الموضوع: تقرير عزل نيسان صني بالكامل علي مرحلتين و تعديلات آخري

تقرير عزل نيسان صني بالكامل علي مرحلتين و تعديلات آخري

طبعا انا اتأخرت كتير جدا ً في كتابة هذا التقرير اللي ان شاء الله هيمتعكم و التقرير هيكون مقسم الي مرحلتين :


المرحلة الاولي : عزل أرضية النيسان صني بالكامل .
المرحلة الثانية : عزل سقف النيسان صني .



أولا ً الاجتماعيات :-


1- شكر من عمق القلب الي الحاج أحمد مشعل مدير شركة جينزكار
2- شكر خاص لأخويا احمد مصطفي منسق قسم نيسان


ثانيا ً الصيانات :


1- عزل ارضية النيسان صني
2- تغلف ابواب نيسان صني
3- تنجيد مخدع اليد

------------------------------------------

"المرحلة الأولي"

أولا ً الاجتماعيات :-


1- شكر من عمق القلب الي الحاج أحمد مشعل مدير شركة جينزكار
بصراحة الواحد مهما كتب و مهما قال علي محبة هذا الرجل العظيم الحاج احمد مشعل عمري ما هوفيه حقه ابدا مش في مواضيع عربيتنا و لكن في اخلاقه العالية و مشاركته الانسانيه .. عايز اقول لكم اني بعد ما وصلت من صيانة اوتوايجيبت .. جاء احمد مصطفي علي جينز كار و اذ بالحاج احمد يحضر لينا غذاء و اكلنا مع بعض عيش و ملح و مش كده و بس تصدقوا لما عرف اني رايح مشوار مهم لتوكيل في سيتي ستارز .. اصر اصرار غير عادي اني اخد عربيته الخاصة و اروح بيها .. بصراحة انا بقيت خجلان جدا من محبته الغير عادية ديه

علي فكرة قابلت كمان الباشمهندس يوسف و الحاجه فاطمه ناس في قمة الذوق و الاخلاق و محبتهم جميلة لكل الناس بصراحة عائلة محبة جدا ً و طبعا مش هنسي التذكار الرائع اللي هداني بيه البشمهندس يوسف من فترة كبيرة و هي امضاء منه علي العشرة جنيهات القديمة .. فاكرينها .. و قالي ساعتها اني بقدمها فعلا للناس اللي بيعزها و بصراحة انا فرحت اوي بالاهداء الجميل ده .

-------------------------

2- شكر خاص لأخويا احمد مصطفي منسق قسم نيسان
احمد ده بقي يا جماعة يعني بجد مخ قسم نيسان و لولاه مكانتش اتعملت فكرة عازل الارضية ديه و علي فكرة في مخه شوية افكار هتعرفوها بعد كده و انا من هنا بشكره جدا جدا علي جدعنته و علي افكاره الجامده ديه و كمان لما بيعرف اني نازل القاهرة بلاقيه انه بيهتم جدا اننا نتقابل في اي ظروف كانت .. بجد يا احمد لولاك مكانش قسم نيسان ده هيبقي ليه المذاق الرائع ده و الموضوعات المثيرة اللي موجودة في القسم و بقت دلوقتي قناة معلومات غزيرة لكل منتدي نايل موتورز لدرجة يا عم ان الاقسام التانيه بقت متغاظة من النجاح اللي حققه قسم نيسان بسببك انت .. ربنا يديك الصحة يا جميل و تفضل كده تدي محبة كده علي طول .

-------------------------

ثانيا ً الصيانات :


1- عزل ارضية النيسان صني
بصراحة يا جماعة عزل ارضية العربية جاءت في الجون صح .. العربية اتبدلت تماما ً و كانت طريقة التركيب ان بيقص اللباد اللي مكون من طبقتين فوق بعض علي اد المكان اللي هيوضع فيه بعد رفع موكيت العربية و الصاج بيكون باين فبيوضع اللباد فوق الصاج مباشرة و بيقوم الفني برفعه بمسافة محترمة لورا الطابلوه و فعلا يا جماعة اصبح صوت ماتور العربية منخفض يعني انخفض بنسبة 70% و انا جربته علي سرعات عالية حتي 130 كيلو/الساعة و كمان جربته كتير مع الكيك داون و فعلا اللي عرف الفرق بدون ما اسأل هي زوجتي لأننا لما طلعنا بالعربية الصبح و احنا مسافرين كنا مستغربين من علو صوت ماتور العربية و خشونته انما في الرجوع الوضع اختلف تماما ً و بقي صوت الماتور منخفض عن الاول بكتير و من الاخر مبقاش في تنعير للماتور زي زمان لكن في حاجه غربية اوي حصلت و هي ان عيوب العربية ابتدأت تبان بجد بعد تركيب عازل اللباد و هي :
صوت هواء من وار العربية ظهر بطريقة ملحوظة و للاسف انا ودني بترخم عليا اوي و خصوصا لما يكون في حاجه في العربية و بالتالي هنروح علي المرحلة اللي بعديها و نشوف العيب اللي ظهر ده من ايه و انا اعتقد شخصيا انه يكون من كاوتش الابواب الخلفية و ده هبتدي ادور له علي حل ان شاء الله.
الحاجة الجميل بجد اللي حصلت هو تقفيل ارضية العربية .. اتقفلت صح الصح و ده بسبب مهارة الفنيين عند الحاج احمد مشعل

-------------------------

2- تغليف ابواب نيسان صني
ديه بقي اللي كانت مفاجأة و هي تغليف باب العربية اللي هي الجزء المثلث الصغير اللي في الباب بنفس لون و درجة فابريكة العربية و الباب اتغير خالص يا جماعة فعلا الجلد بيفرق كتير عن الحتة اللي متركبة في باب العربية اللي كانت بتتوسخ بسرعة جدا و للاسف تنظيفها رخمة جدا لكن بعد ما اتركب الجلد بصراحة فرق شاسع جدا في درجة اضاءة اللون و جماله مع اضاءة العربية مع بقية الباب .. حاجه هتفرحكوا مع الصور ..

-------------------------

3- تنجيد مخدع اليد
دي بقي كانت افتكاسة جميلة جدا جدا و هي تنجيد مخدع اليد اللي بيبقي علي يمين السائق و بجد حاجه محترمة جدا خلي المخدع يوصل لكوع الزراع شوية لأنه علي حوالي 2 سنيمتر عن المقاس الاصلي و بقت طرية جدا و مريحة لكوع الزراع و فعلا لما اتعملت كمان مع نفس لون فرش العربية لاقيتها حاجه شيك جدا جدا و بصراحة الحاج احمد يشكر علي تنفيذه الرائع للفكرة ديه

-------------------------