انا عاوز اشتري افيو 2012 مع العلم اني لسه متعلم السواقة جديد ومعايا 20 الف وقسط 1500 ينفع اجيب افيو بس خايف من الكلام الي بسمعه عن التوكيل ومشاكل العربية نفسها :praying:
عرض للطباعة
انا عاوز اشتري افيو 2012 مع العلم اني لسه متعلم السواقة جديد ومعايا 20 الف وقسط 1500 ينفع اجيب افيو بس خايف من الكلام الي بسمعه عن التوكيل ومشاكل العربية نفسها :praying:
واللة انا في نفس الحيرة بس انا كان معايا 128 وعاوز اجيب الافيو
انا النهاردة سوقت عربية واحد صحبي اتومتك عربية جميلة فعلا وهو بيشكر فيها بس كل الاراء في المنتدي تقريبا بتقول انها عربية سيئة واللة اعلم
بصراحة انا احسها انها عملية جدا على قد سعرها
لكن العربية بتسخن بطريقة فظيعة كنا مسافرين بيها باليل و كنت راكب بجوار السائق ( صاحبى ) و السخونة طالعة على رجلى
مش عارف يا جماعة واحد صاحبي برده جابها وبيشكر فيها قوي وكل الناس هنا عمال تقول مش حلو عليها
من خلال اطلاعي علي المنتدي ناس كتيير قوي بتقول ابعد عنها
بلاش افيو حتى لو كويسه لان سعرها عالى , انت بتمن الافيو الفاضيه مانيوال ممكن تجيب فيرنا اوتوماتيك او لوجان اوتوماتيك
طب هي احسن ولا الصني والهيونداي اكسينت rb
الصنى والأكسنت أفضل منها والصنى فئة أعلى من الأكسنت
الافيو كويسه جدا بالنسبه لسعرها ووسعها من جوه الاسعار دلوقتى فى العربيات الجديده عاليه اوى وهى معايا من 2007 اسعار قطع الغيار غاليه فى التوكيل ورخيصه جدا بره التوكيل بس مشكلتها الوحيده فى العفشه خشنه اوى بس مش وحشه مقبوله الى حدا ما انا ارجحها عشان سعرها وابعد عن اللوجان مش حلوه من ناحيه الكماليات وقطع الغيار واعاده البيع بس سعرها مغرى جدا بصراحه فمقبوله بالنسبالى جدا من هذه الناحيه بس الافيو حتنبسط بيها اكتر من اللوجان
انا معايا افيو 2012 عربية 10/10 عالية عن الارض - قطع غيار رخيصة - موفرة جدا في البنزين - البور ناعم - العفشة انا شايف انها جيدة جدا - اعادة البيع الافيو مطلوبة - شكلها شيك جددا بالفامية - وسعة من الداخل والشنطة كبيرة
قد يوجد مشكلة في rbm انت وحظك
انا رائي قدام انت لسة مببتدئ لا انصحك علي الاطلاق انك تجيب زيرو خالص
اما لو الموضوع مشعش ف دماغ وحابب تخوض التجربة يبقي خليك ف الحنين
هات لانوس او فيرنا
وانا شخصيا انصحك بلانوس
مصريفها هتبقي حنينة عليك وقطع غيرها موجودة وقسطها هيبقي كويس
ودة رائي الشخصي
وبالتوفيق ف القرار السليم
بص ياباشا نصيحه اخويه ابعد عن الافيو او الزيرو دلوقتي طالما انت لسه متعلم سواقه هاتلك 128 اتعلم عليها سنه او سنتين وبعدين فكر فى الزيرو ولو هتجيب زيرو خليك فى الفيرنا بلاش الشيفروليه لانوس علشان فيه كتير بيشتكو منها وبلاش الافيو ليه علشان ابسط حاجه فيها ان قطع غيارها هتبقي غاليه عليك وانت كمان بتدفع اقساط فهتلاقي الموضوع معاك مكلف وبالاخص انك لسه متعلم سواقه وركز على النقطه دي علشان انا اول لما اتعلمت جبت عربيه زيرو واتبهدلت مني المهم يعني خليك فى ال 128 لحد متتعلم سواقه وتفهم فى الميكانيكا وازاي تحافظ على عربيتك وتمشي فى شوارع مصر
يا جماعة احنا في 2012 و جميع المشاكل كانت في موديلات 2008-2010 و حوار الفيشة tps خلاص إتحلت
و الأعضاء اللي بيقولو جيب فيرنا حرام عليكو .. ديه عربية خفيفة جداً و بتعوم الماتور هو الحاجة الوحيدة اللي حلوة فالعربية
و اللوجان عالية أوي من ورا و بردو بتعوم و مفيش سبات خالص ليها
اكسنت rb حلوة بس توكيل مش أوي
بص إبعد عنها خصوصا إنك لسه جديد
العربيه دي الي يقول عليها كويسه يبقى حاجة من الإتنين
1)حظه حلو قوي ووقع في عربيه من كل 100 عربيه الي بتطلع سليمه وبقيت ال99 فيهم مشاكل
2) يا ملوش في العربيات غير وسيله مواصلات ولو بايظة ولا هياخد باله (زي أختي مثلا)
غير ال2 الي فوق هيجبلك كل المشاكل الي فيها والعربيه دي للأسف عشان انا بفهم شويه في العربيات كرهتني في نفسي (وكنت هموت بسببها كذا مره)
الصراحة انا احترت قوي وبدأت أكره العربيات مفيش عربية عدلة كل لما أسال علي عربية يطلع فيها حاجات تزهق مش عارف خالص أخد قرار
را ى الشخصى مافيش عربية خاليه من المشاكل و لو جبت عربيه كل الناس بيقولو انها تحفة و انت مش متقبلها حتكرها توكل على الله و هات العربية اللى عاجباك و مرتاحلها لو فيها كل المشاكل و انت حابب العربية و لا حيفرق معاك و كل حاجة اصلا ليها حل توكل على الله و استخيره و ربنا يوفقك للى فيه الخير ان شاء الله.
يا باشا انت تاعب نفسك ليه بص انت لو من النوع اللى بتفكر كتير زيي انا هديلك شويه اسأله جاوب عليهم مع نفسك وانت هتختار الانسب ليك:
1- انا بعرف اسوق كويس وهعرف احافظ على العربيه من حمير السواقه اللى فى الشارع وسواقين المكروباصات ولا لاء؟
2- معايا فلوس كام واقدر اختار مابين كام عربيه على حسب حدود امكانياتى اللى تخليني فى الشهر عايش مستريح ومش مزنوق ولو جالى ظرف محتاج فلوس "مش شرط ظرف وحش فى ظروف كتير حلوه مثلا هتخطب يا سيدي ;)"
3-بعد ملقيت كام عربيه اقدر اختار اي واحده فيهم انزل شارع دمشق واسأل على قطع الغيار بكام او ادور على النت ولازم اكلم التوكيل بردو واعرف قطع الغيار بكام "ركز على الحاجات المهمه اللى فى ميكانيكه العربيه والعفشه والصاج بتاع العربيه والفوانيس والاكصدامات"
4- قارن مابين اكتر عربيه عجباك واكتر عربيه قطع غيارها رخيصه.
5- استخير ربنا على العربيتين دول "معلش الاستخاره جت رقم 5 علشان هتكون رسيت على عربيتين ان شاء الله فى النقطه دي ومكنش ينفع تيجي رقم 1 علشان انت لسه بتشوف اصلا العربيات وامكانياتك"
6- اسأل الناس كويس اوي ولف على منتديات العربيات علشان تعرف عيوم ومميزات كل عربيه ايه وتوكيل العربيه ايه ظروفه.
.... نصيحه بلاش تاخد بشكل العربيه الحلو وركز على الحاجه اللى هتعيش معاك حياتك ان شاء الله من غير مشاكل.
7- اتوكل على الله واشتري العربيه اللى مناسبه ليك والف مبروك مقدما ياباشا.
انا بردو كنت عايز احكيلك على موقف كده معايا على شيفروليه.... بص يا سيدي انا كان معايا سيراتو 2010 وكانت زيرو بس مانويال اتجننت فى عقلى وبعتها علشان اجيب عربيه اتوماتيك علشان زحمه شوارع القاهره فى وقت الخروج من الشغل المهم ياباشا نزلت السوق بتاع السيارات ولفيت كتير وجبت كروز 2010 بس انا غلط غلطه عمري عارف ايه هيا:
مسألتش على اهم قطع ميكانيكا فى العربيه بكام ومسألتش اراء الناس عنها ايه لان للاسف مكنتش اعرف حد راكبها ولا فى المنتديات كاتبين كلام كتير عنها او مشاكل بتظهر فيها...
المهم اشتريتها وكشفت عليها فى توكيل منصور وطلع تقرير بان العربيه زي الفل.. وانا ماشي بيها حسيت فى مشكله فى الفتيس روحت ياسين منصور كشف عليها وقالى العربيه تمام زي الفل انت اللى مش متعود عليها "طبعا كل ده فى فلوس بتدفع كده وانت زي الشاطر بتدفع لانك مضطر" ....المهم يا سيدي خدها وروحت على مركز اسمو توب كواليتي فى مدينه نصر قالى العربيه ناقصه زيت فتيس وهو ده اللى مسببلك مشاكل "طبعا انت لو مكاني كنت هتعمل صوت مش كويس" ليه بقي..... لان العربيه محدش اكتشف فى منصور بييييييييييييييه ان العربيه ناقصه زيت فتيس ومحدش كشف عليه اصلا لانهم عالم .... خساره فيهم الشتيمه وياسين نفس النظام بردو مع اني روحتلو مرتين مهانش عليهم يكشفوا على زيت الفتيس والعربيه دلوقتي مركونه ومستني زيت الفتيس يوصل مصر علشان مبينزلش الا من عند منصور بيه بس اللى واخد الاحتكار لزيت الفتيس بتاع الكروز وكل ده والعربيه مركونه فى الجراج ومقضيها مواصلات وبهدله علشان توكيل اللى شغالين فيه مابيفهموش ودي اقل حاجه تتقال عليهم ومركز معتمد مافيهوش ناس عندها ضمير وبتفهم ................ ده يا سيدي حكايتي مع شيفروليه وللعلم انا كنت قاعد مع مهندس الاستقبال بتاع ياسين قالى الافيو والانوس فيهم مشاكل كتير وبيخلوا الواحد يتعلم الكفت فركز علشان متغلطش غلطتي تاني .... دور بقي كويس اوي ومتستعجلش فى اختيارك
يا جماعة عاوز حد يفهمنا الافيو حسب رائ اعضاء المنتدي اسوء عربية ممكن تجدها في حياتك ومع ذلك بتمشي تتكعبل فيها في الشارع لم اجد شارع يخلو من عربية افيو فهي منتشرة انتشار كبير جدا فكيف ؟؟؟؟؟
عربية سيئة اوي جدا كدة زي منتو بتقولو منتشرة هذا الانتشار اكيد في حاجة غلط؟؟؟؟
السعر الرخيص , الاعلانات , الشكل الاشيك من بعض العربيات فى فئتها زى اللانوس والفيرنا مثلا
الاسبيرانزا 516 برضه من العربيات المنتشره انتشار رهيب , فى ناس كتير كرهت اليوم اللى جابتها فيه وناس بتشكر فيها ومعندهاش عيوب , يعنى من العربيات اللى عليها اختلاف كبير
اى حد عايز يشترى يسأل ويسمع ويشوف هايقتنع بانهى كلام وياخد قراره , عشان هايبقى هو الوحيد المسئول عن النتيجه وهو اللى هايدفع :)
وزي ما قلت في مشاركتي الي فاتت عن النوعين الي معاهم العربيه
ومتنساش إن كتير من ملاك الأفيو جيين من عربيات أقل أو عربيات قديمه فمش هيحسوا بمشاكلها على عكس الي كان راكب عربيات أعلى ونزلها
وأكبر دليل على كده إن في مره من المرات الي كنت في التوكيل قبل ما ابيع العربيه مهندس هناك بيقولي أصلك مش متعود تركب عربيات نضيفة (بلاش أقولكم رديت عليه قلتله إيه)
+1
وبعدين ياباشا انت عارف يعني ايه عربيه ميتكشفش على زيت الفتيس بتاعها فى توكيل ومركز معتمد وعارف يعني ايه عربيه اوتو او مانويال حتي تمشي من غير زيت فتيس وعارف يعني ايه يطلع من توكيل منصور ان العربيه زى الفل والعربيه ميكونش فيها زيت فتيس وتكون واخده خبطه فى القنطره ومرحله المساعد ويقولى العربيه سليمه زي الفل والخبطه دي مش مأثره فى اي حاجه واخد العربيه اكشف عليها زووايا بعد مالبستها والواد بتاع الزوايا يقولى دي محتاجه زراجين عجل ياباشا ويقيسلى الفرق مابين الكاوتشتين وتكون فعلا كاوتشه مرحله وفارقه عن كاوتشه تانيه ........... عايز اعرف رأيك انت بقي وخد بالك دي كروز امال لو كانت لانوس كان هيحصل ايه ؟؟؟؟
بصفة عامة كل عربية لها مميزات وعيوب يعرفها أصحابها حكاية جاي من عربية أقل لعربية أعلي فده كلام مش عملي لإن العملية سواقة وإحساس بالعربية لأ أكتر ولا أقل ... وبعدين حد يقولي مية الأفيو منتشرة تاكسي في البلد وإنتم عارفين التاكسي عايز عربية مواصفاتها أيه. وإذا كان توكيل منصور فيه عيوب طيب إسألوا مالكي الهيونداي عن غبور. وسلم لي علي المترو.
الاخ الكريم كل العربيات في مصر ليها مزياها وعيوبها
حتي لو 516 زي اللي معايا
انا شايفها افضل من عربيات اغلي منها في السعر ب30000 جنيه ومقتنع بيها جدا
شوف احتياجاتك ايه من العربيه وامكانياتك الماديه
المنتدي مليان كلام علي الافيو
وانها عربيه حقيره
ومع ذلك محققه مركز متقدم جدا جدا في مبيعات السيارت العام الماضي في مصر
نفس الكلام علي الفيرنا
نفس الكلام علي ال 516
نفس الكلام علي الانوس
السيراتو
ومع ذلك عربيات مغرقه الشوارع في مصر
البعض يديك راءي باعتبارهم نخبه في عالم العربيات ومايتنازلش عن عربيه فيها اعلي المواصفات لكنها غير موجوده
والاخر يدك راءي عملي بحت
مكسب وخساره
والعربيه هاتحقق المطلوب منها ولا مش هاتحققه
شوف الانسب ليك وقناعتك الشخصيه
طب بالمناسبة توكيل منصور ده كويس والمركاز الي تبعه المعتمدة كويسة برده ولا ايه نظامها
بص ناس هنا شكرت في فرع التجمع الخامس و فرع بتاع مدينة نصر اللي ورا مدرسة المنهل
أحسن حاجة تروح فرع الرئيسي بتاع منصور اللي في الهرم ... علشان لو مهندس الإستقبال ألك حاجة و إنت مش عجباك عندك المديرين و الإدارة تكلمهم و كمان في واحد من جنرال موتورز عندو مكتب هناك علشان لو بتوع منصور حابو يكلموه على حوار الضمان
لو عاوز حاجة جوا القاهرة خليك في الطيران علشان بردو ده فيه مهندسين من منصور