عايز اغير لاتصالات من فودافون..ممكن المشورة؟
بعد 12 سنة أو حاجة كده مع فودافون جبت اخري منهم في كام حاجة منهم إن ال 3g في مكان مابقعد اشتغل ميتان اخر حاجة..التليفون في البيت بقى بيفصل كتير في المكالمات....كل شهر تقريبا يفصلوا عني اشتراك النت (1500mega بـ 90 جنيه )و يسحبوا من الكريدت (1500 ميجا بـ 1500 جنيه) من غير ادني انذار
قررت أحول اتصالات ببساطة لأن لما كان معايا usb مودم اتصالات كان بيعدي ال 1mbps بسهولة في مكان خروجي وعملي (متميز أكتوبر و طريق الواحات) في حين إن فودافون كان مبيعديش 50 k بالميت
كمان ارخص اشتراك شهري في فودافون عامل 50 جنيه - البرونزي - في حين في 25 جنيه في اتصالات (وانا مكالماتي محدودة واستهلاكي نت بس)
وكمان عشان ناس كتير بتشكر فيهم
بصراحة الحاجة الوحيدة اللي عجباني فيهم هي خدمة العملاء..بس ده لو عرفت أوصلهم
المهم
اللي مخليني أعمل الموضوع ده إني فهمت من خدمة العملاء إن ماينفعش اغير الشركة تاني بعدها غير بعد سنة فمش عايز اغير ل اتصالات وألبس واكتشف إن فودافون كانت نعمة
فـياريت أراء الناس اللي في اتصالات وياحبذا لو عندهم مشاكل معاهم عشان أعرف قبل مروحلهم
العيب الوحيد اللي لاحظته دلوقتي وانا بتصفح موقع اتصالات إن معندهمش اشتراك نت أكتر من 50 جنيه اللي بيدي 500 ميجا فـ ده مش كفاية (فودافون 90 جنيه - 1500 ميجا) لكن ممكن اعديه
