العربيه عطلانه في اكتوبر وانا من اسكندرية .. ساعدوني :s

السلام عليكم اخواني الكرام \انا معايا مونديو ٩٨
امبارح وانا باخد يوترن سمعت صوت عالي مع لفة الدركسيون ،، بصيت على قربة زيت الباور لقيتها فاضيه خالص .. جبت زيت باور وفضيت العبوة ومشيت شويه وعملت كده تاني برضو ..

المشكلة اني من اسكندرية وشغال في اكتوبر والميكانيكي بتاعي في اسكندرية وماعرفش حد خالص في اكتوبر رحت لواحد ميكانيكي ورا "علي الدين" اللي بعد فودافون ده اسمه محمد الشرقاوي قالي هات الدركسيون يمين شمال سم ع الصوت قالي علبة الدركسيون بتجيب زيت غيرها او روح اعملها في شمبليون بس هتبوظ تاني ..

رحت لواحد تاني في الحي ال١٢ قالي دي طلمبة الدركسيون بتجيب زيت ! مش عارف ايه طلمبة الدركسيون دي وهل هي علبة الدركسيون ولا لأ ،، المهم قالولي الاتنين دي عفشه وروح عند واحد اسمع دنجل تقريبا وورا مرور اكتوبر ..

رحتله مالقتهوش ولقيت شاب صغير بص عالعربيه وقالي لف الدركسون يمين شمال سمع الصوت دي علبة دركسيون روح هاتلي واحده اركبهالك ،، واحد صاحبي معاه دايو قالي حصلتلي وكانت المشكلة اورسيل حتة جلده كده هي اللي بتجيب زيت وبتتغير ..

دلوقتي انا عايز اعرف الاتي :
١- حد في اكتوبر متخصص في الفورد يشخصلي المشلكة بشكل دقيق ونهائي لاني ما ينفعش اطلع بالعربيه بره اكتوبر لاني بارود زيت باور كل ٥ كيلو تقريبا واحيانا اقل فخراب بيوت

٢- اقدر الاقي فين قطع غيار مونديو في اكتوبر وايه رأيكم في التوكيل وهل اروحله ولا لأ ولو هيكشف بس هياخ فلوس ؟

انا اعصابي بايظه وحاسس اني محتاس ،مش عارف عفشحي كويس ولا عارف ادور فين حته على القطع ومش قادر اصلا اتحرك بالعربيه كتير ولو خدتها على كساحه اسكنديه مش اقل من ٧٠٠ جنيه.. ساعدوني الله يكرمكم

روح للتوكيل صنايعيه اكتوبر زفت

التوكيل اللي في اكتوبر فين ؟

انا متفق معك جدا ان صنايعية اكتوبر زفت , وبيحبوا يستكشفوا لو مش عارفين حاجه وكله على حساب عربيتك اجمالا همه شوية صبيان صنايعية لقوا ايجار المحلات رخيص في اكتوبر ومعظمهم من الاقاليم وخبرتهم محدوده جدا

المشكلة ممكن يكون ليها أكتر من سبب
1- طرمبة الباور
2- علبة الدركسيون
3- بلف فى الطرمبة
و الأخيرة دى حصلت معايا فى عربية أوبل فيكترا........و غيرت بسببها 5 علب دركسيون منهم واحدة جديدة....و كلهم ضربو تانى...........اللى جابلى الخلاصة كان مركز أوبل معتمد......قصدى بس أفهمك أن التشخيص أهم حاجة عندك.

أنا لو مكانك......هروح التوكيل يكشفو عليها و ياخدو فلوس.........و بعد ما تعرف أيه المشكلة قولهم أنك هترجع يوم تانى تعملها و بعد كده أعملها برة.

المنطقه الصناعيه بعد اخبار البوم روح اسال هناك اوعى تروح لصنايعيه اكتوبر كلهم فيوميه ومبيفهموش حاجه فى العربيات العاديه فمابالك بالفورد

امشي بالعربية من غير زيت باور كانها عادة
وروح مركز تكنو بوش في الحرفيين متخصصين فورد وعندهم قطع غيارها اكتر من التوكيل
وكلم مدير المركز احمد الشحات تليفونة 01001400940
ولو في مشكلة كلمني فورا
01001263030
كريم منير
وكان الله في عونك

معانا المهندس سطوحى في القسم هنا هو في اكتوبر و معاه مونديو اوتو
اتصل بيه و هو يفيدك عن حد كويس في اكتوبر

أستاذ احمد مسعود كلامك ريحني كتير جزاك الله خيرا

استاذ احمد كردي, كلاامك مضبوط جدا وانصح عن تجربه ان محدش يتعامل معاهم خالص دول عالم اخرهم يشتغلوا في العربيان النص نقل فضلا عن الملاكي

استاذ كريم منير انا فعلا مرتاح اني اروح الحرفيين بس في مشكلتين
اولا العربيه من غير زيت دركسيون بتبطل تلف يمين وشمال خااالص وصوت الدركسيون بيعلى كل ما احركه اقل حركه وباسمع صوت التروس الناشفه بتلف على بعضها عموما معنديش مشكله ازود زيت بس اوصل لحد مضمون

ثانيا انا اعرف من اكتوبر اطلع المحور والدائري اعمل ايه بقى بعد كده عشان اروح الحرفيين وهل هي بعيده ولا لا عشان اعمل حسابي في زيت كفايه -انا اتبهدلت مصاريف زيت دركسيون- بس كله يهون في سبيل اني اوصل لميكانيكي مونديو شاطر

الاخ ayaboy ممكن طيب توصلني بالاستاذ سطوحي واكون شاكر ليك جدا

لو هتروح من أكتوبر للحرفين.........أطلع الدائرى فى إتجاه الإسماعيلية.........و أخرج من مخرج طريق الإسماعيلية فى إتجاه القاهرة.....بعد حوالى5 كيلو الحرفيين هتكون على يمينك.

المسافة الإجمالية حوالى 60 كيلو لو أنا فاكر صح.

زي ما قال احمد عبد المقصود محور دائري قبل ماتنزل منزل المطار هاتكون شفت يافطة المركز
بين 60 الى 70 كم فعلا
هما اكت رناس فاهمة فورد في مصر بدون مبالغة هاتشوف كمية المونديو والاكسبلورر والاكسبديشن والفيستا اللي واقفين
وتقدر تكلمهم تسالهم

اقتباس:

---

المشاركة الأصلية كتبت بواسطة hmghamry

الاخ ayaboy ممكن طيب توصلني بالاستاذ سطوحي واكون شاكر ليك جدا

---

http://www.nilemotors.net/Nile/72698-a.html
ده موضوع فيه ارقام كل الناس الي راكبة فورد في المنتدي تقريبا و فيه رقم مهندس سطوحي و على فكرة هو شغال في مجال السيارات هايوصلك لحل ان شاء الله
و برده خلي بالك الاسكاترا صعب توصل لحد انها تفضي الزيت على طول
ممكن لو عاوز توصل لاي مكان تشتري كمية زيت كبيرة من اي نوع رخيص بس برده حاول تاكد ان الخراطيم مش هيا الي مسربة

انصحك تروح لاحمد فرج في الحرفين كانت عندي نفس المشكلة في الاسكورت واكتر من ميكانيكي قلولي غير علبة الدركسيون سئلت عليها لقيتها ب1000 جنية استيراد رحت لاحمد الله يكرمو غيرلي اولسيهين ب 20 جنية ومن ساعتها والحمد لله مزودتش نقتة زيت باور تاني.
وهوا في محطة الجراش في شارع جسر السويس قبل الحرفين بشوية.

باشا كلمني
٠١٠٠٦٠٧١٦٣٤

انا كلمت اشرف اللي حد حطلي رقمه هنا مشكورا والراجل رد وقالي انه شغال في التوكيل وفعلا جالي وبص على العربيه وكشف عالمواسير بتاعتها لقاها جافه تماما وقال المشكله في العلبه وسعرها ١٠٠٠ والمصنعية ١٥٠ والتصليح في ورشه في المعادي في صقر قريش ،، قلتله على بركة الله مادام ده الحل الوحيد .. بالليل قالي انه لقى حاجه ب٨٠٠ استيراد وبعتني لميكانيكي اخوه اسمه سيد في صقر قريش وركبها في حوالي ساعتين واشتغلت كويس الحمد لله بس لسه ما شفتش اداءها برغم اني سافرت بعد ما ركبتها اسكندريه بس عشان الطريق مفهوش لف كتير ..

قالي ابقى غير حاجتين كده مش فاكر اسمهم بس اللي همه بيبقوا في اطراف علبة الدركسيون بيركبوا في العجل .. قلتله مش المفروض دول يبقوا كويسين قالي همه كويسين بس الجديد بيبقى ماسك نفسه وانشف من المستعمل .

وقالي حاجه كمان اني لازم اغسل العفشه كويس عشان الزيت بيعمل تآكل في الكاوتش اللي في العفشه .

اشكركم جدااااا ولو في جديد هابلغكم باذن الله ...