المشاركة الأصلية كتبت بواسطة benmatar
السلام عليكم
نصيحة لحضرتك خليك في المضمون والسهل والمنتشر والشائع والدارج ............ إلى آخــــــــره
يعني إيه الكلام ده؟؟؟؟
أنصح حضرتك بتركيب موتور كامل بالفيتيس استيراد حالة جيدة وعلى التجربة، ميكونش هيغلبك ويتعبك في قطع الغيار والصيانات ...... إزاي؟؟؟؟؟
يعني مثلا ممكن تلاقي موتور سكودا فيليشيا استيراد 1600 حقن الكتروني، طبعا الله أكبر عليه عنيف بس...... مش هتلاقي قطع غياره وأجزاؤه عشان كل الفيليشيا اللي نزلت مصر 1300 كربريتور أو انجكشن. وكمان سمعت إن تركيب موتور أوكتافيا بس مش a4 وإنما الشكل القديم محتمل، بس هتعمل تغيير في قواعد الموتور والفيتيس وتغيير لكل الفرامل من طنابير وديسكات وتغير علبة الدركسيون العادية لباور والدنيا هتبقى مزنوقة ودوخة والصيانات هتتعبك وطبعا هتجنن الميكانيكي عشان حوض الفيفوريت غير الأوكتافيا تماما. أما من ناحية المرور والترخيص مينفعش تركب موتور ماركة مكان ماركة تانية يعني ماينفعش أجيب موتور أوبل مكان موتور سكودا، المهم يكون موتور سكودا مش مشكلة حتى لو فانتازيا (من الناحية المرورية والقانونية).
أنصح حضرتك عشان تشتري دماغك وتريح جيبك وبالك إنك تتوكل على الله وتشتري موتور كامل بضفيرته وتغذيته واكسسواراته سكودا فيليشيا كربريتور أو انجكشن 1300، وقطع غياره متوفره ومنتشرة واسعارها عادية تماما وبدون أي تعقيدات ومناورات ووجع قلب، سعره يبدأ من 3000-4000ج.م كامل بمشتملاته، واحتمال تستغرب لو عرفت إن العادي ممكن يكون أغلى من الانجكشن بحوالي 500ج.م عشان بيمشي ببنزين 80 وأجزاؤه منتشره ورخيصة، ولما ربنا يكرمك بالموتور هتشتري سيور وزيوت وفلاتر وقواعد موتور وقواعد فيتيس وطقم دبرياج ساكس ألماني جديد وتركبه بدون تعديلات خلال يوم كامل عند فني سكودا محترم، واتفرج على عودة الوحش الكاسر للشوارع المصرية. وبالتوفيق