محتاج مساعدتكم ضرورى جدا..انا فمشكله

كنت سبق وعملت موضوع وقلت فيه انى بشتغل فى مكان وعامل عقد والعقد ده بيلزمنى اقدم استقالتى قبلها ما امشى بشهر وفعلا عملت كده يوم 22/1/2012 والمفروض نهايه الاستقاله 22/2/2012 ومديرى كان ماضى عليها..تمام كده؟؟

جه دلوقتى صاحب الشركة اول انبارح واهاننى قدام 2 مديرين بدون اى سبب ومن غير مفتح بقى لمجرد انى اخدت اجازة يوم والمدير بتاعى مضى عليها فبهدله وبعد كده قاللى انت مرفود وشتمنى انا ومديرى وخرج من الاوضه..

دلوقتى انا بكلم مديرى بيقولى انت مش هتقبض دلوقتى وهتقبض مع الموظفين بعد اسبوع على الاقل علما ان اللى هقبضه ده مرتب شهر 1 بالاضافه للكام يوم بتوع شهر 2

لان عندنا الشركة بتقبض الشهر اللى فات فى نص او نهايه الشهر اللى بعده

ومديرى قاللى انا هحاول معاه وهدانى بس انا شايط جدا ومش عارف اعمل ايه..وعايز اكلم مديرى واقوله انا هاجى بكره ولو مخدتش فلوسى انا هعمل محضر فى القسم..مش عارف كده صح ولا اهدى واستنى ومعملش مشاكل لغايت مقبض بعد اسبوع ده لو كان كلامه صح

علما ان قانون العمل بيقول فى الماده 118
....إذا أنهى صاحب العمل عقد العمل دون إخطار أو قبل انقضاء مهلة الإخطار التزم بأن يؤدى للعامل مبلغا يعادل أجره عن مدة المهلة أو الجزء الباقي منها . ....
يعنى المفروض اخد مرتبى لحد 22/2/2012 اللى هو نهايه الاستقاله

وكمان فى ماده 38 بتقول
....إذا انتهت علاقة العمل يؤدى صاحب العمل للعامل أجره وجميع المبالغ المستحقة له فوراً إلا إذا كان العامل قد ترك العمل من تلقاء نفسه فيجب فى هذه الحالة على صاحب أداء أجر العامل وجميع مستحقاته فى مدة لا تجاوز سبعة أيام من تاريخ مطالبة العامل بهذه المستحقات....
يعنى حقى اخد فلوسى فورا..صح؟؟

اعمل ايه ممكن تساعدونى انا مضايق اوى

مش عارف والله انت ظروفك إيه
بس المثل بيقول عصفور في اليد خير من 10 على الشجر
يعني انت دلوقتي اسأل:
هتاخد شهادة الخبرة من غير مشاكل؟
هتاخد فلوسك بعد أسبوع فعلا ولا المدير بيقول كلام فض مجالس؟
القسم ووزارة العمل في ايدهم إيه يقدموهولك؟
شكلك في شغلك الجديد وانت بينك وبين الشغل القديم أقسام ومحاضر؟

انت موقفك حساس وكل قرار ليه عواقبه
ومقدر انك مظلوم بس ظلم شهر أو يوم
ولا حاجة لازقالك في الcv العمر؟

ممكن رأيي يكون غلط بس ربنا يوفقك في كل الأحوال وابقى طمنا

مرسى لردك اوى يااخى..ردك فعلا فى منتهى الحكمة
بس انا مش عايز من وشهم حاجه لانه مكان سىء فعلا واسمه سىء جدا ومشهور بالنصب..وعمر ماهيشرفنى احط اسمهم فى السى فى بتاعى ابدا
انا مقدر خوفك عليا..وانا فعلا بدأت اهدى شويه بس فعلا انا كنت شايط اوى
وعايز اكلم مديرى واقوله انا جاى بكره اخد فلوسى يا الا هعملكوا محضر فى القسم..مش عارف ده صح ولا لا ومش عارف لو وصلهم كده هيعندوا اكتر ومش هيدونى حاجة وهيذلونى ولا هيخافوا ويمنعوا المشاكل ويدولى حقى فورا..بصراحة مش عارف اتصرف

نصيحة من أخوك
عن تجربة ابعد عن حوار القواضي ومكتب العمل وقوانينه لنك مش هتطول ولا حق ولا باطل

حاول تخرج من الشركة دي بالحسنى وسوي خلافك بالتراضي وخد فلوس وقت ما تجهز وتوكل على الله وروح على مكان شغلك الجديد واحمد ربنا ان ده حصل

انا في نزاع مع الشركة السابقة من شهر 6 / 2011 الى الان وكان في 3 قضايا قبلي من زملائي في العمل مرفوعين على الشركة
ولم يبت في اي قضية فيهم والمحكمة عمالة تأجل
الشركة حاليا أصحابها صفوها (ومفيش اصول يتحجز عليها) وغيروا الموقع وبيفتحوا شركة جديدة باسم قريب من القديم ومكملين حياتهم عادي واحنا نخبط راسنا في الحيط بعد لما ناخد حكم بحقوقنا ممكن بعد 10 سنين (شفت واحد في المحكة كان شغال في شركة بترول قضيته بقالها 7 سنين ما بين تأجيلات ومعارضات)
وبعد لما المحكمة تحكملي مش هلاقي الشركة لانها هتكون اتصف وهي شركة مساهمة يعني لا يحق لي الرجوع على اصحابها ويكتفى بقسمة الغرماء . وطبعا مفيش حاجة نقتسم فيها

حوار القضايا ده ينفع مع الشركات ذات الاسماء الكبيرة او الثابته اللي مش ممكن تغير نشاطها او كيانها في اي وقت ومحدش منهم هيسمح انها توصل لقضية ومحدش يسمح انها هتعدي مكتب العمل ومعتقدش ان شركتك من الشركات دي

اشكرك اخى جداااااااااااا..كلامك صح فعلا وانا هسيب الموضوع لربنا يتصرف فيه وهحاول امسك نفسى الايام دى لحد ماخد حقى
وربنا مايوقع حد فى ضيقه زى دى
اللى مضايقنى انهم عملوا كده مع كل اللى سبقونى وانا متخيلتش فيوم يحصللى كده لانى حد محترم وهادى جدا ومش بتاع مشاكل ابداااااا..ده حتى لما اتشتمت مردتش وسكتت
هو ليه الغلبان بينداس كده فى الدنيا دى

معلش يا أخي عوضك علي الله

طالما الشركة مشهورة بالنصب يبقي انت هتعمل ايه ؟؟؟

حاول تطلع بالي تقدر عليه سواء مرتب شهر 1 او حتي لحد 14-2 وانت ونصيبك

والله المستعان
،
،

اشكرك استاذ سيد للرد والمشاركة
وفعلا عوضى على الله فمجهودى وتعبى

ياباشا برضه ده حصل معايا مع اني اقدم موظف في الشركة بقالي معاهم 4 سنين وفي الاخر مشيت بطريقة لا تتخيلها
وفعلا ده كان بيتم مع ناس كتيرة جدا كانت اعمدة في الشركة لكن انا بصراحة كنت مستني دوري رغم ان داخلي قناعة انه ده مش ممكن يحصل لاني مش هسمح انه يحصل
لكن الموضوع جه فجاة

اقتباس:

---

المشاركة الأصلية كتبت بواسطة beshomilan

مرسى لردك اوى يااخى..ردك فعلا فى منتهى الحكمة
بس انا مش عايز من وشهم حاجه لانه مكان سىء فعلا واسمه سىء جدا ومشهور بالنصب..وعمر ماهيشرفنى احط اسمهم فى السى فى بتاعى ابدا
انا مقدر خوفك عليا..وانا فعلا بدأت اهدى شويه بس فعلا انا كنت شايط اوى
وعايز اكلم مديرى واقوله انا جاى بكره اخد فلوسى يا الا هعملكوا محضر فى القسم..مش عارف ده صح ولا لا ومش عارف لو وصلهم كده هيعندوا اكتر ومش هيدونى حاجة وهيذلونى ولا هيخافوا ويمنعوا المشاكل ويدولى حقى فورا..بصراحة مش عارف اتصرف

---

كويس إنك هديت عن الأول شوية
لو تعرف تسأل زمايلك في الشغل اللي قريبين من سنك --وده عامل مهم قوي على فكرة-- اسألهم واعرف
وأيا كان، طول ما تعرف تاخد حقك بدون مشاكل يبقى أحسن

بالمناسبة، يوم ما عملت أنا حادثة بال cbr من كام شهر وعملت موضوع، انت دخلت تهديني وكدة. فخيرك سابق :)
(والحمدلله بعته والدنيا تمام)

ياااااااااااه اخيرا قابلتك...انا لقيتك اختفيت مده وشلت صوره ال race اللى فى بروفايلك فمكنتش عارف انت ولا مش انت وانا كمان مكنتش بدخل كتير المنتدى
اعذرنى انى مقدرتش اطمن عليك واعرف احوالك
فعلا مش عارف اقول ايه بعد تعليقك..بس كل واحد ربنا بيبعتله الحد المناسب فى الوقت المناسب
بس بجد بشكرك اوووووووووووووووووووى

لحفظ حقك فقط اعمل محضر اثبات حاله و لو معاك حد يشهد في المحضر يبقى احسن
كدا لو حد كلمك الاسبوع الي جاي و قالك مالكش عندي حاجه تطلعلهم المحضر

اشكرك استاذ ابوصلاح وربنا يهون على الواحد
اشكرك استاذ سعد بس هو ينفع اصبر اسبوع لحد مااشوف الدنيا فيها ايه ولو مقبضتش يبقى ساعتها اعمل المحضر واقول انى مخدتش فلوسي؟؟
زى ماده قانون العمل دى
....وكمان فى ماده 38 بتقول
....إذا انتهت علاقة العمل يؤدى صاحب العمل للعامل أجره وجميع المبالغ المستحقة له فوراً إلا إذا كان العامل قد ترك العمل من تلقاء نفسه فيجب فى هذه الحالة على صاحب أداء أجر العامل وجميع مستحقاته فى مدة لا تجاوز سبعة أيام من تاريخ مطالبة العامل بهذه المستحقات........

ما احنا قلنا ياباشا انسى قانون ساكسونيا ده خالص

خد حقك بالحرفة والمسايسة

لو عايز اسمعلك القانون اسمعلهولك بس مين بيطبقه ومين يعاقب اللي مبيطبقوش

ولعلمك قانون العمل ده متفصل لاصحاب العمل ضد العامل
لان فيه مخارج قانونية كتير تضيح حق العمال

عندك حق فكل كلمه بتقولها يا ابوصلاح صدقنى
واضح انى غلبان وعايش فى دنيا تانى غير بتاعتنا دى

السلام عليكم ورحمه الله وبركاته
سوف اضع نفسى مكانك وماذا سوف افعل
اولا انا ماضى على استقاله وتم الموافقة عليها يتم تنفيذها فى 22/11/2012 يعنى انا انا كدا كدا ماشى
ثانيا هعمل شكوى على ماذا شهر او شهرين لم استلمهم علشان احصل عليهم بالقانون الذهاب المتواصل لتقديم شكوى الى مكتب العمل باللى حصل معك ثم يخبروك ان تقدم اليهم بعد 21 يوم لمتابعه شكوتك
وان لم يعجبك رد ممثلى الشركة امامك طريقين اما تحويل شكوت الى القضاء عبر مكتب العمل ثم رفع محامى لمتابعه قضيتك واتعاب وخلافه او الانتظار لما سوف يعطوة لك اصحاب العمل
رأى الشخصى
أولا : توضيح صورة الشركة الحقيقة من عيوب ونصب وخلافه امام الرأى العام وانا اقصد الرأى العام الفيسبوك والتويتر وكل موقع يماثل نشاط الشركة اما حقى يعطوه لى وأما متابعتهم ومحاصرتهم اينما كانوا
ثانيا : تحتسبهم عند الله وطلب منه عن يعوضك عم حرموك من مرتب وخلافه والاهتمام بالبحث عن عمل اخر والاهتمام به

اقتباس:

---

المشاركة الأصلية كتبت بواسطة beshomilan

اشكرك استاذ ابوصلاح وربنا يهون على الواحد
اشكرك استاذ سعد بس هو ينفع اصبر اسبوع لحد مااشوف الدنيا فيها ايه ولو مقبضتش يبقى ساعتها اعمل المحضر واقول انى مخدتش فلوسي؟؟
زى ماده قانون العمل دى
....وكمان فى ماده 38 بتقول
....إذا انتهت علاقة العمل يؤدى صاحب العمل للعامل أجره وجميع المبالغ المستحقة له فوراً إلا إذا كان العامل قد ترك العمل من تلقاء نفسه فيجب فى هذه الحالة على صاحب أداء أجر العامل وجميع مستحقاته فى مدة لا تجاوز سبعة أيام من تاريخ مطالبة العامل بهذه المستحقات........

---

بص يا فندم محضر اثبات حاله ان المدير تعدى عليك و انك مقدم استقالتك من يوم 22
يعني تثبت غلط المدير في المحضر لان اقلها لو حاول يلعب معاك قضيه سب و قذف و يترمي ف السجن عشان قله ادبه و عدم احترامه

طبعا دا حقك و انت بتسجله عند الشرطه عشان وقت ماحد يتكلم تقولهم ادي المحضر و ادي الشهود

لو روحت و مادوكش مرتبك يبقى تعمل محضر تاني تثبت فيه انك ماخدتش مستحقاتك و تطلع علي مكتب العمل
كدا انت تضمن حقك و تبعد اي تلاعب من جهتهم

ممكن تقوللي اسم المكان ده على الخاص؟

1) تفضل تسايس و تسايس لغاية ما تاخد فلوسك

2) اليوم اللى تاخد فيه فلوسك و انت خارج من الشركة عدى على المدير و امسح بكرامته الأرض

3) لو تأكدت تماما أن فلوسك مش حترجع ....... استعوض ربنا و أذهب للجزء الثانى من النقطة رقم 2

معلش يا باشا شوية توضيح
==========
انت الاول متأمن عليك و لا لآ
و لو متأمن عليك تاريخ دخولك الشركة من امتى تحديدا
و ممكن تقولى بتقبض مرتبك ازاى يعنى عن طريق كارت atm على اى بنك و لا بتقبض مباشرة من الحسابات و بتمضى على ايصال استلام المرتب و لا لآ
و ممكن تقولى انت اخدت كام اجازة من اجازاتك السنوية
و هل مضيت على استمارة رقم 6 و لا لآ
و امتى قدمت الاستقالة بالظبط

اشكركم اخوتى للردود
واخر التفاصيل انى كلمت مديرى قاللى متقلقش انا بحاول اكلمهم فى موضوعك وهخلصلك حوارك ده كله
وكلمت كمان المدير العام وقاللى متقلقش انا مش هسمح ان حد يأخر عليك حاجه وانا هسعالك فى الموضوع
مش عارف بقى ده كله كلام ولا
بس ساعات ببقى شايط وعايز انزل اكسرلهم المكان بس بعد كده برجع استهدى بالله واهدى عشان مينفعش اكون كده

اقتباس:

---

السلام عليكم ورحمه الله وبركاته
سوف اضع نفسى مكانك وماذا سوف افعل
اولا انا ماضى على استقاله وتم الموافقة عليها يتم تنفيذها فى 22/11/2012 يعنى انا انا كدا كدا ماشى
ثانيا هعمل شكوى على ماذا شهر او شهرين لم استلمهم علشان احصل عليهم بالقانون الذهاب المتواصل لتقديم شكوى الى مكتب العمل باللى حصل معك ثم يخبروك ان تقدم اليهم بعد 21 يوم لمتابعه شكوتك
وان لم يعجبك رد ممثلى الشركة امامك طريقين اما تحويل شكوت الى القضاء عبر مكتب العمل ثم رفع محامى لمتابعه قضيتك واتعاب وخلافه او الانتظار لما سوف يعطوة لك اصحاب العمل
رأى الشخصى
أولا : توضيح صورة الشركة الحقيقة من عيوب ونصب وخلافه امام الرأى العام وانا اقصد الرأى العام الفيسبوك والتويتر وكل موقع يماثل نشاط الشركة اما حقى يعطوه لى وأما متابعتهم ومحاصرتهم اينما كانوا
ثانيا : تحتسبهم عند الله وطلب منه عن يعوضك عم حرموك من مرتب وخلافه والاهتمام بالبحث عن عمل اخر والاهتمام به

---

اشكرك استاذى للرد والاهتمام وانا فعلا بعمل زى رايك دلوقتى بس اخد حقى الاول

اقتباس:

---

بص يا فندم محضر اثبات حاله ان المدير تعدى عليك و انك مقدم استقالتك من يوم 22
يعني تثبت غلط المدير في المحضر لان اقلها لو حاول يلعب معاك قضيه سب و قذف و يترمي ف السجن عشان قله ادبه و عدم احترامه

طبعا دا حقك و انت بتسجله عند الشرطه عشان وقت ماحد يتكلم تقولهم ادي المحضر و ادي الشهود

---

اقتباس:

---

و روحت و مادوكش مرتبك يبقى تعمل محضر تاني تثبت فيه انك ماخدتش مستحقاتك و تطلع علي مكتب العمل
كدا انت تضمن حقك و تبعد اي تلاعب من جهتهم

---

كل ماباجى اعمل كده بخاف لانى لوحدى وفحالى واهلى فحالهم ومش قد الناس دول لا يلبسونى حاجه وانا عمرى فحياتى مادخلت قسم

اقتباس:

---

ممكن تقوللي اسم المكان ده على الخاص؟

---

بعتهولك

اقتباس:

---

) تفضل تسايس و تسايس لغاية ما تاخد فلوسك

2) اليوم اللى تاخد فيه فلوسك و انت خارج من الشركة عدى على المدير و امسح بكرامته الأرض

3) لو تأكدت تماما أن فلوسك مش حترجع ....... استعوض ربنا و أذهب للجزء الثانى من النقطة رقم 2

---

انا عايز حقى وبس ومش هكلم حد ولا اسلم حد كفايه اللى حصلى منهم ويكفى بس انا امنع حد يروحلوهم او يتعامل معاهم

اقتباس:

---

معلش يا باشا شوية توضيح
==========
انت الاول متأمن عليك و لا لآ
و لو متأمن عليك تاريخ دخولك الشركة من امتى تحديدا
و ممكن تقولى بتقبض مرتبك ازاى يعنى عن طريق كارت atm على اى بنك و لا بتقبض مباشرة من الحسابات و بتمضى على ايصال استلام المرتب و لا لآ
و ممكن تقولى انت اخدت كام اجازة من اجازاتك السنوية
و هل مضيت على استمارة رقم 6 و لا لآ
و امتى قدمت الاستقالة بالظبط

---

لا مش متأمن عليا رغم ان بقالى فى الشركة 5 شهور ومعظم موظفين الشركة بقالهم سنين مش متأمن عليهم
بقبض مرتبى من الحسابات مباشره وبمضى على استلامه
انا اخدت منهم حوالى 5 بعد ماقدمت الاستقاله يوم 22/1 كنت بستغل ايام اجازاتى يعنى طالما انا كده كده ماشى انما قبل كده كنت باخد عادى من غير اى مشاكل
وممضيتش على استماره 6
قدمت الاستقاله يوم 22/1 وفعقدى محدد انى لازم اقدم الاستقاله قبلها بشهر وانا قدمتها واعتمدت من مديرى انى قاعد لحد 22/2

اقتباس:

---

المشاركة الأصلية كتبت بواسطة beshomilan

لا مش متأمن عليا رغم ان بقالى فى الشركة 5 شهور ومعظم موظفين الشركة بقالهم سنين مش متأمن عليهم
بقبض مرتبى من الحسابات مباشره وبمضى على استلامه
انا اخدت منهم حوالى 5 بعد ماقدمت الاستقاله يوم 22/1 كنت بستغل ايام اجازاتى يعنى طالما انا كده كده ماشى انما قبل كده كنت باخد عادى من غير اى مشاكل
وممضيتش على استماره 6
قدمت الاستقاله يوم 22/1 وفعقدى محدد انى لازم اقدم الاستقاله قبلها بشهر وانا قدمتها واعتمدت من مديرى انى قاعد لحد 22/2

---

بص يا باشا كدة الموضوع خلصان من قبل ما يبدا
انت كدة طالما مش متأمن عليك يبقى العلاقة بين العامل و و الشركة غير قانونية يعنى القانون ما يحكمهاش
انت كدة مشى امورك بالراحة لما تاخد فلوسك و عوضك على الله
و لا تتقدم بشكوى مش حا تبقى ذات قيمة الا لو انت عاوز تضايقة فعلا
بس نصيحتى كبر منهم خالص و شيل القصة من دماغك و خد فلوسك و انساهم
================
للاسف موقفك نسبيا حا يبقى ضعيف جدا لو حصلت خصومة قضائية
بس حا تضايقهم جدا و تعمل مشكلة لهم هما نسبيا

اشكرك استاذ هشام للمساعده
وانا فعلا هحاول اعدى الايام على خير بدون مشاكل وربنا يسهل ويرجعلى حقى
ولو مرجعش عوضى على الله..وربنا يسامح اللى كان السبب

يا جماعة آخر المحضر ده استعداء لصاحب العمل وتحقيق فكسان والمحضر بيتحفظ اداري وبتاخد رقمه وتثبته في مكتب العمل

ومكتب العمل تعبان على الاخر هتقعد معاهم جلستين على مدار شهر ويبعت للمسئول في الشركة
ولو ماوصلتش لحل ودي معاه (خد بالك من حل ودي دي يعني مش بيسعى يجيبلك حقك طبقا للقانون) بيديلك رقم صادر وبيحولك الملف لقضية وعيش حياتك
انا قضيتي بقالها من شهر 7/2011 وللعلم في لي زملاء من العمل رافعين قضايا وقلت قبل كده شفت ناس بقالها سنين في المحكمة مابين معارضات وتأجيلات ومع شركات كبيرة ليها اسم في مصر

وعلى فكرة مرتبي بيتحول بنك وجيبت كشف حساب واثبت مرتبي
رغم اني كان معايا قبلها جواب مفردات مرتب عليه صحة توقيع من البنك كان بضعف مرتبي (يعني اقوى من كشف الحساب لانه بيوضح المدة والراتب ) والله مارضيتش اقدمه تجنبا لاي حرمانية

وسلملي على القوانين

تطورات الموضوع
رحت اخدت مرتب شهر 1 مخصوم منه يوم وربع عقوبه عشان غبت بدون مبلغ واتأخرت..ومخدتش ال كام يوم اللى اشتغلتهم شهر 2 حوالى 5 ايام..وقلت فنفسى كويس انى طلت حاجه منهم..احمد ربنا
وعملت ورقه اخلاء طرف ومضى عليها المدير العام بس مخدتش الورقه اللى كنت ماضى عليها اول ما اشتغلت مع العقد انى ارد 750 جنيه فى حاله تركى الشغل فى اول 3 شهور وقلت للمدير العام عليها وقاللى مش هتفرق هى كده كده انت معاك اخلاء طرف يعنى الورقه اللى انت ماضيها دى ملهاش اى لازمة
وانا عارف ومتأكد انهم مش هيستعملوها لانى مشيت من غير اى مشاكل وسلمت عليهم والمدير العام عايز ياخدنى فشركة تانيه تبعه..فالموضوع عادى
كده الدنيا ايه..تمام؟؟اطمن؟؟

اقتباس:

---

المشاركة الأصلية كتبت بواسطة beshomilan

تطورات الموضوع
رحت اخدت مرتب شهر 1 مخصوم منه يوم وربع عقوبه عشان غبت بدون مبلغ واتأخرت..ومخدتش ال كام يوم اللى اشتغلتهم شهر 2 حوالى 5 ايام..وقلت فنفسى كويس انى طلت حاجه منهم..احمد ربنا
وعملت ورقه اخلاء طرف ومضى عليها المدير العام بس مخدتش الورقه اللى كنت ماضى عليها اول ما اشتغلت مع العقد انى ارد 750 جنيه فى حاله تركى الشغل فى اول 3 شهور وقلت للمدير العام عليها وقاللى مش هتفرق هى كده كده انت معاك اخلاء طرف يعنى الورقه اللى انت ماضيها دى ملهاش اى لازمة
وانا عارف ومتأكد انهم مش هيستعملوها لانى مشيت من غير اى مشاكل وسلمت عليهم والمدير العام عايز ياخدنى فشركة تانيه تبعه..فالموضوع عادى
كده الدنيا ايه..تمام؟؟اطمن؟؟

---

اطمن ياباشا ان شاء الله
طالما معاك اخلاء طرف
وانت يعتبر مشيت من غر مشاكل
ومفيش شركة هتعمل حوارات علشان 750 ج طالما لايوجد ما يستدعي

اشكرك استاذى العزيز وانا الحمدلله مطمن لان محصلش اى مشاكل وربنا عداها على خير