الموضوع: تجنيط بومه ..!!

المشاركة الأصلية كتبت بواسطة Dawns_Mist

حبيب قلبي .. أحمد باشا
والله واحشني .. و نفسي نتقابل قريب
سامع إن الياريس بتاعتك عامله شغل جامد و ناس كتير بتشتكي منك على الطريق

بالنسبة للتجنيط بقى يا باشا .. أنا مش هحط جنط يكون عرضه أقل من 205 لإنه كده بالنسبة لي مش هيكون ليه لزمه لإن الجنط الستوك 15 بوصة و عرضه 195
هو الفجوة عندي تشيل 17 بوصه .. و بالنسبة لحسابات السرعة عملتها على ويب سايت لاقيتها شغاله برضه و الفرق مش هيكون كبير .. بس خايف برضه زي مانت بتقول كده يحك في المطبات خصوصا لو كانت العربية محملة !!
بس أنا ممكن أحط 16 بس يكون البروفايل بتاعه مختلف ... زي جنوط الأوبل الجديدة كده ..
بتكون 16 - 40 - 215 أنا شايف ده هيكون أفضل ثبات للعربية و كمان شكله جميل بس مش عارف مقاسات المسامير عندي تشيل جنوط من النوعية دي ولا لأ ..!! علشان كده كنت مستني حد معاه بومه و يكون جرب الموضوع ده يرد عليا ..
عموما انا هسأل بتوع الجنوط بكره على الموضوع ده لإن النهارده الدنيا مطر و الجو وحش .. و نتقابل غدا إن شاء الله .. و شكرا يا مستر أحمد على الرد السريع و الاهتمام ..

ربنا يخليك يا معلم وانت كمان واحشني اكتر والله

نتقابل في اي وقت يا كبير انت تنورني

والله مافيش حد بيشتكي ولا حاجة ياعم ده انا 1300 على قدي

بالنسبة للتجنيط انت لازم تقلنا المقاس الاستوك عندك كام ؟ ؟ عشان تشوف افضل مقاس للجنط ال 17 او ال 16

لازم تجيب مقاس كاوتش مناسب مع عربيتك عشان مايحصلش مشاكل في قراية العداد وماتلاقيش العربية عليت عن الارض ! بالتالي لازم تتحسب صح عشان ماترجعش تقول ياريت اللى جرى ماكان ! !

بالنسبة للبروفايل 16 - 40 - 215 اعتقد ده برضوا هيسببلك مشاكل مع البلالين لان الارتفاع قليل نوعا ما !

والخوف مش من الحك في المطبات الخوف من الحفر والبلاعات تعملك بلالين وتبوظلك الكاوتش بدري بدري !

عموما انت بس هاتلنا المقاس الاستوك بتاعك ونشوف اقرب مقاس ليك في الجنط ال 17 وال 16 وبعدها نقدر نختار مابينهم

وانصحك تروح تشتري الجنوط من عند ارابكوم لان عنده فعلا تشكيلة ممتازة

المشاركة الأصلية كتبت بواسطة Dawns_Mist

الستوك بتاع البومة 1600 بيكون 15 - 55 - 195
و أنا حسبتها على الويب سايت اللي بيعرف فرق قراية العداد و فرق السرعة القصوى و العزوم
و بالأرقام المقاسات دي كلها مناسبه :
16 - 50 - 205
16 - 45 - 215
17 - 40 - 215

هنقول إن الأخير ده بلاش منه علشان 40 ده قليل و ممكن يبوظ الكاوتش بسرعة فعلا
طيب نقول اللي قبليه ده مناسب بقى أعتقد ؟؟
ولا إيه رأيك يا أبو حميد ؟؟

المقاس 16 - 45 - 215 مقارنة بالمقاس الاستوك عندك

اعتقد انه هيزود المساحة مابين الكاوتش والرفرف الداخلي ! الكارتيرا من جوة وده هيخلي شكل العربية وحش وهتحتاج انك تهبط العربية عشان تحس بجمال الجنط ! ! لان الفردة ال 215/45 كإرتفاع اقل من الاستوك اللى عندك ! طب فرق الارتفاع ده هيروح فين ! ! ؟

عموما انت ممكن تشوف المقاس 215/45/16 عند اي بتاع كاوتش وتتاكد من قصة الارتفاع ولو كدة توكل على الله وخلي بالك من المطبات والحفر عشان انت كدة البروفايل عندك هيبقى قليل !

المقاس 205/50/16 انا شفت كذا بومة مركباه وبيكون شكله ظريف عليها فيه واحدة معايا في الجراش مركبة جنط نفس المقاس ده هصورهالك بكرة في النهار واجبلك الصورة تشوفها

ولو عايز جنط 17 خليك في المقاس

205/40/17

بس تخلي بالك اوي اوي اوي اوي اوي من الحفر والنقر والمطبات

المشاركة الأصلية كتبت بواسطة Dawns_Mist

ياريت ياريت يا أبو حميد تصورلي الجنط اللي عندك في الجراج ده .. تبقى عملت فيا خدمة جامده جدا جدا
يا سلام بقى لو صورة من ورا .. و صورة من الجنب .. علشان برضه يكون عندي تخيل كده ..
معلش أنا هتعبك معايا .. بس هتفرق معايا الصور دي أوي على فكره ..
مش عارف يا حبيب قلبي من غير مشاركاتك في كل المواضيع دي كان هيكون ليها طعم إزاي ..
انت برنس و ربنا ..
و خد مني بقى البوسة دي

حاضر يا باشا من عنيا والله بكرة الصورة تبقى عندك ان شاء الله