شباب منتدى سكودا...تحية طيبة و بعد

يوم أقل ما يوصف عنه انه &$@)!*#$!#_%_# (شتيمة مش تمام)!!

كنت مبيت عند حماتي في حلوان و نازل تاني يوم الساعة 7 الصبح أبص ألاقي الكاوتش اللي ورا على الأرض...قلت إصطبحنا على الصبح!...و روحت أفتح الشنطة علشان أطلع العدة و الإستبن....أبص الاقي العربية اللي جنبي برضو كاوتشها على الأرض...!!!

أبص على باقي الكاوتش عندي ألاقي الكواتش التاني اللي ورا على الأرض....!!!!
أبص حولي ....الاقي كل عربيات الشارع على الاقل كاوتش من كاوتشاتها لحد 3 كاوتشات على الأرض...منهم عربيات حمايا شخصياً...!!يا حلاوة يا ولاد...

طبعا ً التفسير ان واحد إبن%$%& مريض نفسي نزل على العربيات كلها و فك البلوف بتاعتها و دي كانت النتيجة!!!

المهم علشان مطولش عليكم...أثناء رفع السيارة من جانب بإستخدام الكوريك بتاعها....قامت مالت الناحية التانية بسبب ان الناحية التانية الكاوتش نايم برضو!!!و ده أدى ان عمود القلووظ بتاع الكوريك يغرز في العتبة و بقت عاملة زي رقم ثمانية بالعربي!!! و طبعاً العمود نفسه إنثنى و الكوريك مبقاش نافع تاني!!!

دوخنا على واحد بتاع كاوتش يكون فاتح في الساعة دي....و الحمد لله لاقينا واحد إبن%$#^ رفع العربية من التجويف بتاع الإستبن الخلفي و خلى الصاج يقب لجوه!!!و بالتالي الإستبن إرتفع و مبقاش راكب صح في مكانه و أرضية الشنطة إرتفعت!

جينا ننفخ الكاوتش علشان نتهبب نمشي....لاقين صوت تنفيس ندور نلاقي إيه بقى؟؟؟؟!!!!!!

عدد 4 سكاكين في كل كاوتشة!!! و قيس على كده الشارع كله!!!!و معنديش كلام تاني أقوله

الحمد لله كنت شايل الأربع فرد القدام لانهم كانوا بحالتهم وقت ما إتشالوا...و إستنضفت 2 منهم و ركبتهم ...بس طبعاً ماشي مقلق لأنهم إتركنوا حوالي سنتين في الجراج...

الحمد لله على كل شئ...كله في الريش بقشيش زي ما بيقولوا...

أكتر حاجة مزعلاني بقى هي الكوريك...لأنه لم يستعمل قبل كده من يوم ما العربية إتجابت و دلوقتي مبقاش نافع...سألت مركز الأقصى قالوا مفيش...

هل في حد بقى يعرف أجيبه منين؟؟؟؟جديد؟ إستيراد؟؟؟ أي حاجة المهم أجيبه

ربنا يحفظكم و يحفظ طرقكم