الموضوع: تقرير عن سيارتي نيسان صني 1.6 اوتومباتك

السلام عليكم ورحمه الله وبركاته

انا اسف في البدايه على ان التقرير بدون صور بس مش دي العربيه الي احنا محتاجين ليها صور

انا هتكلم عن العربيه بشكل عام

من الخارج عربيتي 2006 وهي هي نفس الشكل بالضبط الى الان مااعدا الفانوس الامامي مختلف

من الخارج طبعا بتبقى ازواق بس انا شايف ان شكلها راقي لا هو رياضي ولا عواجيزي ولكن راقي

--------------------------------------------

من الداخل طبعا فخمه الى حد ما مش رديئه تماما بها واحد ايرباج

الكراسي مش من النوعيه الي فارشه زي الكورولا مثلا ف تقعد مبرطع فيها الكراشي بتقف اجناب الضهر

كرسي السائق مكنش لذيذ اوي بس عدلت وضعيته ارتحت تماما فيه وكرسي الي جنب السواق جميل جدا

اضواء التابلوه جميله لكن مش قويه وكنت اتمنى يبقى فيها تحكم في قوه الاضاءه


من الخلف ضيقه بصراحه متنفعش لناس طويله هيتدايقوا كلهم لا الي سايق هيستريح ولا الي ورا

وانا الموضوع ده مش مشكلي ضيق تماما لاني مش طويل وكذالك عيلتي

--------------------------------------------

الاداء وهذا يشمل ( بنزين - عفشه - ثبات - محرك وجير بوكس)


بالنسبه للبنزين ........ وهو احد عيوب الصني بالنسبه لناس كتير

-- العربيه استهلاكها جميل جدا جدا الحمد لله بسم الله ماشاء الله

انا مشيت بيها 200 كيلو جوه البلد ب 20 لتر بدون تكييف وبسواقه متغيره في الزحمه هادي تفتح اجري

بس انا لاحظت مبدايا انها من العربيات الي لو بتعمل بيها مشاوير قصيره وتدور وتطفي كتير ده بيطير البنزين وده كان بيحصل معايا برضو من النترا 2005 اوتو ومن نيو اكسنت 2006 مانيوال وانا شايف انها افضل في استهلاكها من الاتنين بامانه وبصراحه - ممكن المصري الي فيها مشاكل في البنزين وده عادتنا ك مصريين لازم نسيب بصمات مختلفه في كل انواع العريبات الي بنقفلها حتى لو كانت كلها ماركه وحده لازم عربيه تستهلك بنزين والتانيه فيها حاجات بتخبط والتالته الخ الخ الخ
واحمدوا ربنا يعني غبور اول ما نزل الفيرنا مصري كان المتور بياكل الزيت اكل ازاي متفهمش وتبص تحت العربيه مفيش نقطه زيت تبقى في المقاس برضو مفيش زيت واحلى حاجه قعد يشتغل الناس فتره ان عربياتهم زي الفل
انا شايف ان الصني في نفس مستوى الكورولا والسيفيك في الاقتصاديه لا تقل عنهم
والناس الي في مشاكل في عربياتهم ده يا اما سواقتهم غشيمه يا اما عيوب عربيه رشاشات شكمان الله اعلم
--------------------------------------------

العفشه والثبات هجمعهم مع بعض

* العفشه ناشفه الى حد ما بس مش للدرجه الي تقرف وللعلم انا عربيتي صحيح انها يوزد بس عفشتها كلها متغيره وكاوتشاتها كلها متغيره بردجستون مفيهاش اي مشاكل عفشه

* ممكن الدركسيون الى حد ما بيتهز في ايديك في مطبات معينه بس مش عيب انا شايفها طبيعته كده لان لو العلبه بايزه العربيه مبتتحركش كانها قطعه واحده بتحس ان الدركسيون في وادي والعربيه في وادي ولما بتعدي على مطب او عيون القط بتبقى االعربيه شبه معومه من قدام

* ثباتها مش اد كده ونظام تعليق خلفي دنجل بس عموما مشيها ناعم ومريح وفيها نطه بسيطه مش بتتحول ل قلبان ومراجيح زي عربيات برضو اقدر اقول ان مشيها محترم وراقي ولكن ليس رياضي


* التحكم في العربيه سهل جدا الدركسيون تقيل الى حد ما بس مش تقيل زي الانسر مثلا ومش خفيف زي الكورولا والسيراتو مثلا او الكوري عموما

* على سرعات عاليه اخري جبت بيها 140 لو ماشي علطول الي هيجي في دماغك انها مش بتاعت غرز بس لما باخد فيها غرز بتسد وبتبقى جميله بس برضو ارجع واقول العربيه دي مش رياضيه

* جوه البلد امشي عادي تبقى مستريح اجري على طريق نضيف تبقى مستريح هتهرج جوه البلد برضو مش هتقول لا وهتبقى كويسه بس مش ثبات اوي زي السيفيك مثلا او الكورولا ال 2008 بس مش هتبقى مرجيحه زي عربيات كوري غاليه (مش هقول اسمها )

* الفرامل عربيتي مفيهاش abs وفراملها ممتازه واكيد افضل من اي عريبه كوري لما بقارنها بفرامل السيراتو الي ب abs مثلا بحسها زيها وفرامل السيراتو قويه جدا انما الكوري بدون abs كلها بدون استثناء بيزحف وبيبقى سخيف جدا بصراحه

*ملحوظه احب اقولها اوعى اوعى اوعى تستخسر وتجيب اي كاوتش كوري فعلا لان كلها كومهو هانكوك ماكسس نيكسن تعبان تعبان تعبان ومن اهم الاسباب الي بتنشف العريبه وتبوز عفشتها بدري بدري

خليك عطول في كونتننتال بردجستون ميشلان دانلوب يوكوهاما اي حاجه نضيفه كلهم الفروق بينهم مش كبيره بصراحه كلهم جمال ومحافظين على العربيه وبيدوا ثبات وفرامل حلو ه

------------------------------------------------------


الجيربوكس والمتور

الى الان الجير بوكس بتاعها ولا ستيب ترونك ولا الهوا وافضل من اي عربيه كوري في الاستجابه والذكاء بتاع الفتيس لو ماشي بصراحه بينقل على 2.5 وممكن اخليه ينقل على 3 وممكن على 4 وممكن للاخر وفي كل الحالات بلاقي الاستجابه والتسارع الى انا عايزه
لما كانت معايا ال 2005 النترا كنت لازم كيك داون عشان اخلي الامبير يتحرك بسرعه طبيعيه غير كده بطه صوت متورع الي بس بس عموما جير بوكس الالنترا الي معايا مكنش سليم بس السليم برضو موصلش لدرجه الياباني

بس الشهاده لله فتيس السيراتو جميل جدا جدا مع صديق لي وفتيس الالنترا الجديده ال 2011 6 غيارات جميل برضو

بالنسبه للحرق هي عموما الصني مش جرايه اوي بس مش بطه يعني الكوري عموما اسرع منها شويه

بس مش اوي وانا برضو متغاشمتش على الفتيس لاني خلاص هبطل كل الهبل الي كنت بعملها ولا 0-100 في اد ايه ثانيه ولا الهوا العمليه مش ناقصه وفي النهايه كلها مش عربيات race على قد ما هتتغاشم على قد ما هتزعل بعدين

نقطه مجنناني من الفتيس بتاعها بصراحه وفي كل النيسان كده حتى السيدريك ال 3000 سي سي مع صديق لي في قطر وطلعت برضو معاه انها بتنزل من d ل 2 عادي من غير ما ادوس على الزرار بتاع الفتيس طب انا لو ماشي على 120 وحد رييح بس على الفتيس هينزل 2 وشكرا الفتيس كده روح ومش جاي تاني مع اني كل العريبات الي في العالم الفتيس عمره ما بيجي ل 2 عادي بدون ما تدوس على الزرار انما بقيت الغيارات في النيسان عادي زيها زي اي عربيها عمر ما الفتيس هيجي على r or p بدون ما تدوس الزرار وعمره ما هينزل من بي لاي غيار بدون ما تدوس زرار وفرامل


----------------------------------------

خلاصه الكلام بالنسبه ليا العريبه دي اقتصاديه عائليه جميله وبرضو الى حد ما مرضيه في الجري والكلام

قطع الغيار معرفش عنها حاجه بس اكيد مولعه

لو معايا 100 الف مش هستخسرهم فيها وبرضو لو هقارنها باي عربيه كوري جديده فهي تتفوق في كل حاجه الا الاوبشن والشكل اذواق

اتمنى تقولوا لي معاد المقابله الجايه امتى عشان اجي وتشوفوا عربيتي


عندي العربيه بالكاسيت اعتقد انه الاصلي بتاع اليابان لان عربيتي ياباني ف هو شرايط وتحتيه في سيدي منفصل كل ما ادخل سيدي يطلع فهل اي محل بتاع تصليح سيديهات يصلحه عادي ولا ايه الدنيا

سوال بسيط برضو زيت الفتيس الاوتو بيتغير كل اد ايه والفلتير بتاعه بكام وبتاخد كام لتر وبكم تيل الفرامل الاصلي برا التوكيل الاصلي وبكام لو فيه تيل فرامل مش اصلي نضيف جدا جدا زي ريمسا مثلا \


عارف اني رغيت كتير بس انا بحب اذكر معظم التفاصيل الي ممكن ناس تتكسف تسال فيها وبحب اقول الى ليا واللي عليا

--------------------------------
تم اعادة تنسيق الموضوع للافادة العامة لاعضـاء نيسان
تقرير ومقارنة متميزة من العضو
تم بواسطتي
مشرف القسم مـ7