الموضوع: للافادة العامة بالصور والمعلومات .. توضــيح وتعــريف مفاهــيم ظــبط زوايـا العـجل

السلام عليكم يا صقور اتمنى تكونوا في تمام الصحة والعافية
بمناسبة موضوع الحدفة الشمال اللي في الصني قولت اعمل موضوع بسيط كده عن زوايا العجل في العربيات وطبعا الموضوع ده اكيد في ناس كتير من الاعضاء الكرام عرفينوا من غير مأقول ....... ما شاء الله ناس مثقفة ومُطلعة ولي الشرف اني اتعرفت عليهم.

زوايا العجل هي :
زاوية الكامبرCamber
زاوية الكاستر Caster
زاوية ال Toe-in
زاوية ال Toe-out
زاوية ال King Pin

أولا: زاوية الكامبر:
وهي ميل العجلة على الارض زي ما هو في الرسمة

لو تخيلنا ان العجلة (Positive Camber) ماشية من غير تثبيت كأنك فكتها من العربية وبتجرها قدامك وهى مايلة يمين كدة تفتكر حتفضل ماشية في خط مستقيم ؟؟؟
الاجابة لا ,في الواقع ان العجلة حتنحرف الى اليمين
معنى كدة ان لو عجلتين (Positive Camber) قصاد بعض لو مش مثبتين حيبعدوا عن بعض يعني اليمين حتنحرف يمين والشمال حتنحرف شمال
والعجلتين (Negative Camber) حيقربوا من بعض , صح الكلام؟؟؟؟؟
وبالتالي العجلة على ال(positive camber) حتتاكل بالمنظر ده
عشان ماشية على جنب واحد (الجنب اليمين) ,تمام؟؟؟

ثانيا: زاوية ال Toe-in :
وهي زاوية "لم المقدمة"

لو تخيلنا ان العجلتين اللي في الصورة دي مش متثبتين في العربية
اكيد حيقربوا من بعض, صح؟؟؟؟
والعجلة الشمال في العربية دي حتتاكل بامنظر ده ,كلام سليم؟؟؟

عشان الاحتكاك

ثالثا: زاوية ال Toe-out :
ودي عكس اللي قبلها بالضبط
ودي بتبقى في الملفات غالبا لان مفيش مقدمة مفتوحة
لو العجل مكسور ناحية الشمال حتلاقي العجلة الشمال
كسرتها اكبر من العجلة اليمين
عشان لو حصل العكس العربية حتتقلب

رابعا: زاوية الكاستر Castor :
وهي زاوية ميل المساعد على المحور الرأسي في الغالب (زاوية ميل الخط الواصل بين نقطة تثبيت المساعد في هيكل السيارة ومركز العجلة على المحور الرأسي )

خامسا: زاوية ال King Pin :
دي كفايا الصورة عشان مش عارف اوصفها

ودي اللي بتخلي العجل في العربيات الالماني يميل للخارج في الملفات

عشان كده في العربية
العجل الامامي:
Positive Camber+Toe-in
عشان زي ما قولنا Positive Camber حيبعدوا عن بعض
والToe-in يقربوا من بعض فيحصل توازن
العجل الخلفي:
Negative Camber
عشان ثبات العربية وكل ما تزيد الكامبر كل ما يزيد الثبات بس على حساب الكاوتش

وعشان كده لما بيبدل التوكيل اماكن العجل بيجيب اللي ورا يمين-قدام شمال & اللي ورا شمال-قدام يمين
عشان يبقى الحمل على الجنب اللي مش متاكل

وسامحوني الصور صغيرة بس انا مش عارف اكبرها اصلا ياريت لو حد يقولي بتكبر ازاي
ومعلش طولت عليكم تحياتــــــــــــــــــــ ـــي

ايه يا عم أيمن الجمال والحلاوة دي ده انا طول عمري نفسي افهم موضوع الزوايا ده وملقيتشي اللي يفهمولي الف شكر ليك يا باشا على الشرح الحلو ده.