زيارة لمركز خدمة أوتو ايجبت
السلام عليكم جميعاً أعضاء قسم نيسان الكرام.
الحمد لله ربنا وفقني واشتريت تيدا 2011 من حوالي شهر ونصف تقريبا من معرض أوتو ايجبت المهندسين بعد بحث واستقصاء كبيرين، وكان الاختيار هو تيدا 2011 هاتشباك فتحة سقف نظرا لوجود تخفيض كويس في سعر السيارة.
وطبعا انا كنت سألت على التيدا في القسم هنا قبل كدا والناس بصراحة كانوا أكثر من متعاونين، فكنت رايح هناك وانا مطمئن. وانا مش هتكلم على احمد مصطفى كتير عشان أشكره، بس هقول انه مكانش يعرفني واتصل بيا بعد ماجاب نمرتي من المعرض عشان يتطمن ان كل حاجة تمام وان المنتدى وأعضائه ليهم معاملة متميزة. ربنا يباركلك يا احمد ويجعله في ميزان حسناتك.
طبعا السيارة لسة في مرحلة أول 1000 كم ، وبالتالي في التليين. بس للأسف ظهرت بعض المشاكل وشوية ملاحظات على السيارة في هذه الفترة.
أولاً: المشاكل
- المشكلة الأساسية: وهي إن العربية مكانتش تقريبا بتدور من غير ماخدلها وصلة من عربية تانية في الجراج.!! .... والأدهى إني بكون مدورها الصبح، واجي بعد الظهر أدورها ماتدورش ...!
- مشكلة صوت طقطقة من التابلوه في المطبات (خصوصا ما يسمى عين القطة) مع العلم اني مبجريش على المطبات دي، والصوت كان مزعج ومحسسني ان التابلوه مفستك.
ثانيا: الملاحظات
- ذراع غيار الفتيس بيتحرك من D إلى 2 بدون الضغط على الزر الجانبي ، وعند التحرك من 2 إلى 1 لابد من الضغط على الزر ، وده عكس اللي مكتوب في الكتالوج وعكس الوضع اللي كان في عربيتي القديمة.
- زر فتح زجاج السائق بيشتغل أتوماتيك في الفتح بس ، القفل لا.
- ساعات كنت بسمع صفارة خفيفة من الفرامل ، وصوت طقة مكتومة لما أشيل رجلي من على الفرامل والعربية على D.
أنا قولت لازم أروح التوكيل يشوفوا المواضيع دي كلها لأن العربية في الضمان طبعا. فاتصلت بمركز خدمة أوتو ايجيبت وحجزت يوم السبت (امبارح).
وفعلا روحت ووصلت الساعة 9:15 واستلموا مني العربية مباشرة وخدت شنطة صغيرة كدا هدية...:verygood:
المهم، قابلني مهندس الاستقبال وشرحتله كل حاجة ، والراجل سمع مني للآخر وقالي متقلقش اتفضل في الاستراحة واداني كوبونات المشروبات والاكل. وبالمرة طلبت تركيب حساسات الركن والدواسات الهدية من المعرض أثناء شراء السيارة.
دخلت قعدت في الاستراحة ، ولاحظت أنها فعلا مكان محترم جدا .... للأسباب الآتية:
- العميل بيكون شايف الورشة والعربيات من خلف الزجاج.
- شاشة عرض عليها حالة كل سيارة دخلت المركز بدءا من استلامها وحتى غسيلها وتسليمها للعميل عشان كل عميل يكون عارف عربيته في أي مرحلة.
- شاشة تلفزيون.
- شبكة WiFi للعملاء للدخول على الإنترنت.
- كافتريا.
- حمامات نظيفة.
قعدت منتظر وقلقان لأني مكنتش شايف العربية في الورشة لأنهم كانوا شغالين فيها في مكان تاني ، وضيعت الوقت في قراءة الجرائد ، وبعدين قابلت مهندس الاستقبال تاني وسألته ايه الاخبار؟ فقاللي فعلا البطارية كان فيها مشكلة واتغيرت بواحدة جديدة، وقاللي الفنيين بيشوفوا بقية المشاكل اللي قلتلهم عليها وبيركبوا حساسات الركن اللي طلبتها.
المهم كل حاجة خلصت على الساعة 1 ظهرا تقريبا، وكان الشغل اللي اتعمل في العربية كالآتي:
- تغيير البطارية بواحدة جديدة جافة عليها ضمان سنة.
- فك التابلوه وتركيبه جيدا.
- التيل كويس والفرامل تمام وتم تنظيف الفرامل بالاسبراي.
- تركيب حساسات الركن.
- غسيل السيارة.
أما بالنسبة لمسألة ذراع الفتيس وزر الزجاج الاتوماتيك، فقالي ان هو دا الطبيعي بتاع الاتنين، فقلتله ان دا عكس المكتوب في كتالوج السيارة، فكان رده ان الكتالوج بيكون لجميع الدول بمختلف المواصفات اللي موجودة ، فممكن يكون كلام الكتالوج في النقطتين دول على عربيات مصنعة لدول تانية....
المهم وصلنا لمرحلة الاستلام .... ونظرا لكون العربية في الضمان ، مدفعتش حاجة. فأخدت العربية ومشيت..
ملاحظاتي على المركز:
الناس هناك ذوق جدا في الاستقبال والمعاملة وخصوصا مهندسي الاستقبال، كلهم تحس في وشهم البشاشة والاحترام.
استراحة العملاء ممتازة ومريحة. (وفي للأطفال مكان يلعبوا فيه)
احترام العميل متوافر (البطارية اتغيرت بدون كلام خالص وهي في الضمان ، وتركيب الحساسات الهدية بدون مصنعيات، والعمل على حل باقي الشكاوى)
ملاحظاتي على العربية:
طوت الطقطقة في التابلوه خف كتير عن الأول، بس لسة في حاجة كدا... عامة هخليهم يظبتوه تاني في صيانة 1000 ان شاء الله.
صوت الصفارة والطقة في الفرامل راحت.
الحاجة الوحيدة اللي مضايقاني شوية بعد ما مشيت عشان كنت مستعجل، هي غسيل السيارة ، تقريبا اتمسحت بفوطة من برة بس. لأن التابلوه مكانش نظيف ، والفرش كان فيه بقعة خفيفة من أثر الشغل وأنا نضفتها.
بس عامة مينفعش اتكلم كتير على غسيل العربية خصوصا اني مدفعتش حاجة .. :36_2_33:
الخلاصة ان المركز دا لو استمر كدا ، بإذن الله هينجح جدا ويكون من أحسن مراكز الخدمة في مصر.
