كما و عدت (تقييم اللادا 2107 ) رووووووسي بعد ألف كيلو

**sniper2010** · 07-06-2008 12:30 PM

كما وعدت (تقييم اللادا 2107 بعد ألف كيلو) {رووووووووسي}
-العربية قوية جدا و مناسبة للطرق المصرية "الوعرة جوي يا بوي"
-استهلاك البنزين معقول. 11.7 كيلو في اللتر و ده طبعا يشمل المشي داخل و خارج المدن (المتوسط يعني)
-سحب العربية ممتاز لأنها انجكشن بس بعد المطبات بتبقى تقيلة شوية و محتاجة تاخد وقتها
-ثبات العربية ممتاز حتى سرعة 90 و معقول حتى 110 وبعد كده انتو فاهمين بقى
-العربية بحس انها بتموج في الملفات في السرعات العالية بس. ولكن بعد فترة اتعودت عليها و عرفت ان ده احساس خاطئ
-الدهان الخارجي للعربية سيء و بحس إنها متمحرة معجون و كمان بتـتـنـظف بصعوبة و بتلم تراب بسرعة
-الصاج الخارجي "دبااااااااابة" لدرجة إن بنطة الشنيور اتكسرت و احنا بنركب اللوحات
-مجال الرؤية ضيق نسبيا خاصة مع المرايات اللي نازلة معاها واللي ناوي إن شاء الله أغيرها
-الدركسيون معقول أثناء السير أما أثناء التوقف بيكون تقيل جدا جدا جدا أما بقى لو هترجع بالعربية للخلف فحركة الدركسيون بتكون شبه مستحيلة لأنك بتكون مضطر تستعمل إيد واحدة وانت باصص وراك
-بدء تشغيل السيارة سهل جدا و بتسخن نفسها لوحدها و كمان ممكن تمشي بيها ع الأول من غير ما تحط رجلك ع البنزين و ده يدل على قوة الموتور
-صوت الموتور عالي شوية بس اللي قاعد داخل السيارة ما بيحسش بكدة لأنها جيدة العزل
-الفتيس كويس جدا بس فيه عيب إن الغيار الثالث مش قصد الرابع بالضبط !!!
-الفرامل حلوة بس بحس ان العربية أقوى منها و ان عربية زي دي محتاجة فرامل أقوى أو ABS
- كمان الفرامل فيها صوت صفارة كدة بس لما بدوس فرامل جامد الصفارة دي بتروح بعد كده لغاية ما أخلص مشواري و تاني يوم نفس الموال
-الكراسي حلوة جدا و مريحة و ما بتحسش إنك لازق في السقف زي ما البعض بيقول (مع العلم إني طويل) و إن كان بعض اللي ركبوا معايا قالوا إن الصالون الخلفي ضيق شوية !
-طبعا العربية ما فيهاش كاسيت و انا مش ناوي اجيبلها لأني بستعمل الموبايل ...!
-الأبواب تقيلة شوية و محتاجة تترزع و انت بتقفلها
-العربية بتسخن بسرعة بس قالولي إن ده كويس للإنجكشن و إن المصنع متعمد يحط الثرموستات على الموتور مش على الرادياتير عشان كده وفي ناس قالولي إن المياه السخنة بتدخل الموتور لأن روسيا برد و إن أنا لازم أفصل خرطوم المياه اللي داخل ع الموتور
-الدبرياج خفيف جدا مش زي اللادا المصري
-نصف قطر دوران السيارة كبير و دي تاني اكتر حاجة مزعلاني (بعد الدركسيون طبعا)
رغم ده كله فأنا مقتنع بيها تماما ولو رجع بي الزمن لوقت ما اشتريتها كنت برضو هشتريها أحسن من هيونداي i10 واحسن من اسبرانزا 113 أي نعم أقل رفاهية بس أفضل ألف مرة من الناحية العملية

**azzam** · 07-06-2008 02:07 PM

فعلا تقييم كامل و شامل
وألف مبروك العربية وربنا يكفيك شرها

**yasoxp** · 07-06-2008 03:55 PM

الف مبروكي وربنا يكفيك شرها
وبالنسبه لصفاره الفرامل لما كنت فى الوكيل فى صيانه الالف قلولى ده عادى ومتقلقش وكانت شكوى عامه من الجميع فى الوكيل وكانت الاشاعه من الجميع ان نوعيه التيل المستخدمه ليست جيده ولاكن لا تقلق
وعلى فكره انا معايا لادا مصرى 2107 موديل 2008 وعمل حتى الان 2000 كم
بالنسبه للسرعه انا مخالف الجميع العربيه ثابته معايا حتى 140 كم وانا جيت بيها حتى 165 كم على طريق الاسكندريه بورسعيد الساحلى طبعا طريق مفتوح ومنكرش انى قلقت لما قربت من 170 كم حسيت بعدم الاتزان بس حتى 140 انا شايف العربيه تمام بس لنل موفق رأيك بالنسبه للملفات
بالنسبه للدريكسيون ممكن تغير المناول بأخر على رومبيل وده هيسهل معاك شويا انا كاتب موضوع بالصور فيه التفاصيل كامله

**ams** · 07-06-2008 07:35 PM

مبروك عليك العربية

المشاركة الأصلية كتبت بواسطة sniper2010

-بدء تشغيل السيارة سهل جدا و بتسخن نفسها لوحدها و كمان ممكن تمشي بيها ع الأول من غير ما تحط رجلك ع البنزين و ده يدل على قوة الموتور

من غير ما افتى فى حاجه مش فاهمها كويس بس و الله اعلم العربيه كده زى ما بيقولو عاليه فى السلانسيه وده بيزود استهلاك البنزين , و ده ملوش علاقة بقوة الموتور
شوف السلانسيه اللى هو يادوب الموتور شغال بيبقى على كام rpm

**bassam nagy** · 07-06-2008 08:03 PM

ربنا يباركللك فيها والف شكر على التقييم

**dr_3eshoo** · 08-06-2008 01:18 AM

الف مبروك يديك خيرها و يبعد عنك شرها

**azzam** · 08-06-2008 11:55 AM

يا ams شكرا على الإفادة و انا هشوف الحكاية دي و أقوللك

**azzam** · 08-06-2008 11:59 AM

أنا عربيتي برضو بتدور لوحدها و ممكن امشي بيها ع الأول....
و على فكرة المناول على رومبيل بيخلي الدركسيون طري جدا يا سنيبر أنصحك فعلا إنك تعمله

**sniper2010** · 08-06-2008 12:41 PM

الف شكر ليكم كلكم يا جماعة
إن شاء الله هشوف حكاية السلانسيه دي
أما بالنسبة للدركسيون فأنا هعمل مشحمة الأول ولو كانت النتيجة مرضية هكتفي بكده لأني بصراحة مش عاوز ألعب في العربية لأن الصنايعية بيصلحو حاجة و يبوظو غيرها و العربية جديدة مش عاوز أغامر بيها