الموضوع: عايز اعمل جنينه

المشاركة الأصلية كتبت بواسطة abdo_general

باشا الموضوع ان شاء الله سهل جدا
انا مهندس شبكات ري ولاندسكيب

بالنسبة للنجيلة بسيطة خالص
بس هل في تصور ليك للباقي ولا انت عاوزها نجيلة بس
ولا عاوز نباتات زينة

وهل هتحتاج شبكة ري ولا هتستخدم الخرطوم

وبالنسبة للرعاية بتاعتها

هي قطعة الارض دي في انهي منطقة بالظبط

بالنسبه للنجيله يا ريت حضرتك تفيدنا بخصوص النجيله و ايه ارخص اماكن لشرائها و هل بتتبا ع بالمتر ولا ايه

و ايه الفرق بين الصناعى و الطبيعى و مين يستحمل بهدله اكتر

و جزاك الله خيرا

المشاركة الأصلية كتبت بواسطة abdo_general

بالنسبة للنجيلة هي كذا نوع بس احسن نوع يستخدم للحدائق سواء عامة او خاصة او فيلات نوع اسمه
باسبيلم 10
دا احسن نوع يستحمل المشي والظل

وهي فعلا بتتباع بالمتر
واحسن مكان تجيبها منه من مشتل كبير واغلبهم في القناطر
لكن بلاش من مشتل في مدينة نصر

لان في عيوب في النجيلة انها تيجي فيها بذور حشائش وغريبة
وجودة النوع نفسه
وتلاقيها في الاخر مثلا هتفرق علي 2-3 جنيه في المتر
فا بصراحة مش مستاهلة

نيجي للفرق بقي بين النجيلة الصناعي والطبيعي
بص يا سيدي النجيلة الطبيعي هي عبارة عن نبات حي والصناعي عبارة عن بلاستيك
سعر النجيلة الطبيعي من 8 - 14 جنيه للمتر علي حسب النوع والمكان الي هتتزرع فيه والموسم الي بتتزرع فيه والمساحة كل دا بيتحكم في سعر المتر

اما سعر النجيلة الصناعي من 100 - 300 جنيه للمتر برضه علي حسب النوع واستخدامه ( حدائق - ملاعب - .... ) والمكان والجودة بتاعت النجيلة نفسها

اكيد فرق سعر رهيب بس في مميزات وعيوب لكل واحد

نيجي كده سريعا للنجيلة الطبيعي
اولا بتحتاج ري بصفة يومية سواء شبكة ري او خرطوم ( يعني عندك تكلفة انشاء شبكة او لو خرطوم تكلفة فاتورة المياه فقط + تكلفة العامل الي بيقوم بري النجيلة في المساحات الكبيرة )

ثانيا بتحتاج صيانة مستمرة وهي عبارة عن قص النجيلة بماكينات القص والتسميد والمبيدات والتحديد

بالنسبة بقي للنجيلة الصناعي
- مش بتحتاج شبكة ري او اي تكلفة في فاتورة المياه ومش بتحتاج صيانة وفيها ميزة برضه انها بدرجة خضار ( اي بتحافظ علي اللون الاخضر بتاعها ) طوال الـ 12 شهر في السنة طبعا بغير الطبيعي اكيد بيتغير لونها في الشتاء ولو بدرجة خفيفة دا غير ان لو عدي 3 ايام من غير ماء برضه لونها يصفر بنسبة ما علي حسب العطش

يعني دي الفروق بينهم باختصار كل شخص بيختار الي تناسبه طبعا
في ناس مثلا عاوزين يعملو نجيلة علي الروف ومافيش اي صرف فا مش هينفع يبقي في ماء فا بيضطر يستخدم نجيلة صناعي
وكمان لو مكان ظل مستديم هيستخدم نجيلة صناعي

ولو عاوز رائي الشخصي
طبعا مافيش بعد الطبيعي كفاية الهواء الي بتتنفسه ولو انه محتاج بعض الرعاية بس اكيد مافيش احسن منه بس يبقي جودته كويسة ومزروع كويس

واي استفسار انا موجود :)

يا فندم و الله انا مش عارف اشكر حضرتك ازاى , فعلا معلومات مفيده جدا و انا كنت حسال فعلا عليها فى مدينه نصر لانى ساكن هناك بس كويس ان حضرتك نبهتنى

معلش حسال حضرتك سؤال تانى , انا الارض اللى عاوز ازرعها عباره عن مساحه ارض فى بلدنا فى الشرقيه عاملينها زى ملعب للكوره او اى حاجه فهل فى مشاتل تكون على طريق مصر الاسماعيليه او بلبيس او حتى فى الصالحيه ممكن اشتري منها النجيله الطبيعي

و بالنسبه للنوع اللى حضرتك قولت عليه , ده سعر بالتحديد كام و ايه مميزاته عن الانوا اللى ارخص منه و ازاي اعرف علشان محدش يضحك عليا

اخر حاجه بالنسبه للري , اي تكلفه عمل الرشاشات اللى بتدور دى , هلى بتكون تكلفه عاليه و لا ممكن عملها بسهوله و جزاك الله كل خير