حد له خبرة فى التلووين على الزجاج

**A7MED_PHARMA** · 23-03-2012 04:55 PM

بص ياسيدي

تحديد الرسمة على القزاز..بيتكون(زي ماشنوري قالك) بأنابيب لها طرف رفيع
بتضغط بالراحة على الانبوبة .. وايدك ماشية على الخط الي هترسمه
لازم عملية الضغط وحركة ايدك على الرسمة..تكون متناسبة

انابيب التحديد دي..حسب منا فاكر..كان فيه منها لون ذهبي..ولون فضي

المساحات الكبيرة الي بتتلون..لها ألوان مخصوص
بتلاقيها في المكتبات المحترمة

الموضوع دقة في الاداء بس..مش محتاج حرفية ولا مهارة

**amr.elsayed** · 06-04-2012 06:53 AM

عايز اخد رائيكوا فى حاجة محيرانى وهى الالوان
ان اولا سرقت قطعة ازاز من البيت حاجة امى بتقول عليها شوفونيرة ... انا مش عارف الحقيقة مين نيرة دى بس مش مهم
قولت اجرب فيها الاول وكان الاتى
1- دورت على النت على تصميم يكون سهل شوية علشان اجرب فيه الاول
2- بدأت فى تحديد الرسمة بالريليف
3- احترت جدا فى الالوان فا لونت التصميم على اساس اعمل صورة قريبة للصورة اللى حتكون مرسومة على الزجاج
ودى الصور وعايز رايكوا فى الالوان وخاصتا اللون الاسود ايه رائيكوا فيه ولا الالوان الفاتحة احلى زى البرتقالى او اصفر مائل للخضار على خفيف
.............................................
ودى الرسمة على الازاز و الريليييف دة طلع مش سهل خالص وعايز تمرين كتير والرسم على الورق اسهل بكتيييير جدا بس انا وراه لحد ما اعرف ديته

..........................
ودة الوضع الان على الازاز

...............................
ودة التصميم بعد ما لونته والورد البلاستيك حلزقه على الازاز زى الصورة كدة و دة سرقته من حاجة غريبة كدة لونها ابيض بتتعلق على الحيطة وفيها ورد

.........................
المشاركة شكلها غريب زى مايكون حرامى غسيل اللى كاتبها هههه .. منتظر رائيكم .. ويا ريت يا جماعة لو حد عنده اى اقتراح او شايف اى عيب يقولى عليه وشكرا ليكم

**SHNORY** · 06-04-2012 03:44 PM

بسم الله ماشاء الله
تسلم ايدك فعلا
بس تعليقي الوحيد انها غامقه اوي
حاول تفرفشها
رسومات الزجاج بتكون الوانها يغلب عليها الفواتح والفواقع
علشان لما الشمس تيجي عليها تبقي منوره

**شريف** · 07-04-2012 02:41 AM

جميل بجد
ممكن تقول خطوه بخطوه انت عملت ايه

**Donzi** · 07-04-2012 02:59 AM

اللههههههههههههه فكرتني بايام المدرسة و دي كانت هوايتي الاولى و اي حاجة فنية بتتعمل بالايد كنت راشقة فيها

الاخوة قالولك كل حاجة تقريبا و حبيت اقولك بس ان في نوع جميل اوي من الوان الزجاج بعد ما بينشف بيبقى مضلع او متكسر كدا زي الاشعة و مع الاضاءة لونه بيقلب و بيعكس بس انا مش فاكرة اسموا ايه

و في رسمات ممكن تشيل الريليف منها بعد ما تخلص تلوبن و تنشف

و ممكن كمان الرسم بالالوان دي على المرايات بس بعد ما تتفرغ يعني بتفرغ الرسمة على ضهر المراية بمية نار متخففة و بعدين تلون الفاراغات دي و بعدين المرايا تتحط في مكان او ركن و وراها اضاءة

بتبقى تحفة لما الاضاءة بتخرج من الرسمة المفرغة بالالوان من المرايا، انا كنت عاملة واحدة على شكل طاووس و انا في المدرسة كانت تحفة

**Donzi** · 07-04-2012 01:55 PM

المشاركة الأصلية كتبت بواسطة amr.elsayed

يا باشا دة بس من زوقك
انا عملت الكلام اللى قالوا عليه شنورى ونونيتة وفارما ودة كل الموضوع باختصار
الادوات
لوح زجاج بمقاس الرسمة اللى حترسم عليها ... وانبوبة ريليف ... والوان زجاج اللى حتلون بيها
تجيب التصميم اللى حترسمه وتثبته تحت الزجاج اللى حترسم عليه وتبدأ تشف الرسمة بالريليف على الزجاج
وتتركه ينشف بس تسيبه فترة محترمة علشان ينشف كويس 6 , 7 ساعات مثلا
بعد كدة بتجيب اللون وفى كذة طريقة فى استخدام الالوان يا بالفرشة يا بالقطارة والالوان بتتخفف بالتنر
وترجها كويس كدة داخل القطارة وتبدأ تحط لون لون وتتركه ينشف ... طبعا الناس المحترفة بيلونوا الرسمة كلها مرة واحدة
بس انا بتانى شوية علشان الاخطاء فى الاول حتلاقيها كتير لحد ما ايدك تاخد على الموضوع

انا من كام يوم طلعت كراسة رسم كانسون بتاعتى وانا صغير مكتوب عليها 2/4 تانية رابع هههههه بس فيها شوية رسم جامد جدا
كنت زمان بحب الرسم دة والاركت وبالذات الاركت عملت بيه حاجات كتير زخارف اسلامية كانت جميلة بس للاسف ضاعت ومش عارف هى فين
عموما ان شاء الله حبقى اشوف موضوع الالوان دة بس لما اتقن الموضوع اكتر لان الرسم على الازاز دة واضح انه محتاج ممارسة علشان الواحد يتطور فيه
وعايزين نتفرج على صورة المراية وشكرا لحضرتك على مرورك

والله كان نفسي يبقى عندي صورة ليها بس للاسف دي كانت من ايام ثانوي يعني من 10 سنين كدا قبل الموبيلات اللي بكاميرات و الكلام دا و اتباعت في معرض المدرسة :-(