بصي للأمانة أنا برده كنت خايفة اوي من المستعمل وحواراته وفكرت اجيب زيرو تقسيط كتير اوي بس لما استخرت ربنا في العربية 128 دي واشتريتها بعد ماتوكلت على الله لاقيت ان فعلا افضل اني اجيب مستعمل لإني مع تالت أو رابع مشوار في السواقة (كنت ساعتها لوحدي ودي كانت غلطة اني سوقتها لوحدي من غير تدريب كويس الاول) مع الأسف خبطت عربية لانوس هي اينعم خبطة بسيطة جدا بس التأثير اللي حصل لعربيتي اقل من التأثير بتاع اللانوس انا عربيتي نزل منها شوية دهان بسيط جدا لكن اللانوس الباب دخل سنة بسيطة ونزل عليها دهان عربيتي من أثر الإحتكاك اللي حصل.
أينعم الباب بتاع اللانوس هايترد وهايتكلف حاجة بسيطة بس حمدت ربنا لإن عربيتي لوكانت حديثة وحصلها كده أكيد كانت هاتتطبق برده زي اللانوس اللي خبطتها.
بصي استخيري ربنا الأول قبل اي شئ وشوفي هايوجهك لفين ولو استقريتي على إنك تجيبي مستعمل خلى حد موثوق فيه وبيفهم كويس في العربيات من زمايلك الولاد أو قرايبك ينزل معاكي وتاخدوا ميكانيكي أو ترفعوها في بنزينة وتكشوفوا عليها ولما تحتاجي حاجة في العربية شوفي اقرب حد ساكن جنبك عنده عربية بيتعامل مع ميكانيكي مين وروحيله أو اي زميل لينا في المنتدي لو ساكن قريب منك هايقولك برده ويرشحلك حد كويس تتعاملي معاه زي ماحصل معايا بالضبط.(ناس كتير هنا في المنتدي بتساعد بجد وبتقولي أروحلهم ازاي كمان وفي منهم اللي قالي قوليله من طرف فلان)
وحاولي لما تختاري ميكانيكي يفحص العربية اللي هاتشتريها يكون بعيد عن منطقتك عشان ميختارلكيش عربية فيها مشاكل عشان تبقي زبونة عنده بعد كده :oops:. (دي نصيحة والله اعلم برده الإخوة ممكن يشورو عليكي بإيه).
وبصي طالما استخرتي ربنا توكلي على الله ولاقدر الله لو حصل للعربية حاجة يبقي ابتلاء من ربنا زيه زي اي ابتلاء بيحصل لينا كلنا يعني لإن اي مستعمل لازم يبقي فيه مشاكل
أينعم الزيرو أريح لإنك لمدة خمس سنين مثلا معاكي توكيل وتأمين بس ده لو بتسوقي كويس وكمان شركات التأمين مش هبلة يعني وليهم حوارات برده يقدورا بيها يطلعوا عينيكي وليهم شروط وكده وحتى لو صلحوهالك فبعد ماتخلصي مدة القسط هاتلاقي انك صلحتى في العربية كتير وده طبعا هايقلل في تمنها كتير وسواقة الموديلات الحديثة صعبة خصوصا في شوارع مصر الجميلة ووسط سواقين الميكروباص الأمورين :3gears:والكارثة اللي بتدعي ميني باص واخلاقهم اللذيذة ده غير طبعا سواقين التاكسي وبما إننا بنات فإعملي حسابك انك هاتبقي الغلطانة مهما حصل لإن أي حد مجرد مابيشوف اللي سايقة ست أو بنت يإما بيخاف ويبعد عنها خالص ده لو محترم يعني يإما بيطمع ويقعد يزنق عليها ويربكها بكلكسات عشان عارف انها مش هاتقدر تتخانق وتبهدله زي الرجالة اللي بتسوق يعني.
عموما اسفة للإطالة بس استخيري وثقي في اختيار ربنا انه الأفضل على اي حال.