الموضوع جيه في بالي كل واحد يحكي ايه اطول رحلة مشيها بعربيتة و كانت من فين لفين و ايه الصعوبات اللي قابلته عشان نقدر نستفيد من تجارب بعض و ياريت اللي يحكي يقول نوع العربية و الموديل و امتى حصل الكلام ده

انا حبدا بنفسي لتوضيح الفكرة

السيارة سيفيك si مانيوال موديل 92
سنة 2007

كنت لسة متجوز و قلت يا واد نلف لفة في شهر العسل نروح شرم و بعدين الغردقة

توكلت على الله و اخت طريق الاسماعلية الساعة 9 صباحا تقريبا لحاد ماوصلت للنفق و بعدها مسكت الطريق 140 لحاد ماوصلت شرم الساعة 12:45 الحمد لله كان الطريق تمام ادي كده 490 كم تقريبا

قعدت 4 ايام و كنت عامل حسابي ان فيه في شرم عبارة بتشيل العربية و الركاب و توديهم الغردقة في نص ساعة , علي حظي قالوللي حكاية العربيات اتلغيت الشهر اللي فات عشان في مشكلة حصلت و في عبارة غرقت
المهم انا كنت حاجز في الغردقة و طالبه معايا اروح قولت حروح بالعربية من شرم للغردقة

توكلت على الله الساعة 12 الظهر من شرم بس مشيت براحتي 110 مثلا لحاد ما عديت النفق و اخدت اتجاه الغردقة وصلت العين السخنة على 5 تقريبا لاني وقفت حطيت بنزين في الطريق من بنزينة مجهولة بس كنت مضطر , المهم و انا داخل عاللجنة بتاعت العين السخنة عشان امسك طريق الغردقة لاقيتهم بيقولولي في الجنة العجل مريح و فعلا ببص عليه لاقيت في سابع نومة

طب اعمل ايه .... ركبت الاستبن و روحت بنزينة عشان اصلحه قالي دي افردة ماتت و مافيهاش امل
طب عند فردة نضيفة اركبها قالي اه 200 جنيه (كان مقاس 15) قولتله شكرا طبعا بيستغل عشان منطقه فاضية

طبعا مش حمشي من غير استبن قمت واخد بعضي على القاهرة خدت من واحد صاحبي استيبن و نمت شوية ادي 500 مثلا كمان
صحيت الفجر 3 كده عشان امشي بدور العربية لاقيتها عماله تقطع و تدرب بومب قومت فاكك الرشاشات و انا في الجراج و كان معايا اسبراي نضفت و ركبت تاني(طبعا ده من البنزينة المجهولة ) و مشيت علي 3:45 الفجر كده

المهم عشان مطولش قوي رحت الغردقة قعدت 4 ايام و رجعت و الحمد لله كانت رحلة جميلة ادي كمان 1000 كم

يعني التوتال في الاخر مثلا 2000 كم

طبعا كنت واخد معايا جركل زيت 4 كم و زيت باور و زيت فرامل و كان معايا طقم عده معقول تحسبا لاي ظروف بس الحمد لله محتجتش غير زيت الموتور عشان العربية كانت بتاكل زيت