الموضوع: وحشتنااااااااا يا دكتور يوسف .. Y2y1500 ..

والله يا رجالة مش عارف اقولكم ايه؟
بس بجد والله انا كمان مفتقدكم ومفتقد الصنى حبيبتى جدااااااااااااااااا
واكيد اللى منعنى عنكم هو الشديد القوى وهو سفرى السعودية للعمل
وطبعا زى ما بتسمعوا ان اول فترة بتبقى الظروف ملخبطة ومفيش تواصل وفترة وتعدى باذن الله ونرجع تانى نتواصل ونتقابل
باشكركم جميعا على سؤالكم عضو عضو واعذرونى لو كنت كلمت احمد tv بس وطمنته على امورى لكنى بعت السلام لكم جميعا
وبصراحة اول حاجة عملتها اول ما استقريت فى الرياض جبت رقم توكيل نيسان (الحمرانى) وروحتله كمان .. بس عشان افضل متواصل معاكم مهما كنت بعيد عن مصر
بس المفاجآة وخيبة الامل كانا النتيجة بعد رجوعى لأنى مش هاقدر اركب نيسان هنا للاسباب التالية:
1. توكيل سيىء وغير منافس بالمرة فى السوق من حيث العروض والاسعار وسعر اعادة البيع وقطع الغيار والصيانات والضمان وخلافه عكس تويوتا عبد اللطيف جميل اللى واكل السوق كله - هوندا كمان نص نص - ارتفاع اسهم هيونداى كيا فى السوق الفترة الاخيرة هنا للعروض والاوبشن والضمان 3-5 سنوات و100 الف كم وتوكيلات فعالة - كمان فيه الامريكى من جيب كرايسلر دودج وفورد بس اسعارهم وقطع الغيار ناااااار..
2. لما سألت عن القاشقاى (معشوقتى) .. كان الرد ما بقتش تنزل من 2009 لأنها ما حققتش مبيعات ولا كان عليها اقبال .. طيب ايه السبب؟ .. الله اعلم وكان سعرها مبالغ فيه بالنسبة للمنافسين 75-80 الف ريال (2000 سى سى) مع العلم ان المنافسين اغلى سواء كان تويوتا راف 4 او كيا سبورتاج او هيونداى توسون i35 او غيرها من سيارات الكروس اوفر .. يعنى مفيش امل تنزلوها تانى؟ .. لأ .. لكن لو عاوزها ممكن تكون مستعملة وبضمان الوكيل !!!
3. طيب الجوك فين ؟ .. لسه هاتنزل كمان شهرين عالاقل !!!!
4. عندكم ايه طيب كروس اوفر ؟ .. عندك التيدا !!! والاكس ترايل .. طبعا رد لا ينم على فهم مسؤول المبيعات بمركز ضخم لماركة نيسان العملاقة
5. فتيس الx-tronic cvt نازل فى موديلات المورانو والالتيما والماكسيما فقط لا غير حتى الان
6. اخيرا .. سيبتله رقمى عشان يكلمنى لما الجوك توصل بالسلامة او الاكس ترايل الاتوماتيك (الموجود دلوقت مانيوال بس) .. بس بينى وبينكم خرجت من المعرض وانا متأكد من سبب انخفاض اسهم نيسان فى السعودية وعدم منافستها فى السوق ومصاب بخيبة امل لحال نيسان المذرى هنا

الخلاصة .. مفيش نيسان تتركب فى السعودية غير الصنى (شكل الاسكالا والتيدا الشكل القديم) .. على فكرة الصنى الجديدة اتعرضت لأول مرة الشرق الاوسط فى دبى من كام يوم
وبالشكل ده وبطبيعة الطرق هنا وحجم العربيات الكبيرة نوعا ما .. انا لقيت السيدان بانواعه اختيار فاااشل مهما كان حجمه كبير (تويوتا كامرى - هوندا اكورد - هيونداى سوناتا - نيسان التيما او ماكسيما) بصراحة العربيات دى هنا زى الفيرنا فى مصر كده بدون مبالغة .. وطبعا فيه ماركات فى مصر طالعين بيها السماء هنا اخرها تاكسى زى الالانترا الشكل القديم - السيراتو قديم وجديد - كامرى - سوناتا شكل قديم
فمن الاخر امامى اختيار واحد هو الكروس اوفر حتى لو كان مش دفع رباعى وبعد ما نزلت ولفيت واتفرجت مفيش غير كيا سبورتاج (هنا عليها ضرب نار واوفر برايس ومتباعة وهى فى المركب وسط البحر قبل ما تنزل الميناء) او هيونداى توسون (هاينزل منها شكل جديد كمان شهر او شهرين تقريبا) والاتنين وجهان لعملة واحدة فى المكونات والموتور والفتيس لكن التصميم مختلف وان كنت اميل للكيا اكثر بعد ما شوفت الاتنين
اسألكم الدعاء بالتوفيق ..