انهارده حصل معايا موقف قلبي كان حيقف فيه . كنت ماشي علي طريق اسماعيلية متجه للعاشر من رمضان وقبل مااوصل بحوالي 10 كيلو سمعت صوت زلطة خبطت جامد في العربية من تحت فوقفت علي جنب ونزلت بصيت علي العربية ومشيت علي طول تقريبا وقفت دقيقة واحدة . فجأة بعد ما مشيت ووصلت لسرعة 60 تقريبا لقيت بوكس شرطة جاي من ورايا وعمال يقلبلي نور ومشغل السارينة بتاعته وجه جنبي وراكب فيه ظابط وبيشاورلي علشان اقف طبعا في الايام المهببة اللي احنا فيها دي قلت يمكن يكونوا بلطجية ولا حاجة وسارقين البوكس لان عمري ما شفت البوليس بيوقف حد في الطريق بالمنظر ده . المهم طنشت وقرصت شوية وسبقت البوكس وفجأة لقيت البوكس جاي طاير ورايا والظابط بيضرب نار في الهواء وكسر عليا ووقفني بالعافية في اللحظة دي انا مش قادر اوصفلكوا كان حايجيلي سكتة قلبية المهم نزلت من العربية ولقيت القوة اللي في البوكس بقيادة الظابط جاية عليا ولقيت كمان بوكس تاني قفل علي العربية من ورا والقوة بتاعته برده نزلت وبعدين الظابط طلب مني الرخص والبطاقة وبيسألني انت كنت واقف علي جنب ليه ؟؟ فحكيتله الموضوع فبص في الرخص وفي البطاقة وقاللي معلش اصل الايام دي بيحصل عمليات تهريب مخدرات علي الطريق وأي عربية بتقف علي الطريق بنعمل معاها كده والبوكسين دول كانوا بيمشطوا الطريق ده غير 3 عربيات اتسرقوا انهارده من علي الطريق أصحابهم برده كانوا راكنين علي جنب الطريق ونصحني مركنش علي جنب الطريق نهائي. وبعدين الظابط بص في الرخص والبطاقة ولقي كله سليم فمشاني بس للأمانة أسلوبهم معايا كان في منتهي الإحترام . بس الطريقة اللي بيوقفوا بيها العربيات ترعب بصراحة خصوصا لو في العربية سيدات أو أطفال .
ايه رأيكوا في اللي حصلي ده ؟؟؟