حادثة فى MY Lovely M11 CAR
السلام عليكم
امبارح نظرا لظروف اضطرارية اضطريت امشى على طريق المنصورة دمياط 6 صباحا فى الشبورة الصعبة بتاعت امبارح دى وكنت مشغل فوانيس الشبورة وماشى بهدوء ومتوخى الحذر لان تقريبا الشبورة مكنتش مخليا حد يشوف كف ايديه واذ فجاة الاقى قدامى ناس كتير قاطعين الطريق بسبب وجود حادثة عالطريق ميكروباص وموتسيكل شغلت انتظارى وهديت عربيتى لحد اما وقفت وكان ورايا واحد محترم هدى هوا كمان والحمدلله وقفنا بسلام واذ فجاة ييجى ميكروباص يخبط بسرعته الى كانت تقريبا 90 يخبط الى ورايا وبالتالى الى ورايا يخبطنى وكانت جامدة جدا لدرجة ان الناس الى كانوا قاطعين الطريق طاروا من قدامى وربنا ستر مخبطتش فى حد فيهم وعلى الفور اخدت سيارتى على الترابة الى فى الجنب اليمين وبدات السيارات تتوالى خبط ورا بعضه لدرجة ان الطريق كان مليان ازاز وفوانيس واكصدامات وكان فية اصابات واسعاف والحمدلله محدش مات بس كان فية اصابات خطيرة طبعا بعد كل الذهول دة مكنتش بصيت على عربيتى لانها كانت تقريبا اقل الخساير لانها ورا بس والباقى كله ورا وقدام وعلشان مصدعكمش بحكايتى ....
الخساير كانت فانوس خلفى يمين
واكصدام خلفى طبعا
والشنطة اتطبقت لدرجة انها سمعت فى الشاسية من تحت ودى اصعب حاجة فيها
فانا مش عارف الصراحة اوديها التوكيل ولا اشوف سمكرى محترم واخلص نفسى بدل مادخل فى حوار التامين الى ملوش اول من اخر وبتعذب على ماخد فلوسى غير الوقت الى بتتعاين فية العربية .. وبالمناسبة انا اشتريت فانوس يمين خلفى بصعوبة وكان عامل 250 جنية .