معلش يا باشا اسمحلي الاسئلة مش بسيطة كدة زي مانت متخيل ! اسال مجرب بقى
انا دخلت الامتحان ده تلت مرات ! وفي كل مرة بسقط !
اول مرة دخلت امتحان السواقة نجحت قالولي اطلع امتحن اشارات قلت بسيطة وفرحت وقلت ده الناس بتخوفنا ليه مالدنيا حلوة اهي وزي الفل !
جبت الورقة بتاعة الاشارات وحفظتها دخلت !
مش عايز اقولك طبيعة الاسئلة اللى ماتفهمش منها هو عايز ايه ؟ ؟
مثلا سؤال :
لو انت ماشي في طريق غير ممهد وفيه مطبات تعمل ايه ؟
ترجع لورا وتغير طريقك ؟
تكمل وتمشي عليه براحة ؟
تدخل شارع جانبي عشان تتفادى الشارع المكسر ؟؟
طب المفروض انا ارد اقوله ايه ؟ ؟ وكلها اسئلة مستفزة تعتمد على كل واحد وتصرفه واكن الاجابات كلها صح ! طب ماممكن واحد يقولك هكمل فيه براحة وواحد يقولك هدخل شارع جانبي عشان اتفادى الشارع المكسر ؟ فين الصح ! ؟
المهم سقطت وقالي تعالى كمان 3 شهور قلت ماشي
رحت كمان تلت شهور وانا مذاكر بقى تمام التمام وقلت هنجح المرة دي ان شاء الله وبرضوا سقطت ! !
المهم سالت هنا وهنا قالولي فيه كتاب تبع المرور جيبه وذاكره وادخل هتنجح ! رحت اشتريت الكتاب وقعدت اذاكر بقى واحفظ وسبت مواد الكلية وبذاكر في كتاب المرور !
لحد معاد الامتحان رحت واقف بقى مستني وقدامي طابور ماشاء الله ! كل واحد يدخل خارج ساقط ! مافيش ولا واحد نجح ! ! وكل واحد يسقط ويطلع مضايق اقوله بص جيب الكتاب ده وذاكره وهتدخل تنجح ان شاء الله
لحد ماجيه الدور عليا <<< داخل بقى واثق من نفسي !
دخلت سقطت بنسبة اقل من اللى كنت بجبها قبل كدة ! ! قلي ده يبقى اسمه ايه ؟ ؟ ؟ طبعا بعيدا عن البهدلة والقرف والوقفة من 8 الصبح وفي الاخر تلاقي الامتحان الساعة 1 الظهر ! بصراحة قمة في قلة الادب وعدم الاحترام !
وفي الاخر كلمت واسطة وطلعت الرخصة وانا قاعد في مكتب وكيل النيابة !