السلسه التعليميه: تغير التيل الأمامي
طبعا الفيتاويه نايمين :majd(2): وناسيين السلسه التعليميه خالص :khd:
فقولت أفوقكم النهارده بإزاي تغير التيل الأمامي تحت البيت ومش هتحتاج عده صعبه ولا خبره خالص خالص خالص :F_eyeb1[1]:
الوقت: من 45 د ل ساعة بالكتير (لو إنت ملكش في الميكانيكا قوي)
السهوله: عيل صغير 12 سنه ممكن يعملها لو وريته إزاي (مفيش أسهل من كده)
العده المطلوبه:
1) الكوريك بتاع العربيه الي مرمي في الشنطة
2) مفتاح عجل مرمي في الشنطه برده
3) مفك عاده مرمي في الشنطة برده
4) التيل (أكيد يعني)
5) سرنجة 2.5 مل (إوعوا حد يجيبها أكبر من كده -بهزر أوعوا تصدقوا-)
6) مفتاح 13 مم (تروح تشتريه -متدورش عليه في الشنطة:untitled:-)
7) brake cleaner (مش لازم قوي على فكره)
أول خطوه
هتفتح الكبوت (طبعا هتقولوا إيه الي جاب القلعة جمب البحر)
إسمعوا الكلام وبلاش لماضة
وهتدور على خزنة الباكم وتفتحها
http://img18.imageshack.us/img18/1508/imag0058ag.jpg
وهتعرف السبب بعدين ليه تفتحها
الخطوة التانيه
هتجيب الكوريك وتحطه مع السهم الي في العتبه وتتأكد وإنت بترفع إنه دخل في العتبه صح
http://img641.imageshack.us/img641/7024/imag0041u.jpg
http://img193.imageshack.us/img193/7831/imag0042mk.jpg
قبل ما ترفع هتريح مسامير العجله وبعد كده ترفع وتفك العجله (مش هقولكم إزاي عشان عيب واحد يبقى راكب عربيه ومبيعرفش يفك الكاوتش)
الخطوة التالته
هترمي الكاوتش تحت العربيه عشان أي حركه غبيه توقع الكوريك لا قدر الله متروحش في داهيه
وهتلاقي الشكل كده بس الطنبوره مش محفره طبعا
http://img823.imageshack.us/img823/92/imag0043fz.jpg
الخطوه الرابعه
هتبص ورا كتله الحديد دي هتلاقي مسمارين 13 زي الصورة كده هتفكهم (واحد فوق وواحد قصادة تحت)
http://img718.imageshack.us/img718/4398/imag0046wt.jpg
صوره تانيه توضح الدنيا شويه
http://img214.imageshack.us/img214/8162/imag0045fy.jpg
الخطوة الخامسه
فكيت المسمارين يا وحش نيجي بقى لحته رخمه مهو مش كله هيمشي سهل كده
هتشد الكاليبر
لبره وهيبقى بالشكل ده خلي بالك هتلاقيه بيطلع بصعوبه جدا متخفش وشد وإسترجل
http://img6.imageshack.us/img6/8621/imag0050f.jpg
هتلاقي الشكل زي كده
http://img851.imageshack.us/img851/9986/imag0051de.jpg
الخطوة السادسه
ممكن تبدلها بالخطوات الجايه مفيش ترتيب بس ناخد واحده سهلة وواحده رخمة عشان نريح شويه
وبما إن هيطلع عينك شويه في الي فاتت فناخد حاجة سهله بالمفك العاده هتطلع التيل القديم
http://img69.imageshack.us/img69/7153/imag0052py.jpg
http://img821.imageshack.us/img821/8712/imag0053c.jpg
وتطلعهم بره خالص (فيه حديده فوق وتحت) تتأكد إنهم نضاف وترشهم بالbrake cleaner مش لازم ترشهم بس لازم تتأكد إنهم نضاف
وتحط التيل الجديد
http://img802.imageshack.us/img802/4504/imag0060wj.jpg
طبعا شايفين فرق السمك بين الجديد والقديم
الخطوه السابعة
لازم تبقى رخمه ورخمه قوي كمان عشان الي فاتت كانت سهله
فرق السمك الي شفناه ده أكيد حاجة كانت معوضاه وطبعا هو البستم الي في الكاليبر فلازم نرجعة لأصله
هنجيب لقمه من التيل القديم ونحطها في الكاليبر ونمسك مفتاح العجل ونضغط (محدش فاهم حاجة طبعا)
http://img33.imageshack.us/img33/8/imag0057bz.jpg
ها كده فهمتوا؟
سامع أيوه تمام قوي
هتقعد تضغط بالمفتاح بإيديك الإتنين لحد ما ترجع البستم مكانه زي كده
http://img3.imageshack.us/img3/8138/imag0059bs.jpg
هتقولي مستخدمناش السرنجة ولا عملنا حاجة بعلبه زيت الباكم الي فتحناها
لما هترجع البستم هتلاقي زيت الباكم زاد في العلبه وهتلاقيه ممكن يعدي الماكس فهتسحبه بالسرنجة عشان ميدلدقش من العلبه وبعد ما ترجع البستم مكانه زي الصوره الي فوق تتأكد إن الزيت على الماكس وتقفل
الخطوة الأخيره
ودي من غير صور هترجع الكاليبر مكانة وتربط المسمارين ال13 كويس وتركب الكاوتش وتنزل العربيه وتقرط على الكاوتش (بس متنحلش المسمار عشان خطري)
وتكرر الي عملته في الجنب التاني
هتركب العربيه تكارك للفرامل لحد ما تحجر تحت رجلك وتقوم مدور ومبروك عليك التيل الجديد :36_7_7[1]:
وولا الحوجة لا لتوكيل ولا ميكانيكيه
محدش يحاول يعمل كده في التيل الي ورا حتى لو ديسكات مش حلل لإن ليه طريقة مختلفة عن الي قدام