هقولك الحل الامثل لحله مشكله فتيس الفليشيا بس للعلم لك حريه الاختيار
انا كنت زيك كده عصايه الفتيس عندى سايبه خالص بتروح يمين وشمال كده مع نفسها واكن مفيش السوسته دى المهم كنت كل فتره اروح للميكانيكى يقوم حاطط مسمار جديد فى جلبه الفتيس من تحت ويربط عليها وبعدين بعدها ب شهر ولا يمكن اقل تحصل نفس المشكله تانى وتتكرر المهم ناس قالتلى غير العصايه كلها بالمعلقه والكلام ده فا انا قولت لأ انا الاول افهم
محدش يضحك عليا ف اللى عملته جبت الكوريك ورفعت العربيه من الجنب وجبت مصليه وفرشتها ونمت عليها وبصيت على الفتيس من تحت وخليت واحد صاحبى يحرك الفتيس لاقيت ان فيه بوش فى الجلبه دى والمسمار مش هيكون حل اساسى لانه كل فتره هيفك والفتيس يبقى سايب تانى
المهم سالت الميكانيكى قلتله فيها مشكله لو نحل محل المسمار ده ب لحام كهربا مش نحاس لانه اقوى قالى لأ مفيش مشكله خالص وهتمسك وعمرها ما هتفك رحت اخد بعضى وطالع على بتاع شكمانات وقلتله يا باشا الحملى جلبه الفتيس فا قالى اه اه عارفها طلع ان فى ناس كتير بتعمل كده المهم قالى ثبت الفتيس على الوضع الطبيعى فى النص رحت مثبته وهو اشتغل وبسم الله ما شاء الله داخله فى 3 سنين اهو والفتيس اكنه فابريكه
اسف انى طولت عليك بس حبيت انقلك تجربتى فى الموضوع ده
وعلى فكره الموضوع مش مكلف خالص الحام ب 10 جنيه يعنى بدل ما كل يوم 20 جنيه للميكانيكى ...
يارب مشكلتك تتحل زيي
المفضلات