الموضوع: تقرير: تركيب كاركت , كفرات مرايا إشارات , وحدات رفع وباركنج سينسورس

السلام عليكم يا أصدقاء المنتدى الأحباء
بالنسبة لي دا أول تقرير أعملو في المنتدي,
بصراحة أنا واحد من الناس أحب أدلع عربيتي أوي و بحب الكماليات في العربية و في حاجات منها بعتبرها ضرورية.

قولت لما أروح أركب شوية كماليات مرة واحدة علشان مش كل أما أعوز اركب حاجة أفك في العربية و فرش الباب و بالمرة اخد تخفيض كويس.
هيا العربية صني 2012
المهم, حجزت في مودرن أبو رواش صيانة ال 5000 و تركيب الكماليات و روحت يوم الأحد الساعة 10:30ص. إنتظرت حوالي ساعة إلا ربع على ما قابلت مهندس الأستقبال و في الوقت ده إتفرجت على الكماليات المعروضه و قابلت المسئول عن الكماليات و اتفقت معاه على تركيب كار كيت , كفرات مرايا, وحدات رفع تايواني و سينسور بارك و إتفقت معاه على السعر الكلى و أخدت منة تخفيض كويس و المبلغ الكلى للتركيب بالمصنعيه 1800ج قبل الضريبه و بعد الضريبة 1980ج.
وبعد ما إتفقنا على التركيب كان مهندس الأستقبال جه و استلم العربية و أداني معادتسليم الساعة 3:30م.
وطبعا المشكلة أني كنت رايح لوحدي و مش معايا حد يونسني فترة الأنتظار و خصوصا إن العربية أتأخرت و ما إستلمتهاش إلا الساعة 6:15م.
الحاجات اللي ركبت:
- الكار كيت: هو أسمه باروت parrot mki9000, و هو عبارة عن جهز بحجم وحدة الرفع ليه وصلات بتركب ورا الكاسيت و على الساوند سيستم بتاع العربية و بيطلع منة كابل لية مخرج USB, AUX, I POD و بيحطو جوا درج التابلوه (تفتح الدرج تلاقيه جوا يعني مافيش أسلاك ظاهره خالص) و فى كمان نايك بيتحط ورا مراية الصالون و طبعا أهم حاجة الريموت المالتي فنكشن الوايرليس اللي بيركب على الطارة و بتتحكم منه في كل وظائف الجهاز.
الجهاز فعلا رائع و ممكن تشغل علية أكتر من موبايل في نفس الوقت و تتحكم في كل حاجة في الموبايل من المالتى فنكشن منغير ما تنظر على شاشة الموبايل. و أيضاً ممكن تشغل علية فلاشة أو اي بود و الثحكم كله من الطارة و صوته رائع ونقي جدا ما شاء الله.

- وحدات الرفع: وهي عبارة عن وحدة تايواني بترفع باب باب و برضو مهمه جدا بالنسبالي لاني أوقات كتير بنزل و أنسي شباك مفتوح.

- كفر المرايات الإشارة: وهما نفسلون العربية و بيركبو مكان الكفرات الأصلي و بيتوصلو على إشارات الجنب اللي في الرفارف و منظرهم رائع جداً و خامتهم نضيفة زي الأصلي.

- السينسور بارك: رشوهم نفس لون العربية و ركب أتنين مكان الطبتين و إدوني الأتنين التانيين معايا, و خليتهم يركبوا الشاشة في منتصف التابلوه تماماً.

بعد كدا خرجت العربية الساعة 5:45م و دخلت إتغسلت و طلعت الساعة 6:10 م و إستلمتها و جربت كل الكماليات الي ركبت و كل كهربة العربية و كله تمام و الحمد لله, بس و أنا بشوف الباب اللي ناحية السواق لقيت الباب متركب من غير المسمار البلاستك اللي في أخر الباب من عند التابلوه , فناديت المهندس و قولتله راح يدور عليه بنفسه لان كل الفنيين كانوا مشيو و طبعاًلم يجده و قاللي أبقي عدي في أي وقت و أنا هجبللك واحد.

خرجت من هناك الساعة 7:00 م و روحت على المقطم بس كنت تعبان جدا علشان طبعا كنت دا كله لوحدي. و لما روحت لاقيت المسمار البلاستك اللي كان ضايع في الدواسة و ركبته الحمد لله.

و بصراحة الكماليلت جميلة و عملية جدا جدا و أكثر من رائعة ما شاء الله.

بس الخدمة في أوتو إيجيبت أحسن بكتييير من مودرن بالنسبة للمواعيد و المعاملة و الحرص على إرضاء العملاء.

معلش أنا طولت عليكم كتيييييييييير بس يارب يكون التقرير كويس و مفيد.

المشكلة إني مش بعرف أرفع صور و سرعة ال usb modem مش خدماني.