ليك انت؟؟ طيب ما كانت معاك واحدة
عرض للطباعة
ياعم احمد انا بعتها علشان كنت مزنوق في حوار الجوازة..والحمد لله الجوازة فكسسسسسسسسسسسسست......وعايز عربية...ومش هاقبل بحالة اقل من اللي كانت معايا.وعايزها 1500..ويفضل تكييف.
السلام عليكم أصحاب اللادا سمارة إللي مطنشين القسم من فترة كبيرة
عندي مشكلة في أكرة باب السائق أنها مبتفتحش من برة والموضوع ده حصل فجأة بدون أي مقدمات يوم الجمعة... رحت لبتاع أبواب إللي هو مركب لي السنتر... بص... قال الأكرة فيها مشكلة ولازم الأكرة كلها تتغير... المهم هو مكنش عنده واحدة وقال لي فوت عليا تاني يوم إللي هو السبت أكون جبت لك واحدة استيراد... المهم إللي جابها دي ثاني يوم (السبت) قعد الصنايعي إللي في المحل يركب فيها ساعتين لحد ما عرف يظبطها... روحت البيت أفطر طبعًا على أساس كل حاجة تمام ويادوب طلعت وبعد الفطار نزلت أروح مشوار ألاقي الأكرة مش شغالة بالإضافة إلى أن السنتر لما أغلقه يفتح تاني من نفسه طبعًا الكلام ده كان السبت والوقت اتأخر فكلمته قال لي (إزاي تعلالي وأنا أظبط لك كل حاجة) طبعًا بعد ما قلت له كلمتين زي الزفت على الصنايعي إللي عنده إللي معندهوش ضمير في التقفيل...
طبعًا أنا مقلتلكمش على سعر الأكرة إللي جبهالي استيراد 100 جنيه + 20 جنيه مصنعية.... طبعًا اتحرق دم أهلي وخصوصًا لما سألت على جوز الأكر الأمامي روسي أصلي عند سيد نصار إللي في التوفيقية قال لي 150 جنيه بمشتملاتهم وفيه كلام لما أجيله
السؤال بقى.... أروح أخليه يظبط لي الباب ونشوف الدنيا اتظبط ولا لأ ... ولا أقول له رجع كل حاجة وآخد الأكرة بتاعتي القديمة منه وآخد الفلوس بتاعتي منه... وأروح لبتاع أبواب تاني يشوف لي الدنيا.. ولو احتاج أكرة اجيب له جوز الأكر إللي عند سيد نصار وأخلي واحدة احتياطي معايا....
إيه رأيكم يا شباب أفيدوني بسرعة ياريت علشان أنا رايح له بعد الفطار بإذن الله
انا رايح بكرة ان شاء الله...اشوف سمارا 97..ربنا يسهلها..وتطلع حالتها نضيفة..الراجل بيقول ان حالتها تمام..وبيتكلم في 20000 الف جنيه .ابن التييييييييت... المهم بس حالتها تبقي تمام ..
رحت شفت العربية وماعجبتنيش بصراااحة...وقولتلة 17 الف..وهو مسك على 18500..وانا نفضتلة ...لأني اساسا عايز ال1500 مش عايز 1300...ربنا يسهل والاقي واحدة نضيفة ..
السلام عليكم شباب
عندي مشكلة في العفشة بتاعة العربية... لما باضغط على الجانب اليمين من ناحية المساعد ورا بأسمع صوت تزيئة.. وأنا حاسس أن كده المساعد عايز يتغير... ياريت تنصحوني هل أجيب مساعد استيراد... ولا أركب جديد... مع العلم أن الجديد ممكن يكون أصلا صيني وبيكتبوا عليه بلد الصنع روسيا...
ياريت إللي مر بالموضوع ده يقول لي أعمل إيه ضروري الله يبارك فيكم
اشتريت أمس قربة ماء الخاصة بفسيل الزجاج بمبلغ 45 جنيه روسى ( لادا سمارا موديل 1991 ) من عند محل فى سوق التوفيقية في الدور العلوى اسمه فيكتور لادا . بالقاهرة طبعا ...........
اكرة الباب ديه انا لسه جايبها من محمد لادا اللي في اول فيصل ب ٥٥ جنيه واخدت واحدة بس مش اتنين
اشتريت كذلك علبة لمبات صغيرة اسمها لمبات سفاية بدون قاعدة ب 3جنيه ونصف ( 3.5 جنيه ) وذلك لتغيير لمبات محروقة أو ضعيفه فى عدادات الطبلوه والعلبة بها 10 لمبات وذلك من محل داخل سوق التوفيقية أيضا ...
ممكن حد يجرب اكر الجولف 2..لانها نفس الشكل..
هو فعلاً اكر الجولف 2 نفس الشكل .. بس مش عارف هل في أحد من الأخوة الأعضاء ركبهم عنده ولا لأ...
بصراحة الباب بتاعي والباب إللي ورايا مبقوش يفتحوا من بره خالص... يعني لو صادف الحظ أني ركنتها في مكان ضيق جدا وحضنت ناحية اليمين أوي مش هعرف أدخل العربية خالص إلا من شنطة العربية بقى
اشتريت طقم دبرياش كامل اسطوانة وديسك وبلية من الشركة المصرية بالتوفيقية ب 300 جنية روسى
بعد التحية لمالكة السمارا تم تغير طقم الدبرياش لعدة اسباب منها الرعشة الجامدة وانت واقف على السلانسية الدبرياج كان واطى جدا وفشلت كل المحاولات لرفعة عن طريق الرجلاش كان فية صوت ورة للبلية ملحوظ وكان بيختفى لما تدوس دبرياج وكمان صوت الماتور كان بيعلى جامد اظن من الاسطوانة ودة كان اما بتقرص على الغيار استهلاك بنزين عالى
بعد التغير السحب اختلف تماما وكمان صوت الماتور هدى والعربية اصبحت اكتر نعومة
بصراحة هو موضوع الدبرياج ده لسه في أوله عندي... فعاجلا أم آجلاً لازم يتغير.. بس كويس أنك أفدتني في موضوع الأسعار..
بس لي سؤال
هو موضوع تركيب طقم الدبرياج بيتطلب رفع الموتور وخروجه برا الحوض في اللادا سمارة؟؟؟؟؟
السلام عليكم إخواني مالكي السيارة لادا سمارة
حصل عندي حاجة في العربية كنت هتجنن وأعرف إيه دي:
صوت تك تك تك في أول ما أطلع بالعربية... سألت الميكانيكي في التليفون على الصوت إللي باسمعه... فقال لي يمكن كوبلن العدل.. أو بلية.. طبعًا أنا شكيت في كوبلن العدل زي ما هو قال... خصوصًا أن الصوت كان طالع من قلب الحوض نفسه... طبعًا مكدبتش خبر ورحت لواحد بتاع زيوت يفحص لي زيت الفتيس ويشوف هل كاوتش الكوبلن بيجيب زيت ولا لأ... الحمد لله كاوتش الكوبلن تمام وقياس زيت الفتيس زي الفل...
أمال إيه الموضوع... رحت لميكانيكي قريب من ناحية المعادي صاحب أخي.. يادوب حركت العربية فسمع التكتكة قال لي دي كوتش الشدادات نشف ومحتاج يتغير طبعًا شكيت في الكلام بنسبة كبيرة.. طبعًا رحت لبتاع العفشة على طول خصوصًا أن الصوت كان بسيييييط جدااااااا وبعد كده زاد معايا.. المفاجأة.. بتاع العفشة نزل تحت العربية وقال لي أطلع خطوة بسيطة لأدام.. وبعد كده قال لي تعالى انزل معايا تحت العربية... قال لي الركبة الشمال إللي عند صدر العربية من الأمام عايزة تتعمل لها مرمة لأنها مشرخة... بصراحة حمدت ربنا وقلت الحمد لله أنها بسيطة...
بالفعل رحت لسمكري ابن حلاااااااااااال والحمد لله تم لحام الركبة وعمل مرمة من الداخل والخارج للمتانة... وكان في مفصلة الباب الخلفي كانت سايبة خالص وكانت مزهقاني لأن كل ما أفتح الباب وآجي أقفله تاني لازم أرفعه علشان يتقفل فلحمها على أبوها كويس... بس بصراحة الله يبارك له بعد ما عمل المرمة بتاعت الركبة دهن مادة لمنع التآكل في الصاج.. وتمت العملية على خير والحمد لله... كل ده اتكلف 100 جنيه وحمدت ربنا على كده
ارغب في شراء سيارة سمارة برجاء ترشيح افضل موديل مع العلم انها الول سيارة لي وهتعلم عليها
ارغب في شراء سيارة سمارة برجاء ترشيح افضل موديل مع العلم انها اول سيارة لي وهتعلم عليها
انا طالب رأي الناس الخبرة ف يسمارة معروض سمارة موديل 96 هي رشه برة نظافة الحالة العامة جيدة بس لاحظت وانا ببص علي الموتور ان في زيت حول الموتور رغم ان العربية مركونة من خمسة ايام صحبها طالب 19 الف السعر ده مناسب ومضع الزيت دة يبقي اية ؟؟؟
الف تحية لكل مشارك فى موضوع السمارة يا ريت لو حد عنده فكرة على فتيس السمارة سعره كام استعمال ويا ريت لو حد عنده ارقام بتوع قطع غيار السمارة فى الوكالة او عزبة شلبى
الف شكر ليك يا شنورى بس تغييرك للفتيس كان من قد ايه يعنى الاسعار دية من قريب ولة من فترة
كان من اكتر من سنتين يا باشا
شكرا ليك يا شنورى بس هل الاسعار اختلفت الان ولة معندكش فكرة وشكرا مرة اخرى
والله يا باشا بدعي من ربنا انه ميحوجنيش اني اعرف الاسعار هههههههههههههههههههه
بس مظنش انها حتختلف كتير يعني
الف شكر ليك يا شنورى على اهتمامك
والله يا أخي الكريم الواحد عامل زي الطاحونة ودوامة الدنيا :khd: يا دوب آجي من الشغل ألحق أقعد مع أولادي شوية علشان بيبقوا اليوم كله واحشني جداااا ومبشفهمش إلا الساعات الأخيرة من اليوم ويبقى يوم الأجازة ده بأخذه راحة تامة من شدة إرحاق أيام الأسبوع أو زيارات عائلية بقى
برجاء المساعدة من اصحاب الخبرة وملاك الادا سمارا انا عاوز اعرف البيانات بتاعة موديل العربية بيبقي مكتوب فين ؟؟ عشان وانا ببص علي عربية عاوز اشتريها موديل 1996 خمسة باب لقيت الاتي : لما فتحت الكبوت لقيت قطعتين معدن واحدة مستطيلة علي شكل جدول تقريبا وفي اخرها مكتوب 2109 وقطعة تانية مربع مكتوب عليها 2108 هو مش المفروض يبقي لتنين مكتوب عليهم 2109 برجاء التوضيح ولو حد ممكن يصورهم مشكورا
اشتريت اول امس مفتاح كونتاكت كامل ب 120 جنيه روسي لسيارتى لادا سمارا 2109 مو 91 من محل اوتو لادا فى ممر ضيق بسوق التوفيقية بالقاهرة ( اكتوبر 2012 ) ................
السلام عليكم مالكي السيارة لادا سمارة
والله أنا محتاج آخد رأيكم في حاجة كده...
عندي العربية فيها رعشة رخمة إللي هي رعشة أسطوانة الدبرياج ده غير أن بلية الدبرياج بتعمل صوت بس في الخفيف في أوله وبرده الرعشة دي مبتبقاش على طول دي بتبقى وأنا بأحرك العربية على الأولاني... وبصراحة أنا باعرف أسيطر عليها...
بس السؤال هل أنا محتاج أغير طقم دبرياج اليومين دول ولا أستني شوية عليه لحد ما يتعب معايا... وإيه أضراره في البداية؟؟؟؟
أيضًا بأفكر اليومين دول أركب طاره سبور للعربية.... فهل فيه طارة معينة تركيب على اللادا سمارة ولا بتبقى أي طارة سبور شكلها شيك يركب... وهل لازم أركب الزور إللي بيتباع لواحده إللي هو بيمسك في التاره؟؟؟؟
الحاجة الثالثة والأخيرة...
عندي المساعدين إللي في الشنطة ضعفوا جامد وعلشان أفتح شنطة العربية لازم أمسك الشنطة علشان متترزعش على دماغ لحد ما أجيب الحاجة إللي في الشنطة... ياريت حد يقول لي أسعارهم إيه وإيه أفضل نوع أجيبه ومنين لأن الموضوع ده أنا مسترخمه جدااا
موضوع الدبرياش والرعشه وصوت البليه ده العادي بتاع العربيه
انا مغير كذا جيربوكس وكذا اسطوانه وديسك وبليه وبرضه فيه رعشه وصوت البليه واضح
بخصوص الدركسيون فتقريبا لازم تركبله الزور
بخصوص المساعدين فلازم يتغيروا بس معنديش فكره عن الانواع
وتقريبا بيعملوا في رينج 60 جنيه