الموضوع: ملحوظة : مواقع و منتديات بيع السيارات

السلام عليكم ....

بإختصار يا جماعة أنا كان ليا الحظ إنى سجلت بالمنتدى من 2009 و أشتريت عربية وقتها من المنتدى

و الحمد لله كانت تمام فابريكا و لسه معايا لحد الأن . ولما حبيت أجدد و أغير وبدأت أتابع المواقع

والمنتديات يومياً و بإستمرار للبحث عن سيارة كويسة لاحظت شوية ملاحظات هامة لفتت نظري.

أولاً : إحتكار التجار و المعارض لنسبة كبيرة من المعروض على المواقع بنسبة تتجاوز 60 %

وبيكتبوا بردو الجملة الشهيرة (لا للتجار) ( الوسطاء يمتنعون) وبقى التاجر بيتهرب و بيتنكر

علشان ميتعرفش إنه تاجر وده من السمعه اللى مش تمام اللى كسبها التجار نتيجة الغش

و عدم المصداقية و النصب أحياناً و ده أكيد مش كل التجار لأنى مؤمن أن كل مجال فيه الكويس

و فيه الوحش عشان محدش يزعل منى . والدليل أن الإعلان بينزل و بعد خمس دقايق تتصل يقولك

العربية إتباعت و كأنها إتبخرت مثلاً و ده للعلم كتييييير جداً وده يخليك تحس أن مفيش أصلاً عربية

والإعلان وهمى لهدف و غرض ما ؟؟؟؟ مثلاً ربط سعر سيارة معينة عند حد معين متزدش عنه أبداً

وده بيحصل لما ينزل إعلان من واحد عادى زى الكتير اللى بيدوروا على عربية أو يجدد عربيته مثلاً

( بالأخص طبعا السيارات المتداولة اللى سوقها ماشى )

ويعلن عنها و يحط مبلغ ما ...تلاقى بعدها إعلانات كتير لنفس المويل مع إختلاف بسيط بقى (فالموديل

والكيلومتر و اللون ) ومواصفات و حاله أحسن من عربيته ومنزلين عن السعر اللى الزبون العادى حطه

لعربيته فالإعلان بتاعه خمس ست ألاف جنية

عشان لما الزبون يتابع الإعلان بتاعه يلاقى إعلانات تانية كتيييير شبه عربيتة بس السعر أقل بكتير عن

عربيته و الحالة أحسن

وده طبعاً يزرع الشك فى نفسه و انه طالب غالى و يبدأ ينزل ..... فى الوقت نفسه يقوم التجار طبعاً

بالإتصال بالزبون ويقولولوا السعر ده كتير لحد ما يكسروا أهدافه و يقنعوه بطريقة غير مباشرة

انه السعر كتير وبعد فترة مش كبيرة تبدأعملية التخليص بعد عملية تقتيت السعر اللى شرحناها

حاجة تانى إنى لما إتصلت بحوالى 50 أو 60 إعلان و أسالوا عن العربية اللى عاملها إعلان

وأقولو إنى ببيع عربيتى و لما أبيعها و حصل نصيب هتصل بيك تانى لازم يسألنى

عربيتك اللى عايز تبيعها إىه ؟؟

أصلى ليا واحد قريبى أو صاحبى بيدور على عربية زى بتاعتك و ده على فكرة مع نسبة 90 %

من اللى بتصل بيهم و يبدأ يتكلم فى سعر عربيتى و يشوف و يتفرج و يخلص فى التليفون

و كأنه هو اللى هياخدها و حاجات تانية كتير ممكن نقولها بوقت أخر عشان منطولش عليكم

وجب التنبيه للأخوه بالمنتدى لأخذ الحذر الواجب و يا رب يكون فيه فايدة و محدش يزعل منى