الموضوع: الابيزاويه 2001 - 2002

أولا و باختصار قبل الرد علي الأسئلة الابيزا في مصر من 2000 و حتي 2002 (و دي اللس شكل فوانيسها الخلفية مربعه ) بتنزل بالمحرك الاستوك 1000 سيسي 50 حصان و بكل الكماليات و دي سعرها يتراوح من 37 الف وحتي 45 الف حسب الحالة
الابيزا من 2003 و حتي 2009 بتنزل بشكل أخر تماما و تصميم أيضا في الشاسيه و المحركات مختلف و بمحركات من 1400 بفتيس مانيوال الي نفس المحرك و لكن بقدرة اكبر و فتيس اتوماتيك و حتي محرك 1600 و فتيس استيب ترونيك في 2009 و دي بيختلف سعرها حسب الموديل و المحرك و الفتيس و بيتراوح من 52 الف الي 70 الف او يمكن اكتر لموديل 2009 و ايضا حسب الحالة و الموديل و الكماليات

تمام كده يعني الفرق بين الموديلين كبير

المشاركة الأصلية كتبت بواسطة ramyhamdy

يا جماعه انا محتار بجد انا ناوي ان شاء الله اغير عربيتي فبصراحه قولت اغير مدرسه الياباني و اروح لمدرسه الفن الاوروبي
فبصراحه قولت يبقي هيا انسب حاجه و في حدود تمن عربيتي هي الابيزا 2001 او 2002
كنت عايز اعرف رايكم في الموديلين دول و هل يستحقوا فعلا اني انزل من نيسان و اركبهم علما ان عربيتي 16 valve << twin cam
وانا بحب اشد و اغرز و كلام من ده فمحتاج موتور قوي و سمعت ان ٢٠٠١ بتنزل ب 1000 cc و في ال ٢٠٠٢ 1400 cc
هل الكلام ده صح و علي فكره مش بحب حكايات التسقيط و الشغل ده انا عايز حاجه ستوك متتعبنيش
هسالكم شويه اسئله يارب تجاوبوني عليهم بالنسبه للموديلين دول
١- هل العفشه كويسه يعني ناشفه و تستحمل المطبات ؟

عفشة العربية دي جيدة جدا و قوية و لا تحتاج الي صيانة سوي في فترات متباعده و لكنها يعيبها قليلا انها ناشفه شوية من الخلف و لكن مع اي تحميل في الخلف بتصبح ناعمه تماما و لكن في الأمام مريحة جدا و كل ده حسب حالة عربيتك

٢- موتور ال ١٤٠٠ حلو في السرعات و الحرق علي الغيارات ؟

بصراحة مجربتهوش عشان أقدر أفيدك و لكني ركبت ال 98 بالمحرك ال 1000ال 50 حصان و كان رائع و لكنه في السرعات العالية و بعد ال 100 ضعيف و اخره 160 و دي قليل اللي يجيبها و ركبت ال 2002 كوردوبا بمحرك 1000 16 فالف ال 70 حصان و ده محرك مختلف و أقوي و أشد من اللي في الابيزا في السحب و الشد و الجري و مشيت بيه حتي 180 كيلومتر في الساعه و من خلال كلامي اكيد ال 1400 هيكون روعه عليها خاصة انها خفيفة الوزن و مع ذلك ثابتة بشكل لا تتخيله
٣- هل قطع الغيار متوافره ؟

طبعا كل شيء موجود و متوفر من صيني لتركي لأسباني لألماني جديد و موجود كل شيء ايضا استيراد الحرفين مليانه متلقلقش و لكن قطع غيارها أعلي قليلا من الياباني و لكن بتغيرها و تنساها كتيييييييييير
٤- هل مظهر العربيه كويس و الصالون ايه اخباره من جوه ؟

مظهر العربية رائع من بره و هنزلك شوية صور ان شاء الله ليها دلوقتي تتفرج و ايضا من الداخل و لكن تحاول تشوف عربية حالتها كويسة و لو عايز تركب صح خليك في الموديل من 2003 حتي 2009 لأنه تلاشي العيوب في التقفيل الداخلي و خاصة فرش الأبواب للموديل اللي قبله

٥ - هل في فرق في الشكل بين ٢٠٠١ و ٢٠٠٢

طبعا فرق كبير و تصميم اخر تماما و هتشوف دلوقتي لما اجهزلك شوية صور
او في اي فرق بينهم ؟
٦- هل التكيف كويس في الموديلين دول ولا اي كلام زي ما سمعت عن موديلات ٩٤ و كده لانهم مش بينزلوا بتكيف !!!!

لأ الموديلين دول كاملين فيهم كل حاجه و انا شخصيا عندي تكييف عربيتي الكوردوبا اكثر من رائع

٧ - ايه تقيم السياره بوجه عام و هل في مشاكل في الموديلين دول ؟!!!

الموديل 2001 فيه عيب خطير وهو فرش الأبواب الداخلي بيطلع و يبوظ بسرعه و كذلك المحرك ال1000 بتاعه انا شخصيا مش عاجبني حتي الأن بعد تجربة أكثر من عربية لزملاء مقارنة بالمحرك ال 1000 الي كان في ال98 رغم ان الأحدث أعلي في التكنولوجيا و لكن مقبلنيش محرك مضبوط و بيعطي معدلات استهلاك تناسب حجمه حتي الأن (كلامي عن محرك الابيزا 2001)
ياريت ترودوا عليا و اكون شاكر ليكوا جدا لاني بجد تايه و حابب اغير في اققرب فرصه

و شكرا مره تانيه معلش هتعبكم معايا