الموضوع: تجربتى وتقييمى للسيراتو 2010 هاى لاين

السلام عليكم ورحمة الله وبركاته

احبائى واعزائى الكياويه وغير الكياويه

بناءا على طلب الجماهير العريضه وكبير الكياويه حبيبى ابو ليلى

إليكم تقريرى المتأخر جدا عن السيراتو


مواصفات العربيه

هاى لاين مواصفات خليجيه سعوديه متصدره لقطر ( مكان شغلى حاليا )

هاى لاين 2010 اخر دفعات قبل التعديلات , يعنى الفتيس 4 سرعات ومفيش مرايات ضم ولا كاميرا للركن ولا بلوتوث , وهنا مبتنزلش بفرش جلد ولا جى بى اس فى اى فئه

الاختلاف الاهم بينها وبين المصرى ان الباور كهربا مش زيت , باقى الكماليات معروفه للجميع ABS AirBags فتحة سقف سمارت كى جنط 17 مرايا تعتيم سى دى تشنجر باركنج سنسور ملتى فنكشن تكييف اوتوماتيك


الموتور : استجابته ممتازه , صوته بيعلى مع القرص وبيبقى مسموع جوه العربيه بالذات لو مش مشغل السى دى او فاتح الشباك , يعنى بشكل عام صوته مش هادى ومن الاسباب الكاتينه جنزير , لكن سحبه ممتاز , مجربتوش كتير فى السرعات العاليه عشان الرادارات , لكن فى حته معينه مفيهاش رادار باوصل 160 بسهوله


استهلاك البنزين : الاستهلاك عندى عالى يعنى تقريبا 160 فى الصفيحه , بس دا راجع لاسباب اهمها طريقة السواقه , فى قطر الشوارع معظمها فاضيه ومفيهاش زحمه بس كل 500 متر او 1 كم بالكتير يا هاتلاقى اشاره يا اما دوار ( ميدان صغير ) بتقف فيه , فبمجرد ما الاشاره تفتح لازم تديها كيك داون عشان تلحق الاشاره اللى بعديها قبل ما تقفل :) يعنى باختصار باقرص على العربيه علطول من 0 لحد 80 ( الرادارات فى الشوارع على 80 ) , دا غير التكييف اللى مابيتقفلش


الفتيس : فتيس تبترونيك 4 سرعات عادى , على وضع التبترونيك السحب بيبقى احسن من D عشان انت اللى بتتحكم فى النقل , بشكل عام اداءه كويس

* الفتيس الجديد اللى نزل بعد كدا 6 سرعات المفروض انه احسن فى السحب وبيريح الموتور , وبالتالى حل بعض النقط اللى قلتها الى حد ما , وهى صوت الموتور واستهلاك البنزين


الفرامل : من اهم مميزات السيراتو , سواء على السرعات القليله او السرعات العاليه ممتازه وبتؤدى المطلوب من غير حدف او غيره , العربيه طبعا ABS وفرامل ورا ديسكات , لو الفرامل مش عاجباك يبقى يا اما عندك فى المشكله فى العربيه يا اما بتقارنها بفرامل فى عربيه اضعاف تمنها


الثبات : ممتاز لحد 160 , مجربتش اكتر من كدا


العفشه : اكيد ناشفه بس مش للدرجه اللى البعض بيقولها ويبالغ فيها , على الاقل بالنسبه لى , وطبعا دى حاجه تقديريه بتختلف من شخص لاخر , انا شخصيا مش متضايق من العفشه وعاجبنى الجنط ال 17 وعرض الكاوتش , جايز لو كنت اركبها فى مصر كنت هاتضايق :)


الباور والتحكم : زى ما قولت الباور عندى كهربا خفيف على السرعات القليله بيتقل على السرعات العاليه , انا شايفه ميزه عن الزيت , بس جايز عشان مع جنط 17 , ممكن الكهربا مع جنط 15 وكاوتش مش عريض يبقى مش حلو والاحساس بالتحكم فى العربيه ميبقاش حلو


الارتفاع عن الارض : مناسب جدا ولا عاليه ولا واطيه , لو العربيه بكامل حمولتها وفى مطب رخم وارد تحك


التكييف : ممتاز وطبعا حر الخليج معروف , لو العربيه مركونه فى الضل مش هاتحس بحر , لكن لو راكن فى الشمس طبعا هاياخد وقت على ما يبرد , فتحات التكييف رخمه فى تظبيطها


السى دى والسماعات : صوت نقى وعالى وواضح


وضع القياده والرؤيه : كويسه وواضحه والكراسى مريحه بس مجربتهاش فى سفر او سواقه لفترات طويله


المساحه الداخليه والشنطه : كويسين الكنبه تشيل 3 مستريح ومساحه الراس كويسه السقف مش واطى , الشنطه واسعه وتشيل حاجات كتير


الشكل الداخلى والخارجى : ممتاز وكانت فلتة زمانها فى وقتها ولحد دلوقتى انا شايفها اجمل من عربيات كتير بتنزل هى مشكلتها انها انتشرت والعين اتعودت عليها


التقفيل : كويس والخامات كويسه مفيش مشاكل تقفيل


الاوبشنز : مش هاتحتاج اكتر من كدا فى الفئه دى والسعر دا , اللى هو من اكبر ميزه فى العربيه قيمه مقابل سعر


إنتهى التقرير واتمنى ان ينال رضاكم

اى استفسار تحت امركم , وادعولى اعملكم تقرير سيراتو 2013 الجديده ان شاء الله ان كان لينا عمر :)

.