

**Ahmod** · 10-02-2012 11:29 AM

المشاركة الأصلية كتبت بواسطة lanos2004

يا خبر لحقت تنزل الفيديو وتعمل تقرير كمان
بس شوفت من 70 الى 130 مقدرتش عليك بس بعد 130 عربيتى بتتحول دة انا بخاف منها وشكرا على التقرير الجميل وصباح الفل وبعدين فكرتنى يا راجل بالتريقه الى اخدتها فى قسم الانوس دة انا كنت نسيت

انا والله النت عندي فيه مشكلة فماكنتش عارف ارفع الفيديو لولا كدة كنت هتلاقي التقرير ده من بليل

وانت لازم تقولي على سر التحول اللى بيحصلك بعد ال 130 ده تفسيره ايه عشان مش فاهم بصراحة

وعادي مايهمكش التريقة اصل بصراحة يعني احنا مش واخدين على ان يكون فيه لانوس من 0-100 في 9 ثواني وبتعدي الفيرنا والجيتز ! ! المعروف انها تسارعها كويس بس مش للدرجة عشان كدة الكل مستغرب بس مش اكتر

وكان يوم جميل بصراحة وفرصة سعيدة يا باشا ويارب تتكرر تاني في اقرب وقت

**ASSASSIN** · 10-02-2012 11:58 AM

ما شاء الله ربنا يبارك في العربيتين

**Eng.Geo** · 10-02-2012 01:07 PM

عاااااااااااااااااااش :)

**Eng.Geo** · 10-02-2012 01:11 PM

المشاركة الأصلية كتبت بواسطة Ahmod

انا والله النت عندي فيه مشكلة فماكنتش عارف ارفع الفيديو لولا كدة كنت هتلاقي التقرير ده من بليل

وانت لازم تقولي على سر التحول اللى بيحصلك بعد ال 130 ده تفسيره ايه عشان مش فاهم بصراحة

وعادي مايهمكش التريقة اصل بصراحة يعني احنا مش واخدين على ان يكون فيه لانوس من 0-100 في 9 ثواني وبتعدي الفيرنا والجيتز ! ! المعروف انها تسارعها كويس بس مش للدرجة عشان كدة الكل مستغرب بس مش اكتر

وكان يوم جميل بصراحة وفرصة سعيدة يا باشا ويارب تتكرر تاني في اقرب وقت

التفسير ان في الوقت ده بيكون عدي علي ال max torque
عزم الموتور ده عالي جدا بس متأخر شوية بيبقي عند 4200
مجرد ما بيقرب من ال 4200 الوحش بيتغابي وعينك ما تشوف الا النور

عشان كدة اللي يحب يعمل أحسن تسارع للموتور ده ... يحافظ علي مكان ال rpm في المنطة فوق ال 4000
لو واحد فاهم الموتور ده ... مش هيخلي حد يعدي منه بالساهل

**Eng.Geo** · 10-02-2012 01:16 PM

المشاركة الأصلية كتبت بواسطة lanos2004

انته شوفت الماتور التعديل الوحيد الفلتر السيموتا الصينى غير كدة ولا حاجه ---بس العربيه عندى قوتها بتطلع بعد rpm 4 قبل كدة بتكون عاديه جداا تقريبا الماتور متصمم ان طاقته كلها تخرج بعد rpm4 علشان يكون اقتصادى فى البنزين لان مكتوب فى الكتالوج 100 كيلو 6.5 لتر

لأ معلش أسمحلي
الموتور ال 1600 بيخرج عزمه بدري عن ال 1500 كامتين
ومع ذلك ال 1500 عزمه أكبر وقوته كمان أكبر
وكل ما كان ال العزم بيخرج عند rpm عالي كل ما زاد أستهلاك البنزين والعكس صحيح
طبعا أحسن حاجة تبقي العربية عزمها كبير وبخرج بدري عشان مجرد ما تدوس تلاقيها طارت ... بس المشكلة انه بعد كدة لازم هيقل ... يعني تلاقي العربية راحة ناطة وبعدين الموتور يموت ... وكان الحل في التربو
عامة
الطبيعي ان يكون الموتور ال1600 الكامتين أفضل في كل حاجة من ال 1500 الكامتين
بس هنا فرقت حاجة .... ال map بتاعة الموتور وتوقيت خروج العزم والقوة
ال 1600 لو ماشي ب map ال 1500 .... هتطيييييييييير
عايزك صحيح تجرب تشيل الفلتر وتطلع تجرب وقولي الفرق
أصل الصيني ده زي قلته ! وخطر عالعربية

**lanos2004** · 10-02-2012 01:53 PM

هوة الى بيحصل وانا طالع مع اى عربيه ممكن يسبقنى وخاصه لو بنتحرك من مطب بعد كدة بقله باى باى وعلى الصحراوى عربيات كتير تعبتنى لحد 140 بعد كدة بدور عليهم فى المرايا انا طلعت من سيراتوا بعد 190 والكروز بعد 180 والجيتس تعبتنى جدا فى الاول بس من 160 الى 170 قلت له باى باى جيتز بس دى او ل تجربه حقيقه للمقارنه لان ممكن الى كنت بجرى معاهم على الصحراوى مش جايبين اخر عربياتهم
غير انى بوصل 200 بسهوله جدااا والفلتر ممكن اركب القديم تانى دى سهله جدا على اما اشترى نوع نضيف

**Eng.Geo** · 10-02-2012 02:10 PM

المشاركة الأصلية كتبت بواسطة lanos2004

هوة الى بيحصل وانا طالع مع اى عربيه ممكن يسبقنى وخاصه لو بنتحرك من مطب بعد كدة بقله باى باى وعلى الصحراوى عربيات كتير تعبتنى لحد 140 بعد كدة بدور عليهم فى المرايا انا طلعت من سيراتوا بعد 190 والكروز بعد 180 والجيتس تعبتنى جدا فى الاول بس من 160 الى 170 قلت له باى باى جيتز بس دى او ل تجربه حقيقه للمقارنه لان ممكن الى كنت بجرى معاهم على الصحراوى مش جايبين اخر عربياتهم
غير انى بوصل 200 بسهوله جدااا والفلتر ممكن اركب القديم تانى دى سهله جدا على اما اشترى نوع نضيف

يا ريت بسرعة تجيب حاجة كويسة
وبلاش الأصلي بتاع العربية
صغير ومابيجيبش هوا ساقع
لو في ميزانية كويسة يفضل تجيب زي بتاع ahmod
K&N conical وأهم حاجة وأهم من الفلتر نفسه .... انك تحطه في مكان كويس
أفضل مكان وفاضي بيبقي ورا ال fog
زي ما محمد ممدوح حاطه كدة

بس لازم تكون الكرتيرة سليمة والأكصدام سليم عشان ميخشش مية وتراب جوة
بس أبقي أعمل الفرامل لحسان كدة هيبقي خطر
والرحمة عالناس شوية

الموضوع: [بالفيديو] تجربة الشد مع الانوس " lanos2004 " من 100 - 175 KM

LinkBack

أدوات الموضوع

عرض