نيسان تيدا ولا مازدا 3 !!!

**f4f8f12** · 23-03-2012 11:09 PM

المشاركة الأصلية كتبت بواسطة hossam_zaky

الناس ردت عليك بمنتهي العقلانية و الفهم
لكن أسمحلي أضيف أنت بتشتري مستعمل مش زيرو و فيه حاجات معينة لازم تفكر فيها

المازدا عربية راقية جدا جدا و بمستوي الجيتا و الفوكس و ستايل تحفة و اداء لا غبار عليه
لكن لازم تستحمل مع المميزات دي صالون ضيق شوية في الخلف و شنطة العربية معقولة مش صغيرة حوالي 400 لتر ( الصني معايا 430 لتر )
و لازم تكون عارف أن صيانة عفشتها مكلف لأنها علي مقصات في الأمام و في الخلف و انت بتشتري مستعمل يبقي أكيد لها مصروف ما و كمان الطنابير بتاعتها بحالتها ولا أيه لأنها مكلفة و مش حتلاقي الأصلي بسهولة ( كل الناس بتقول أصلي )
صيانتها أكيد مش حتكون في التوكيل و حتزور قسم مازدا تعرف الناس بتعمل صيانة فين

النيسان عربية راقية جدا برضه لكن مش لنفس المستوي بس صالون بحر و شنطة كبيرة جدا حوالي 460 لتر و مراكز صيانة زي الفل و توكيل ممتاز من احسن التوكيلات في مصر حاليا و قطع غيار تكلفتها مقبولة و عفشتها مش بتدي ثبات بمستوي المازدا لكن مالهاش صيانة لأنها علي قنطرة في الخلف ماسكة العجلتين زي الصني بس بمستوي تجهيز أرقي و كبيرك تحتاج مقصين امامي بعد عمر ( برضه أنت بتشتري مستعمل )
و تتعايش مع شكل مش بيعجب كل الناس ( بيعجبني عن نفسي لأنه بيدي فخامة ) و ثبات علي الطريق أقل من المازدا ( بس يرضه مش 128 )

أنا فكرت زيك كنت عاوز أغير الصني بحاجة أرقي شوية و الأتنين دول اللي فكرت فيهم بس مستني أشوف حعرف أجيب قشقاي أو سبورتاج و أقسط تمنهم ولا أبيع و أحط حاجة بسيطة و أجيب مازدا أو تيدا مستعمل

في النهاية الأختيار صعب لأن الأتنين ياباني و في نفس الفئة السعرية للمستعمل

المازدا أكيد قلبك حيختارها
النيسان أكيد عقلك حيختارها

بالتوفيق

مبدأيا اشكرك على مرورك .. تانى حاجة احب اديك 100 مليون تحية على اخر جملتين (
المازدا أكيد قلبك حيختارها
النيسان أكيد عقلك حيختارها

انت جبت الاخر وبعد الاخر كمان بالجملة دى.. جبت الخلاصة زى ما بيقولوا ...
عجبنى انك بصيت للموضوع بصه مستعمل .. يعنى فكرت بايهم اكثر عملية .. العربيتين مفيش غبار عليهم .. والفروقات فروقات قلب وعقل زى ما قلت .. انا تقريبا حسمت الموضوع عمليا لعقلى (التيدا) وبعد استخاره ربنا مفيش حاجة هتيجى وحشة ان شاء الله .. تحياتى ليك يا باشا .. وربنا يوفقك فى اختيارك ان شاء الله ..

**fouady** · 23-03-2012 11:30 PM

المشاركة الأصلية كتبت بواسطة f4f8f12

عايز اقولك انى لسه قارى التقرير بتاعط فى قسم النيسان عن التيدا (بتاعة باباك)

بس بعد ما قريت التقرير حسيت ان العربية زى الريشة من حوار انها مش ثابتة وانها زى ما انت قولت شكلها من جوه مش جامد قوى .. بس انا عندى الشوارع عند البيت مكسرة تكسير ربنا ما يوريك و انا لما كان معايا الدايو كنت بحس انى فى مراجيح.. انا بحب العربية الواطية على فكرة علشان اثبت بس كل ما هاجى احك فى مطب هحس بالهم .. واللى هو كأن قلبى بيوجعنى .. انا شايف ان مشكلة الثبات دى حلها ان احنا منجريش بيها قوى الا فى مواقف معينة يعنى .. بس علو عن الارض وعفشة وقطع غيار كويسة وتوكيل محترم .. متهيقلى انها انسب .. وفنفس الوقت هاتش باج يعنى شبابى وشكلها من بره جميل .. ولا ايه رأيك؟

وإيه رايك فـال تقرير حاجة أوستيك شغل فندق

هاهاها , لأ العربية مش لا درجة ريشة أنا بجري بيها وبخد خرز ومابتعوميش ولا حاجة هو بس مجرد إحساس الثبات بتعها بعد el140 بتخف حبتين وده راجع لاحجتن أولا إنها عليَّاما شاء الله وتصميم العافشا التورشيم بيم دول اللي بيخلوها كده وال مشكلة دي ممكن تتحل لو جبت جانت عريض وكاوتش بما إنك هتجيب مستعمل فـسهل إنك تعمل كده هيحللك المشكلة دي وهتبقى كده مفيهاش حاجة عيب قوي وهي زي ماإنا قلت قابل كده مناسبة قوي لمصر وكمان العيب اللي أنا كنت شايفه فيها مش عندك اللي هو إنها غليا شوية فـكده عربية يابني واسعة ماتور محترم شكل لذيذ فرمل جميلة امان حلو قطع غيار السعرها معقولة تكيف حلو ثبات لحد 140 مش وحش فـلأ هي ك توتال مش وحشة أكيد

**lenasam** · 23-03-2012 11:59 PM

المشاركة الأصلية كتبت بواسطة Hossam_Zaky

المازدا أكيد قلبك حيختارها
النيسان أكيد عقلك حيختارها

بالتوفيق

احي حضرتك بشدة

**Sehsss** · 24-03-2012 07:39 PM

المشاركة الأصلية كتبت بواسطة ahmazong

بص يا سيدي مازدا متفوقة في العفشة جدا جدا جدا .. الثبات الخرافي .. موتور محترم .. Options تحفة .. أمان عالي ما شاء الله .. عيوبها بقى توكيل سيء جدا جدا .. ضيقة من ورا اويييييييي .. واطية على الارض .. قطع غير ناااااااااار

التيدا بقى موتور قوي جدااااا اقوى من مازدا .. تكييف احسن .. موفرة في البنزين اكتر .. واسعة بحر .. توكيل مفيش بعده اكتر من ممتاز .. قطع غيار مش غالية قوي .. عيوبها بقى : الثبااااااااااااااااات بصراحة مازدا تدوس عليها في الموضوع ده .. ثباتها وحش بعد 140 .. شلكها مش مقبول لمعظم الناس ..

بس كده ..

تحياتي تحياتي لحضرتك ..

+1111111111

**Dr'AhmZZong** · 25-03-2012 12:05 AM

بالتوفيق إن شاء الله .. اختيار موفق ..

تحياتي لحضرتك ,,

**Land_Cruiser** · 25-03-2012 01:22 AM

ياريت تبقى تكشف على العربيه فى التوكيل لما تلاقى حاجه تعجبك ان شاء الله

**Egy_fan** · 25-03-2012 01:13 PM

ما شاء الله . تعليق جامد جدا. القلب و العقل (المازدا و التيدا)
انا فعلا مبقدرش امسك نفسى ولازم ابص على اى مازدا 3 ماشية قدامى و كمان الشكل القديم احلى من الجديد
انا بصراحه كنت بقارن التيدا و البومه و المازدا و الالنترا بس غالبا هروح للتيدا
شكرا

**Hossam_Zaky** · 26-03-2012 02:00 AM

بالتوفيق لكل اللي بيبحث عن عربية
و التيدا عربية جميلة و موديلات 2008 2009 كانت ياباني بالكامل و دي ميزة يعرفها اللي بيركب الياباني و موتورها معمر و الكاتينة جنزير مش كاوتش ككل عربيات نيسان يعني مش حتخاف من تأخير صيانات أو تكلفة تغيير الكاتينة و صالون واسع جدا و شنطة كبيرة مع أهم نقطة ان توكيل نيسان ممتاز ممتاز عن تجارب كتير فمش حتتعب في الصيانات لأن قطع غيارها سعرها مقبول
و بالنسبة للشكل الخارجي فهو أذواق مش كل الناس بتتقبل شكلها لكن أحنا بنشتري جودة و إمكانيات ( مع التأكيد علي رأيي الشخصي بأنها عربية شيك جدا و فيها فخامة في خطوطها الخارجية )
و لما تستعمل العربية حتتعود عليها و حتنسي أصلا شكلها الخارجي و حيقعدلك أمكانياتها و عملانياتها اللي تحببك فيها
و أتمني كل واحد ربنا يرزقه بعربية بنت حلال تعيش معاه في تبات و نبات :)