أنا كمان عديت على التوكيل الموجود في الداون تاون بالإسكندرية، وعندي شوية ملاحظات:
أولاً: طبعاً الشنطة أصغر من أي عربية تانية في نفس الفئة ولكن ده لو إستخدمت الغطاء الداخلي للشنطة (وده طبعاً ضروري لو هتسيب العربية واقفة في الشارع وفيها حاجات في الشنطة) لكن لو في طريق سفر ممكن تحمل الشنط فوق بعضها، وخلاصة الموضوع: حجم الشنطة ده هو أكبر عيب فيها.
ثانياً: حجم الشنطة الصغير ده بسبب مساحة الركاب الداخلية الواسعة جداً (أنا ركبت الكيا السبورتاج، النيسان القشقاي والسوبارو إكس في) السوبارو أكبر وأوسع من ناحية فراغ الأرجل ورا وقدام وكمان مساحة الرأس (النيسان راسي خيطت في السقف لما جربت الكنبة الخلفية)، ولكن للأسف الحلو برضه ما يكملش لأن الكنبة الخلفية ضيقة بالعرض ومستحيل تاخد ثلاث أشخاص صحتهم كويسة، وده تاني عيوبها.
ثالثاً: الأبواب صحيح خفيفة لكنها مدعومة بقضيبين صلب لكل باب ممكن تلاحظ أطرافهم بارزة من أسفل الباب وبتدخل في فراغ خاص بيها في إطار الباب.
رابعاً: نظام الـ"VDC" أو الـ"VEHICLE DYNAMICS CONTROL" وده إسم نظام الـ"ESP" الخاص بسوبارو وموجود في كل سيارات سوبارو الإمبريزا والإكس في والفورستر، أنا دورت على الـ"YouTube" ولقيت الفيديو ده، بصراحة دي واحدة من الحاجات اللي مجمدة قلبي على شرا العربية دي رغم كل العيوب اللي بسمعها عن التوكيل وقطع الغيار.
2011 Subaru Traction/Stability Control and Symmetrical AWD vs. Nissan, Honda, Toyota, and Ford - YouTube
خامساً: نظام الدفع المستمر بجميع الإطارات المتساوي أو الـ" Symmetrical All Wheel Drive" طبعاً معروف للجميع ومعروفة قدراته بالنسبة للتحكم في السيارة والمحافظة على الدفع أوالـ"Traction" في جميع ظروف الجو والطريق، وبرضه لقيت الفيديو ده على الـ"YouTube":
http://www.youtube.com/watch?feature=player_detailpage& v=ktoGVBR4op4
سادساً: إستهلاك البنزين وده من الحاجات المهمة جداً: 6.3 لتر لكل 100 كم
أخيراً: موضوع الـ 8 إير باجز ده يستاهل بصراحة فرق السعر اللي بين أول فئة والهاي لاين
وشكلي كدة هتوكل على الله وأشتريها وربنا معايا في التعامل مع التوكيل، وربنا يستر ويبارك.
المفضلات