مقارنة بين سوزوكي SX4 هاتشباك / هيونداي i30 / دايهاتسو تريوس

**Badrashiny** · 01-06-2008 11:06 AM

السلام عليكم ورحمة الله
أرجو إفادتي...مين الأفضل في الـ 3 عربيات دول؟ ولماذا؟
1- سوزوكي sx4 هاتشباك
2- هيونداي i30
3- دايهاتسو تريوس

**fahd_628** · 01-06-2008 11:31 AM

لو عاوز اى استفسار عن ال I30 انا تحت امرك !

**Badrashiny** · 01-06-2008 12:02 PM

المشاركة الأصلية كتبت بواسطة fahd_628

لو عاوز اى استفسار عن ال I30 انا تحت امرك !

ياريت حضرتك تكلمني عنها ولو عندك تجربة قياده ياريت تحكيها علشان انا عايز أشتري عربية من ال 3 دول بس محتار مين فيهم .
علشان كدة كنت عايز أعمل مقارنة بينهم

**fahd_628** · 01-06-2008 12:06 PM

والله يا باشا احنا لسة جايبينها من كام يوم فقط و هيا اول موديل فى الأوتوماتيك بس الكماليات كويسة يعنى كاسيت حلو و سماعات حلوة و مالتى فانكشن فى الدريكسيون و 4 زجاج كهرباء و مرايات كهرباء و موتور متقفل حلو و باور كهرباء يعنى مش هايدروليك و ناعم جدا و جميل و محرك 122 حصان و الفتيس الاوتوماتيك استجابتة جميلة جدا و سحبة العربية قوية جدا ( انا لسة معملتش كيك داون بس دة واضح )

اول فئة فى الاوتوماتيك ب 110

الثبات ممتاز ممتاز ممتاز بجد الثبات حكاية و العربية تقيلة ( 1300 كجم ) و دة هتحس بية فى الطريق تلاقى العربية راسية على الأرض و ماشى و انت مطمن

انا انصحك لو فى مقدورك تجيب الى ب 131 الى هية الفل اوبشن يبقى تمام لأن كمالياتها حلوة

و لو عندك اى استفسار تانى انا موجود

**Badrashiny** · 01-06-2008 12:15 PM

المشاركة الأصلية كتبت بواسطة fahd_628

اول فئة فى الاوتوماتيك ب 110

بس أنا شفت على contactcars إن أول حاجة في الأوتوماتيك كانت بـ 118.

ومعلش كان عندي سؤال تاني أنا برده شفت على contactcars إن المانيوال في منها واحد S/R بـ 106 فلو سمحت هو يعني إيه S/R ؟

**karimalaa** · 01-06-2008 06:27 PM

S/R=Sun Roof يعني فتحة سقف و بصراحة i30 عربية تحفة ما شاء الله وربنا يباركلك فيها يا فهد و(طبعا ده بفضل فهد اني ركبتها) واخده جائزة أحسن عربية في2007 . قبل ما اركبها كنت حاسس ان 110 كتير أوي عليها بس ما شاء الله عربية تحفة و تستاهل.

**fahd_628** · 02-06-2008 12:59 AM

ربنا يخليك يا كريم :)

بالنسبة ل S/r زى ما كريم قالك يعنى فتحة سقف

و فعلا انا فى كونتكت كار قبل ما اشترى عملت حسابى على 118 بس لما رحت اسأل بجد لقيت فئة ب 110

الى ب 118 دية تكييف تاتش و فيها Aux و مكان للأى بود و حاجات زيادة كدة