المشاركة الأصلية كتبت بواسطة semsem kane
بالنسبة للكورى واليابانى ومبيعاتهم معلش احنا كلنا عارفين ان المستهلك المصرى ماقداموش فى الفئة السعرية اللى فيها شريحة سيارات هيونداى وكيا وشيفرولية غير انة يشتريهم لان اليابانى عشان يبدأ يركبة بأوبشن يبقى من اول 140 وانت طالع وفية سيارات من اول 178 الف جنية زى السيفيك كدة طبعا الكل نفسة يركبها بس مش هيقدر على تمنها وخصوصا ان دية اول فئة وتانى فئة ب 200 الف جنية يعنى دبح
عشان كدة الكورى منتشر وهو دة سبب انتشارة لأ اكثر ولا اقل
يعنى لما واحد يكون معاة 105 الف جنية وعايز يركب عربية شكلها كويس وماتورها سريع وناعمة هيجى يفكر مش هيلاقى قدامة غير لانسر بومة اول فئة ودية قدمت , نيسان صنى نفس الكلام , طيب ولا هيعرف يشترى ولا شارك , كورولا , سيفيك , سوبارو , فانتازيا طيب يعمل اية وفى نفس الوقت مش عايز يركب فيرنا ولا لانوس عايز حاجة حديثة شكلا وموضوعا يبقى قدامة اية ( rb - سيراتو ) كدة يبقى دية العربية المناسبة لية على قد امكانياتة وللاسف احنا لو دورنا هنلاقى ان معظم الشعب المصرى مش هيكون دية حدودة وهيجيبها تقسيط كمان او كاش حسب المقدرة هنا , عرفتوا لية سبب انتشارها واستحواذها على السوق المصرى
نفس الكلام للانترا اللى هيشتريها ماقداموش غيرها فى نفس الفئة السعرية لانة هيجيب اية بعربية تمنها 140 الف جنية وفيها اوبشن كتير وماتور 1600 قوتة 128 حصان مرة واحدة على الورق بس , وبالشكل الجامد دة
بالنسبة للسوق الامريكى اعتقد المقارنة هنا غير عادلة بالمرة لان ولا الاوبشن ولا المحرك ولا جودة الخامات زى اللى بتنزلنا هنا والكوريين عاملين زى الصينين ممكن يعملك حاجة بقرش ويعملك حاجة بالف حسب الزبون اللى هيدفع وطبعا عشان عارفينا كلنا زباين فبيدونا على قد فلوسنا لان مش معقول هينزل عربية بتمن سعر السيفيك او بتكاليف باهظة لان هو مش عايز كدة لأ هو عايز يكسب بقدر الامكان وعارف اننا مالناش فى مواصفات السلامة والامان ولا معايير الجودة ولا نظام المحافظة على البيئة , يعنى احنا بنركب وبنشد وبنقول يارب سلمها والستر من عند الله