الموضوع: مشكلتين فى كهرباء الشيرى a11

المشاركة الأصلية كتبت بواسطة ahmed2801

السلام عليكم
اولا حمدلله على السلامة ياباشمهندس نورت مصر وبالنسبة للعطل الاول... الهواء بارد.. يبقى كومبريسورالفريون يعمل ومروحة الهواية هى السبب ودى كهرباء ممكن حضرتك تكشف على الفيوزات ممكن من الركنة تكون الرجلين جنزرت و تكون عملت باد كونتكت اواطراف الموتور شعرت من الركنة وده اللى بيقلل سرعتها او ممكن يكون فلتر التكييف مسدود وده ف الصدر امام يمين جنب السريال نمبر بتاع الشاسية.
وبالنسبة للـ abs هو فيه اربع حساسات على العجل مش واحد وعموما عندنا فى مصر فكرة الـ abs فكرة فاشلة ومافيش منه فايده ما عندناش لا مطر ولا جليد وعند الفرملة تحس ان الفرامل خفيفة بتهدى وما بتربطش وانا عملت حادثة بسببه راح فيها الاكصدام الامامى والفوانيس الامامية والردياتيران (المية والفريون) الاصلى بتاعتها ومن يوميها وانا شايل فيشة الـ abs وماشى من غيره داخل على سنتين ومشاويرى كلها سفر مصر اسكندرية علشان البيت ف القاهرة والعمل ف اسكندرية ... وفيه ناس هنا ف المنتدى ماشيين من غيره والعربية زى الفل وبتمسك فرامل وفرامل خطر العيب الوحيد ف الموضوع ده ان لمبة الـ abs ولمبة فرامل اليد منورين ف التابلوه وبيعملو نوع من القلق عند بعض الناس بس انا اتعودت عليهم.
وعلية انصحك تشيل فيشة الـ abs وتريح دماغك وتمشى عادى!!!
اسف طولت عليكم بس كنت حابب احكيلكم تجربتى مع الـ abs ف الشيرى لحضرتك واخوانى ف المنتدى

يا سلام على الردود السريعة بارك فيك يا أخ أحمد ودام عزك وعلى فكرة أنا لسة فى السعودية منزلتش - على أجازة المدارس أن شاء الله ممكن أنزل على حسب حالة البلد
فعلاً على كلامك لازم الواحد يشوف الموضوع عن كهربائى كويس يشيك على العربية كويس وممكن يكون الفلتر أتسد من الركنة مع العلم أن الجراج فى بدروم البيت ومفيش تراب أبداً- على العموم لما أنزل أشيك وأعملها عالطول أن شاء المولى عز وجل
موضوع abs دة مقلقلنى فعلاً وممكن إلغية لكن انا ضد أنى إلغى أى وسيلة أمان موجودة فى السيارة مهما كانت ومتنساشى أن دية مميزها عن أقرانها - ولك أن تتخيل أن السوناتا والتوسان 2012 هيونداى بنزلهم هنا بدون abs ودية حاجة غريبة جداً لكن علشان ترخص فى السعر والناس هنا مضايقين قوى لأن abs موجود فى الفل كااااامل وبس لكن سيارتنا الشيرى المسكينة ربنا كرمها وأداها الأوبشن دة.
وأزيدك من الشعر بيت الأمريكى والألمانى عامة ال abs أساسى الأساسى - ولك أن تتخيل أن الزلمكة موديل 90 فيها abs تجهيز قياسى أنا مشفتش مرسيدس قديم أو جديد بداية من التمساحة ومروراً بالشبح والفياجرا وأنتهاءً بالبانوراما بدون ال ABS كتجهيز قياسى.
على العموم أن هخلى الكهربائى وهو بيشيك على التكييف يبص على الحساسات وممكن تكون محتاجة نظافة
وحمد لله على سلامتك فى الحادث وعلى رائى المثل السعودى
الحمد لله جت فى الحديد ومجتشى فى العبيد :)
ودمتم بود