الموضوع: موبينيل بتستظزرف ولا ايه ؟!

المشاركة الأصلية كتبت بواسطة dreamo

انا كان عندي مشكله فنيه مع شبكة موبينيل في المنطقه بتاعتي كلها .. يعني مش مشكله خاصه بالخط بتاعي فقط والمشكله مش بتظهر غير مع اللي معاه تليفون فيه ثري جي وظروف معينه

وفضلت اشتكي لموبينيل 7 شهور .. ودوخوني تجارب وتغير شريحه ودوشه

وبعتولي واحد البيت شاف المشكله عالطبيعه وعمل تجارب

طب يحلوها بقى .. ابداً ولا الهوا

واشتكي تاسع وعاشر ولا عندهم علم ان في حد جالي البيت ولا اني بقالي شهور بشتكي

و وكانوا سعات يتصلوا بيه يقولولي احنا بنكلمك من تليفون ثري جي اهو ومفيش مشكله

انا مابسكوتش .. بردو اشتكي مابزهئش ولا امل

لحد ما هما زهئوا مني قاولولي تابعنا في شهر مارس

روحت مشتكيهم في تنظيم الاتصالات .. والجهاز ماعملش الشكوى بالساهل

دة بعد خناق ومحاولات ..

وفي خلال حوالي 15 يوم المشكله اتحلت

واللي يكسف ان موبينيل اتصلوا بيه بعد مالمشكله اتحلت .. بيطلبوا مني يبعتولي واحد يشوف المشكله علشان يحلوها !!!!!!!!!!!!!!!!!!!!!!!!! مليون علامه تعجب



بالنسبه لشركة لينك .. فدي البركه بقى بتاعة تنظيم الاتصالات

ممنوع تشتكي من لينك والا تبقى محدث للنعمه

اقوله انا خطي 2 ميجا وبحمل ب 10 كيلو بالليل ومعظم اليوم .. يقولي دة قانوني مش هقدر عملك شكوى

انا بقى لو عايز اشتكي تنظيم الاتصالات .. اشتكيه فين ؟

انا معاك طبعا ان في بعض العملاء عندهم مشكلة في الشبكة ومش عارفين يتوصلوا لحلها انا كنت بتكلم على المستوى العام للشبكة
وكمان صدقني مش بسهولة ان الشركة تحل مشكلة معينة في الشبكة نظرا لعوامل كتير منها التراخيص والموافقات وحاجات روتينية بشعة جدا دا طبعا بالاضافة للروتين الللي ممكن يكون موجود في الشركة نفسها
مرة كان في اتنين من قرية جايين يشتكوا من ان الشبكة عندهم اصبحت ضعيفه فكنا بنسألهم ايه السبب وكدة قالولنا في اتنين سلفيين كسروا الشبكة يللا تعالوا عشان تبنوها تاني !!
هو اصلا مش متخيل الشبكة دي تكلف كام اللي الشركة المفروض تبنيها ببساطة
هما اكيد لا سلفيين ولا حاجة لكن بتكون ناس دماغها على أدها شوية
دا غير ان بجد عذاااااب ان الشركة تبني محطة تقوية في منطقة وخصوصا بعد الثورة في ظل رفض شرس من الاهالي واللي هما نفسهم بيشتكوا ان الشبكة ضعيفه !

المشاركة الأصلية كتبت بواسطة dreamo

طب ايه تفاصيله العرض دة

في رسوم بتتخصم ؟

الاتصال بأي شبكة في مصر ب 15 قرش في اي وقت ومن اول دقيقه ؟

التفاصيل بسيطة جدا
سعر موحد للدقيقة 15 قرش
بدون اشتراكات شهرية او رسم فتح مكالمة
وكمان في ميزة اضافية لو انت ساكن بره القاهرة والاسكندرية
انك ممكن تشترك في نظام مشابه اسمه روقنجي بلدنا
دا برضو سعر موحد 15 قرش وبيديك كل يوم ساعتين مجانا لموبينيل من الساعة 12 صباحا لحد الساعة 3 العصر بعد اجراء 5 دقايق مدفوعة لاي خط موبينيل

يعني لو انت من القاهرة او اسكندرية اختار روقنجي (15 قرش للدقيقة بدون اي مصاريف تانية)
لو برة القاهرة واسكندرية اختار روقنجي بلدنا

تحياتي :)