الموضوع زى العنوان وهو الفريم الرخم اللى زهقنا من الانتريور بتاع الابيزا وكرهنا فى التابلوه بشكل ممل وكان فى اخ فاضل فتح النقاش فى الموضوع واللى هو ده
http://www.nilemotors.net/Nile/270129-94.html
واللى بصراحه كنت اقترحت فيه اقتراح بس حسيت باحباط بعد ما المهندس محمد سيد قاللى على تجربته مع اللزق الكربون واللى كان فاشل بصوره كبيره وخلى شكل الفريم زى الزفت المهم قلت ادينى بجرب ومش هخسر حاجه بالعكس انا ممكن اوفر 250 جنيه ومخافشى من انه يتكسر بعد ما اشتريه كمان واعذرونى على قله الصور وده لسببين الاول انى كنت مش مقتنع بالنتيجه والتانى ان ايدى كانت ملزقه من الكوله وبصراحه انا بخاف على تليفونى
بسم الله نبدأ
الادوات المستخدمه
1- متر جلد اسود فيه تعاريج خفيفيه اسود اللون
2- موس جديد ومش هينفع القطر لانى حاولت بيه
3- علبه كوله من ام 5 جنيه
4- مفك صليبه وعاده
5- امير او لاصق فورى
6- مسدس شمع وشمعتين
7- علبه خله السنان اللى هى خشب
الوقت المتوقع والمجهود والتركيز
ممكن من 3 الى 4 ساعات وطبعا مش متواصل
محتاج تركيز وصبر قوى
الخطوات
1- نفك الفريم اللى فى النص بس بعد ما نشيل الكاسيت وفتحتين التهويه بتوع التكييف ومفتاح الزجاج الكهربا او العلبه الفاضيه لو معندكش زجاج كهربا كل ده ممكن يكون مساميره بايظه بس متقلقشى معمول حسابها بس اهم حاجه تلم كل المسامير كلها فى كيس وكمان تلم معاها حتت البلاستيك المتكسر ومترميش اى حاجه مكان المسامير بيكون كالاتى 2 من فوق هيبانوا لما تشيل فتحتين التهويه وفتحتين التهويه راكبين كبس بس براحه وانت بتشدهم وفى 4 مسامير ماسكين زراير التحكم بتوع التكييف و2 ماسكين زراير الزجاج الكهربا و2 من تحت الطفايه وبس
2- الفريم اللى عندى طلع 3 حتت وفيهم حته صغيره بتاع 15 سنتى المهم لميتهم بحذر واخدت بعضى وفضيت المكتب بتاع الكمبيوتر لان الموضوع للاسف محتاج تكون قاعد مرتاح ويكون الفريم فى مستوى ايدك
3- سبت مسدس الشمع يسخن وجبت الامير وجبت علبه خلل السنان وبدات اجمع الفريم جنب بعضه بدات بالقطع الصغيره وسبت فتحات التكييف شويه لانها كانت اتقل حاجه
4- بعد ما لزقت الحتت الصغيره بالامير كان المسدس سخن وبدات ادعم الكسور بالخله الخشب واغطيها بكميه شمع محترمه ولانى كان الامير نشف وثبت القطع مكنتش محتاج افضل ماسكها سبتها على جنب تنشف
5- اصعب خطوه ان فتحتين التكييف كانوا مكسورين مع بعض وكانوا اتقل من انى اعرف الزقهم بالامير وعشان كده جبت علب فاضيه وسندت عليها الفريم عشان ياخد الشكل الاصلى وبدات اعمل العمليه السابقه بس بدات بالشمع الاول وبعدين الامير
6- الفريم بقى حته واحده ومتماسك الى حد ما بس الشروخ شكلها ما يطمنشى رحت مالى كل الفراغات بالشمع فعملت دعامه قويه والفريم بقى ماسك نفسه وبقيت اقدر اقلبه فى ايدى بسهوله من غير ما ينكسر
7- جبت الجلد والكوله وفرشت الجلد عليها كلها وكنت بفرد الكله على الفريم مش على الجلد وكان بيمسك بس بياخد وقت اطول لكن لما بدات الزق على الجلد النتيجه بقت ممتازه
8- كنت بحتاج اخد راحه كل 10 دقايق او ربع ساعه بسبب ان ضهرى كان وجعنى من تجميع الفريم ولان الكوله كانت ريحتها تودى فى داهيه ومكنشى ينفع افتح الشباك عشان متنشفشى بسرعه وملحقشى الزق
9- الفريم بقى مكسى كله جلد بس كان كله زيادات وكانت الفتحات كلها مقفوله وهنا جه دور الموس وبصراحه انجز معايا مع انه مكنشى دقيق 100% المهم بدات افتح الفتحات بس بشكل غريب شويه بس عشان يطلع التقفيل مظبوط ولو اعتبرنا ان فيه مربع انا كنت بقص بالشكل ده >-----< والم الاطراف لجوه والزقها وبعدين اشيل الزيادات بس من ورا وده عشان الجلد ميبقاش ليه طرف ويبان انه ملزوق
10- لازم تمسح الكوله اللى تيجى على الجلد بسرعه قبل ما تنشف لانها لو نشفت ممكن متطلعشى تانى
11- فتحات التكييف غلبتنى شويه عقبال ما بقت تتحرك لان المكان بقى اضيق بس بقت احسن من الاول كانت بتلعب يمين وشمال مع اى حركه
12- انا كنت اتكلمت قبل كده فى موضوع عن العربيه بتاعتى ان الكونتاكت عندى فى مشكله والدنيا شغاله على زرارين واحد بتاع الدواره والتانى بيفتح كونتكت بس شكل الاخير كان زى الزفت عباره عن صباع بيتشد لبره زى الحاجات بتاع العربيات الراما كده المهم استخدمت مفتاح سخان الزجاج اللى ورا وهو زرار تكه واحده بس فيه اربع صوابع من ورا لانه جواه لمبه بس المفتاح شغال على الاتنين اللى قريبين من بعض فى نص المفتاح كنت بفكر اشغل النور اللى فيه مع النور الضغير بس قلت بلاش انا ناوى ان شاء الله اشترى كونتكت
13- ركبت الفريم وجبت مسامير شك بالصاجه اللى بتتربط فيها ودى مشهوره قوى موجوده فى الصوره الخامسه على الشمال بس دعمتها بالحتت البلاستيك اللى لمتها بعد ما فكيت الفريم المهم ربطت الفريم وثبته كويس وكانت النتيجه كما فى الصور
الصور
واضح فى الصوره الاولى مكان الكسر
http://www7.0zz0.com/2012/03/11/12/359535771.jpg http://www7.0zz0.com/2012/03/11/12/382527165.jpg http://www7.0zz0.com/2012/03/11/12/304207024.jpg http://www7.0zz0.com/2012/03/11/12/878810405.jpg http://www7.0zz0.com/2012/03/11/12/379379795.jpg [img]hِttِp://www7.0zz0.com/2012/03/11/12/977876429.jpg[/img] http://www7.0zz0.com/2012/03/11/12/491410058.jpg http://www7.0zz0.com/2012/03/11/13/670929696.jpg
التقييم
انا شايف ان التقفيل 85% وده لان المدام والاولاد كانوا فوق دماغى وكل شويه حاسب من الكوله على صدر الواد وايه الريحه الوحشه دى وكده وتحذير الموضوع محتاج صبر وتعمل حسابك ان الكوله هتفضل لزقه فى ايدك يومين تقريبا وهتختفى شويه شويه والشمع لما بيكون سخن بيلسع بس مبيسيبشى اثر لسعات او علامات
الزراير محتاجه فريم حوليها او لزق او اى حاجه تحدد شكله وكمان انا اضطريت استخدم خشبه ابلكاش لان المكان اللى بيركب فيه الزراير مش موجود اصلا اظن فى ناس موجود عندها بس الريش اللى بين الزراير متكسر
عندى مكنه بتعمل لابلات وكنت بفكر اكتب انجين استارت والزقها فوق الزرار بتاع الدواره كنت شفتها فى عربيه بورش قديمه وشكلها كان شيك
اسف على الاطاله وارجو انى اكون افدت واعذرونى للاخطاء لانى للاسف قاعد فى السيبر بتاعى والدنيا زيطه مووت حواليا